Par imparar de pi
1. Chi che la ze Babilònia, la Granda?
Come che savemo che “Babilònia, la Granda”, la ze tute le religion false? (Apocalisse 17:5) Varda queste prove:
Ela la ze in tuto el mondo e tante persone le ghe va drio. La Bìblia la dise che la ze sentada do sora tante ‘persone e nassion’. Ela la ‘governa sora tuti i rè dela tera’. — Apocalisse 17:15, 18.
Ela no la ze i governi e gnanca el comèrsio. Savemo de questo parché ‘i rè dela Tera’ e ‘i comersianti’ no i sarà destruti insieme con ela. — Apocalisse 18:9, 15.
Ela la fà le persone pensar robe sbaliade sora Dio. Ela la ze una prostituta parché la laora insieme coi governi par ciapar soldi e altre robe. (Apocalisse 17:1, 2) Ela la imbroia persone de tuto el mondo e tanti i ze morti par causa de quel che la fà. — Apocalisse 18:23, 24.
Tornar ala lession 13, punto 6
2. Quando che el Messia el ndaria vegner ala Tera?
La professia dele 69 stimane la ne giuta a saver quando che questo sucederia. — Ledi Daniel 9:25.
Quando che le 69 stimane le ga scominsià? L’è stà nel ano 455 vanti de Cristo. In quel ano, Neemia l’è rivà in Gerusalen par far su nantra volta la cità. — Daniel 9:25; Neemia 2:1, 5-8.
Quanti ani le ze le 69 stimane? In arquante professie dela Bìblia, un giorno el vol dir un ano. (Nùmeri 14:34; Ezechiel 4:6) Alora, una stimana la ze sete ani. In questa professia, 69 stimane le ze 483 ani (69 stimane x 7 giorni).
Quando che le 69 stimane le se ga finio? Se scominsiemo a contar 483 ani dopo del ano 455 vanti de Cristo, rivemo al ano 29 dopo de Cristo.a In questo ano, Gesù l’è stà batesà e l’è deventà el Messia! — Luca 3:1, 2, 21, 22.
Tornar ala lession 15, punto 5
3. Tratamenti che i dopera el sangue
Arquanti tratamenti de salute i dopera el sangue dela persona. Quei che i serve a Dio no i aceta arquanti de questi tratamenti. Par esémpio, dar el so sangue a nantra persona o méterlo via par doperarlo dopo nte una sirurgia. — Deuteronómio 15:23.
Ghen’è anca i tratamenti che una persona la pol dessider far. Par esémpio, exame de sangue, hemodiálise, hemodiluição, recuperação intraoperatória de células o doperar la máquina coração-pulmão. Cada servo de Geovà el ga de dessider come el vol doperar el so sangue nte una sirurgia, nte un esame o nte una terapia. Pol esser che cada dotor el gàpia una maniera diferente de far questi tratamenti. Alora, vanti de far qualche sirurgia, esame o terapia, un servo de Geovà el ga de saver cossa sarà fato col so sangue. Proa pensarghe sora:
Parte del me sangue el va fora del me corpo e el se ferma par un tempo? Sarà che penso che questo sangue l’è ancora parte del me corpo, o la me cossiensa la vol che el sìpia trato do par tera? — Deuteronómio 12:23, 24.
Nte un tratamento, i dotori i ndarà far che parte del me sangue el vae fora del me corpo, i ndarà meter robe come rimedi e presto i lo meterà rento el me corpo nantra volta. Come mi me sentiria?
Tornar ala lession 39, punto 3
4. Separassion
La Bìblia la dise che i maridadi i ga de viver insieme par sempre. Ela anca la dise che quei che i se spartisse no i pol maridarse nantra volta. (1 Corinti 7:10, 11) Anca cossita, pol esser che un servo de Dio el desside spartirse parché sucede una de queste robe:
Quando el omo no’l vol dar ala so fameia quel che la ga de bisogno: Pol esser che el omo no’l vol gnanca darghe ala so fameia le robe pi importante par viver. — 1 Timòteo 5:8.
Quando la dona o el omo el patisse parché quelaltro el ghe fà tanto mal: Pol meter in rìscio la salute o la vita de quel che el patisse. — Gàlati 5:19-21.
El omo o la dona intriga quelaltro del tuto de servir a Geovà: El omo o la dona no’l pol adorar a Geovà parché quelaltro el ghe va contra. — Ati 5:29.
5. Feriadi e feste
I servi de Geovà no i fà feriadi che no ghe piase a lu. Ma pol esser che una sorela o un fradel el gàpia de scòlier se el ndarà far una selebrassion. Alora, el ndarà doperar quel che el sa dela Bìblia par far questa dessision. Varda questi esempi.
Qualchedun te dise “Feliz Natal”. Te pol ringrassiarlo. Se la persona la vol saver parché che no te fè le feste de Natal o de nantro feriado, te pol spiegarghe.
El to omo o la to dona no l’è Testimònia de Geovà e el te convida par magnar cola fameia nte un giorno che l’è un feriado. Se de acordo cola to cossiensa te pensi che te pol ndar, te pol parlar al to omo o ala to dona che no te ndarè far qualcossa che vien dela religion falsa.
El to paron del laoro el vol darte un presente o soldi nel fin del ano. L’è sbalià acetarlo? Pol esser che nò. El to paron el pensa che el presente l’è parte de un feriado o festa del fin del ano o l’è una maniera de ringrassiar el to laoro?
Qualchedun el te dà un presente nel fin del ano. Pol esser che la persona la te dise: “Mi sò che no te fè questa festa, ma mi vui darte questo presente.” Fursi la persona la ze bondosa. Ma l’è bon anca domandarte: ‘Sarà che la ze drio proar veder se fao pròpio quel che credo, o la vol farme partissipar de queste feste?’ Dopo de pensarghe sora, ti che te ghè de far la scólia. Volemo restar tranquili e seitar a esser fedeli a Geovà in tute le nostre dessision. — Ati 23:1.
Tornar ala lession 44, punto 1
6. Malatie che se pol passar ai altri
Noantri amemo tanto le persone. Par quela, se ghemo una malatia o pensemo che fursi semo maladi, ndaremo far el nostro meio par mai passarla ai altri. Noantri sempre se ricordemo de quel che la Bìblia la dise: “Te ghè de amar el to pròssimo come a ti stesso.” — Romani 13:8-10.
Come che una persona che la ga una malatia che la pol passar ai altri la pol mostrar amor? Ela no la ga mia de ndar saludar i altri cola man, gnanca darghe un strucon o un baso. Ela gnanca no la ga mia de restar disgustada se qualchedun no la convida par ndar ala so casa parché el vol proteger la so fameia. E vanti de batesarse, ela la ga anca de parlarghe al cordinador dei ansiani sora la malatia che la ga. Cossita, ela no la ndarà mia passar questa malatia ai altri che i ndarà batesarse. E se una persona che fursi la ga ciapà una malatia cossita la vol scominsiar a smorosar, saria bon che la fesse esami de sangue. Cossita, ela la ndarà mostrar che la ‘se preocupa nò sol con quel che ela la vol, ma anca con quel che i altri i vol’. — Filipensi 2:4.
Tornar ala lession 56, punto 2
7. Assunti de negossi e lege
Se metemo tuto par scrito quando ndemo far un negòssio, sarà pi fadiga che ghen sìpia problemi. (Geremia 32:9-12) Saria importante che féssino questo anca se ndemo far un negòssio con un fradel. Anca cossita, pol esser che suceda problemi de soldi o altre robe intrà due fradei. Se te sucede una roba cossita, l’è tanto importante che te te sforsi par dàrghene fora col problema sol ti e el fradel e con pace.
Ma cossa che un fradel el ga de far se qualchedun lo ga imbroià nte un negòssio o ga contà busie sora lu ai altri? (Ledi Mateo 18:15-17.) Gesù el ga insegnà quel che l’è giusto far:
Proa dàrghene fora col problema sol ti e el fradel. — Varda el versìcolo 15.
Se questo no va mia ben, domanda che un o due bravi fradei i vae insieme a ti parlar con questa persona. — Varda el versìcolo 16.
Se ancora cossita no te sì bon de dàrghene fora col problema, domanda aiuto ai ansiani. — Varda el versìcolo 17.
Se pensemo de portar questo fradel al tribunal, ghemo de ricordarse che questo pol far i altri pensar robe rugne dei fradei e de Geovà. (1 Corinti 6:1-8) Magari, dele volte ghe vol ndar al tribunal par dàrghene fora con qualche assunti. Par esémpio, par gaver el divòrsio, dessider chi che ndarà tender dei fioi e se quel che l’era maridà con una persona ghe toca darghe soldi par magnar. Pol esser che anca ghe vol ndar al tribunal par gaver i soldi de un seguro, quando una empresa la vien a banca rota o par spartir la eransa de qualchedun che l’è morto. Un fradel che el va al tribunal par dàrghene fora con problemi cossita e el se sforsa de farlo con pace no l’è drio desobedir al consìlio dela Bìblia.
E se qualchedun el pensa de ndar al tribunal o ale autorità parché un tosatel o nantra persona la ze stata violentada, la ga ciapà bote o la ze stata ciavada o copada? Se el desside farlo, lu no’l sarà drio desobedir ai consili dela Bìblia.
a Del ano 455 vanti de Cristo al ano 1 vanti de Cristo ghen’è 454 ani. Del ano 1 vanti de Cristo al ano 1 dopo de Cristo ghen’è 1 ano (no ghen’è el ano zero). E del ano 1 dopo de Cristo al ano 29 dopo de Cristo, ghen’è 28 ani. Alora, de 455 vanti de Cristo fin lì, ghen’è 483 ani.