LESSION 47
Sito parecià par batesarte?
Ti te ghè belche imparà tante robe sora Geovà e te ghè belche metesto in pràtica tanti consili che la Bìblia la dà. Ma pol esser che ghen’è qualcossa che l’è drio intrigarte de dedicarte a Geovà e batesarte. In questa lession, vederemo arquante de queste robe e come che te pol dàrghene fora con lore.
1. Sarà che te ghè de saver tuto dela Bìblia par batesarte?
Prima de esser batesà, te ghè de cognosser la verità sora Geovà. (1 Timòteo 2:4) Ma no stà pensar che te ghè de saver risponder a tute le domande sora la Bìblia prima de batesarte. Anca quei che i ze batesadi fà tanto tempo i seita a imparar sora Geovà. (Colossensi 1:9, 10) Ma, te ghè de cognosser le verità pi importante dela Parola de Dio. I ansiani dela congregassion i ndarà giutarte a capir se belche te cognossi queste verità.
2. Cossa che te ghè de far prima de esser batesà?
Prima de batesarte, te ghè de ‘ciamarte gramo e cambiar la maniera de viver’. (Ledi Ati 3:19.) Alora, te ghè de ciamarte gramo dei sbali che te ghè belche fato e domandar che Geovà el te perdone. Te ghè anca de fermarte de far quel che Geovà el dise che l’è sbalià e viver de una maniera che ghe piase a lu. Nantra roba che te ghè de far la ze ndar ale riunion e predicar insieme cola congregassion.
3. Parché che no te ocore gaver paura de batesarte?
Arquante persone le ga paura de batesarse parché le pensa che no le sarà bone de far tuto quel che le ga prometesto a Geovà. E l’è vera che te ndarè sbaliar, parché la Bìblia la dise che fin i òmini e done fedeli i ga sbalià. Ma ricòrdate che Geovà no’l vol che te sìpia perfeto. (Ledi Salmo 103:13, 14.) Lu el resta contento quando te fè el to meio a lu e el vol giutarte a far quel che l’è giusto. Geovà el ga prometesto che el ndarà sempre amar i so servi. — Ledi Romani 8:38, 39.
IMPARA DE PI!
Come che cognosser a Geovà e gaver el so aiuto ndarà giutarte a dàrghene fora con qualche dificoltà che te ghè par batesarte?
4. Cognossi meio a Geovà
Sarà che te ghè de saver tuto sora Geovà prima de batesarte? Te ghè de cognosser quel che te ocore par amarlo e voler assarlo contento. Vardé el VÌDEO par capir quel che studianti dela Bìblia in tuto el mondo i ga fato par cognosser meio a Geovà. Dopo, parlé sora questo:
Nel vìdeo, cossa che li ga giutà a esser pareciadi par batesarse?
Ledé Romani 12:2, e dopo, parlé sora questo:
Te ghè qualche dubio sora quel che la Bìblia la insegna o se quel che le Testimònie de Geovà le insegna l’è la verità?
Se te ghè questi dubi, cossa che te pol far?
5. Te pol dàrghene fora cole dificoltà
Quando dessidimo dedicarse a Geovà e esser batesadi, noantri infrontemo dificoltà. Par veder un esémpio, vardé el VÌDEO, e dopo, parlé sora questo.
Che dificoltà Narangerel la ga infrontà par servir a Geovà?
Come che el amor a Geovà la ga giutà a dàrghene fora con queste dificoltà?
Ledé Proverbi 29:25 e 2 Timòteo 1:7, e dopo, parlé sora questo:
Cossa che pol darne coraio par infrontar le dificoltà?
6. Sìpia sicuro che Geovà el ndarà giutarte
Geovà el ndarà giutarte a far quel che ghe piase a lu. Vardé el VÌDEO, e dopo, parlé sora questo.
Nel vìdeo, parché che el studiante dela Bìblia el gavea paura de batesarse?
Cossa che lu el ga imparà che lo ga giutà a fidarse de pi in Geovà?
Ledé Isaia 41:10, 13, e dopo, parlé sora questo:
Parché che te pol esser sicuro che te sarè bon de far quel che te ghè prometesto a Geovà?
7. Daghe ancora de pi valor al amor che Geovà el te mostra
Se te pensi sempre sora el amor che Geovà el ga par ti, te ghe darè ancora de pi valor e te volarè cada volta de pi servirlo par sempre. Ledé Salmo 40:5, e dopo, parlé sora questo:
Che benedission de Geovà te piase de pi?
El profeta Geremia el amea tanto a Geovà e la so Parola, e el restea tanto contento de parlar sora el so nome. Lu el ga dito che la Parola de Dio lo assea contento nel cuor parché el parlea del nome de Geovà ale persone. (Geremia 15:16) Rispondi a queste domande:
Parché che l’è una roba tanto bela esser Testimònia de Geovà?
Vuto esser batesà come una Testimònia de Geovà?
Ghen’è qualcosa che te intriga de batesarte?
Cossa che te pensi che te ghè de far par batesarte?
FURSI TE GHÈ BELCHE SCOLTÀ: “Mi go paura de batesarme e no esser bon de far quel che go prometesto a Geovà.”
Te te senti cossita?
COSSA CHE TE GHÈ IMPARÀ?
Col aiuto de Geovà, te sarè bon de dàrghene fora cole dificoltà par batesarte.
Sito bon de ricordarte?
Sarà che te ocore saver tuto dela Bìblia par batesarte?
Cossa che te ghè de cambiar prima de batesarte?
Parché che no te ghè de assar che la paura te intrighe de batesarte?
VUTO SAVER DE PI?
Parché che te ghè de dessider batesarte?
Varda come che te pol dàrghene fora cole dificoltà par batesarte.
“Cossa che me intriga de esser batesà?” (La Sentinela, marso de 2019)
Varda quel che ga giutà un omo a dàrghene fora cole dificoltà par batesarse.
Un omo de nome Ataa el se tirea indrio de batesarse. Varda cossa che lo ga giutà a esser sicuro che l’era la roba pi importante de far.