Geovà el ne ga giutà a far tute le dessision dela nostra vita

Mi son nassesto nel giorno 19 de maio de 1940, nte Amioûn, nel Lìbano. Pochi ani dopo, semo ndati de star nela cità de Trìpoli. Mi ero el pi gióveno de sinque fradei. Èrino due tosi e tre tose. Son stà slevà nte una fameia felice e améino tanto un al altro. Tuta la fameia la servia a Geovà e le robe pi importante par noantri le era studiar la Bìblia, ndar ale riunion e predicar. Par i me genitori, ciapar soldi no l’era la roba pi importante.

Nela nostra congregassion, ghen’era arquanti fradei che i gavea la speransa de viver nel cielo. Un de lori l’era el fradel Michel Aboud. Lu el gavea imparà la verità in Nova York e l’è stà la prima Testimònia de Geovà a rivar nel Lìbano, nela dècada de 1920. Nela nostra congregassion, el fea el Stùdio de Libro. Me ricordo de una època che le ze rivade due sorele che le gavea fato la Scola de Gileade ala nostra congregassion. Le era le sorele Anne e Gwen Beavor. El fradel Michel el tratea queste sorele con tanto rispeto e el ghe giutea de volentiera. Lore le ze deventade nostre vere amighe. Dopo de arquanti ani, me go catà cola sorela Anne nei Stati Unidi. Son restà tanto contento! E de là un tempo, me go catà anca cola sorela Gwen. Ela la era drio laorar nel Betel de Londres col so omo Wilfred Gooch.

LA PREDICASSION NEL LÌBANO

Quando mi ero gióveno, ghen’era poche Testimònie de Geovà nel Lìbano. Ma féino un bel laoro nela predicassion parché parléino sora la Bìblia con tuti quei che catéino, anca che arquanti lìderi dele religion i ne vegnea contra. Me ricordo tanto ben de arquante robe che le ga sucedesto.

Un giorno, mi e me sorela Sana èrino drio predicar nte un prèdio. Fursi qualchedun el ga avisà el prete che èrino drio predicar e el ga capità là. Lu el ga scominsià a dirghe su ala me sorela, l’è restà cada volta pi cativo e la ga urtà do par le scale. Ela la se ga fato mal. Qualchedun ga ciamà la polìssia. Quando la ze rivada, la ga domandà che qualchedun el giutesse Sana, e i ga portà el prete ala delegassia. Quando i ze rivadi lì, i ga visto che lu el gavea una arma. Alora i ghe ga domandà: “Te insegni le persone sora Dio o te ghe insegni a far robe brute?”

Anca me ricordo de una volta che la nostra congregassion la ga afità un ònibus par noantri ndar predicar nte una cità distante. Semo rivadi là, ma de là un pochetin, l’è rivà el prete e altre persone. Lori i era cativi e i ne ga trato fin sassi. Me pare el se ga fato mal e ghen’era sangue par tuta la so fàcia. Tuti noantri semo tornadi al ònibus e, lì, go visto una roba che mai vao desmentegarme. Intanto che la me mare la netea la fàcia de me pare, la ga dito: “Geovà, perdonali parché lori no i sa cossa che i ze drio far.”

Quando mi gavea sei ani, semo ndati visitar la nostra fameia nela cità ndove son nassesto. Lì, ga sucedesto nantra roba. Quando semo rivadi nela casa del me nono, el vesco l’era là. Lu el savea che i me genitori i era Testimònia de Geovà. Alora questo omo el me ga vardà in fàcia e el me ga domandà: “Ciò, e ti, parché no te sì mia batesà?” Mi ghe go dito: “Parché son massa pìcolo, e mi go de imparar de pi sora la Bìblia e gaver una forte fede.” No ghe ga piasesto, e el ga dito al me nono che mi no gavea creansa.

Ma, posso dir che le ze state ciare volte che robe come queste le ne ga sucedesto nel Lìbano. Quasi tute le persone nel Lìbano le ghe piase de ciacolar con noantri e le ne riceve ben. Gavéino bele ciàcole sora la Bìblia e tante le studiea la Bìblia con noantri.

SEMO NDATI DE STAR IN NANTRO PAESE

Quando mi ancora ndea ala scola, un fradel gióveno dela Venesuela l’è ndato visitar el Lìbano. Lu el ndea ale nostre riunion, e dopo de un tempo, lu e la me sorela Wafa i ga scominsià a smorosar. Lori i se ga maridà e i ze ndati de star nela Venesuela. Ma, a me sorela Wafa ghe manchea tanto la so fameia. Alora, la ga seità scriver al me pare e la ghe domandea che i ndesse de star nela Venesuela. Forsa de dai semo ndati!

Nel ano de 1953, semo ndati de star in Caracas, nela Venesuela. Èrino de star darente del palàssio del presidente. Mi ero tanto gióveno e restea maraveià de veder che i menea el presidente vanti e indrio nte un auto pròpio bel. Ai me genitori ghe fea fadiga arquante robe, par esémpio, el paese, la léngua, la cultura, el magnar e el tempo. Quando no ghe fea pi tanto fadiga queste robe, ne ga sucedesto una bruta roba.

NE GA SUCEDESTO UNA BRUTA DIFICOLTÀ

Me pare sempre el ga bio una bona salute, ma el se ga malà. Noantri no èrino gnanca boni de creder. Mi mai lo gavea visto malà. Dopo, ghemo savesto che el gavea càncaro nel pancreas. Lu el ga fato una operassion, ma dopo de una stimana, lu l’è morto.

Mi no son gnanca bon de catar parole giuste par dir come che se ghemo sentio. Nela època, mi gavea sol 13 ani, e ne parea che no sarìano pi boni de ndar avanti e che mai sarìano felici nantra volta. Par un bel tempo, l’è stà tanto fadiga par me mare. Ma dopo, ghemo visto che ne tochea ndar avanti e, col aiuto de Geovà, semo stati boni de infrontar quel bruto colpo. Mi go finio la scola con 16 ani in Caracas e l’era premoso par laorar e giutar la me fameia.

La me sorela Sana la se ga maridà col fradel Rubén Araujo. Lu el gavea fato la Scola de Gileade e l’era tornà ala Venesuela. Lori i ze ndati de star in Nova York, e la me fameia la ga volesto che mi ndesse de star con lori par studiar nte una università. Lori i me ga giutà a far pi forte la me amicìssia con Geovà. Nantra roba che me ga giutà l’è stà la congregassion dela léngua spagnola del Brooklyn. Là, ghen’era tanti fradei che i servia a Geovà fea tanto tempo. Son restà tanto contento de cognosser i fradei Milton Henshel e Frederick Franz che i laorea nel Betel de Brooklyn.

Quando l’era drio finir el primo ano nela università, go scominsià a pensar in quel che mi ero drio far cola me vita. Mi gavea ledesto arquanti artìcoli dela Sentinela sora doperar la nostra vita par far de pi par Geovà, e seitea a pensar sora questo. Mi vedea che i fradei dela me congregassion che i era pionieri e che i laorea in Betel i era tanto contenti. Mi anca volea sentirme cossita! Ma mi no ero gnancora batesà. Alora, go fato la me dedicassion a Geovà e me go batesà nel giorno 30 de marso de 1957. Questa la ze stata una dele dessision pi importante dela me vita!

GO BIO DE FAR DESSISION TANTO IMPORTANTE

Dopo de far questa dessision tanto importante, mi gavea tanta voia de esser pioniero. Ma mi savea che far questo no saria tanto fàcile parché ancora studiea nela università. Alora, mi, me fradei e me mare seiteino scriver carte par parlarse sora la me voia de fermarme de studiar, tornar ala Venesuela e esser pioniero.

Alora, mi son tornà a Caracas in giugno de 1957. Quando son rivà, go visto che la me fameia la gavea bisogno che mi laoresse par giutarghe casa. Ghen’era laoro nte un banco, ma mi ero tornà aposta par esser pioniero. Alora, go dessidio far le due robe. Par arquanti ani, mi laorea tuto el giorno nel banco e l’era pioniero. In quela època, mi gavea tanto de far, ma ero tanto felice!

Mi son restà ancora pi felice quando go cognossesto una bela sorela dela Alemagna, de nome Sylvia. Ela la amea tanto a Geovà! Ela e la so fameia i ze ndati de star nela Venesuela. Noantri se ghemo maridà e dopo de un tempo, ghemo bio un tosatel de nome Michel (Mike) e una toseta de nome Samira. In quela època, la me mare la ze vegnesta de star con noantri parché la gavea bisogno de aiuto. Alora, par causa de tuto quel che mi gavea de far par la me fameia, no son stà pi bon de seitar a esser pioniero. Ma mi ancora gavea la voia de esser pioniero. Quando podéino, mi e la Sylvia laoréino de pionieri aussiliari.

NANTRA DESSISION IMPORTANTE

Alora, rivemo in quela stòria che go contà nel scomìnsio. In quela època i nostri fioi ancora i ndea ala scola. Noantri gaveino una bela vita con tante robe. Tuti i vedea che mi fea un bel laoro nel banco, ma quel che mi volea de pi l’era che i me vedesse come un servo de Dio. Mi seitea a pensar sora questo. Alora, mi e la me sposa se ghemo fermà par parlar sora come doperar ben nostri soldi. Ghemo visto che, se mi ndesse via del laoro, ciaparia un bel poco de soldi. Noantri no gaveino mia dèbiti e podéino viver con manco robe. Cossita, sarìano boni de viver con questi soldi par un bel tempo.

No l’è stà fàcile far questa dessision, ma la me cara sposa e la me mare le me ga giutà tanto. Cossita, ghemo visto che saria bon de tornar a esser pioniero. Che maraveia! Mi era tanto contento. Sol che pena dopo, ga sucedesto nantra roba che no spetéino e che la cambiaria la nostra vita.

UNA BELA NOTÌSSIA!

Ghemo bio una bela notìssia. El nostro dotor el ga dito che la Sylvia la era drio spetar nantro bambin. Semo restadi tanto contenti. Suito ghemo bio de far i cambiamenti che ne ocorea par tender del nostro fioleto. Ma el laoro de pioniero? Sarà che ancora saria bon de farlo?

Mi e la Sylvia ghemo dessidio far quel che gavéino belche parlà. El nostro fiol, Gabriel, l’è nassesto in april de 1985, me go fermà de laorar nel banco e go scominsià come pioniero regolar in giugno. Dopo de un tempo, son stà convidà par servir nela Comission de Filial de Betel. Ma, come Betel no l’era in Caracas, me tochea far un viaio de 80 chilòmetri due o tre volte par stimana.

LE ROBE LE GA CAMBIÀ NANTRA VOLTA

Dopo, ghemo dessidio ndar de star nela cità La Victoria par star pi darente de Betel. La nostra vita la ga cambià tanto. Ma son tanto contento e anca tanto grato ala me fameia parché i me ga giutà in questa dessision. La me sorela Baha la ga dito che la ndea tender dela nostra mama. Mike l’era belche maridà, ma la Samira e el Gabriel ghe ga tocà assar i so amighi. Anca par Sylvia no l’è stà fàcile. La nova cità la era picinina e quela de vanti la era granda e con tanta gente. E noantri semo ndati via de una casa pi granda par ndar de star nte una casa pi pìcola. Alora, ga cambià tante robe quando semo ndati de star nela cità La Victoria!

Ma, le robe le ga cambià nantra volta! Nostro fiol Gabriel el se ga maridà e nostra fiola Samira la podea ndar de star ela sola. Alora, in 2007, mi e la Sylvia semo stati convidadi par ndar de star in Betel. Semo vegnesti e semo qua fin ancoi. Mike, che l’è el nostro fiol pi vècio, l’è ansiano. Lu e la so sposa, Monica, i laora come pionieri. Gabriel, che l’è maridà cola Ambra, l’è ansiano e lori i ze de star nela Itàlia. E la Samira la ze pioniera e la fà anca laori par Betel dela so casa.

SON PRÒPIO CONTENTO COLE ME DESSISION

Mi go bio de far tante dessision nela me vita e son contento con tute. Se fusse tornar indrio nel tempo, ndaria scòlier far tuto compagno. Son tanto contento con tuti i laori che go fato par Geovà. Go imparà che l’è tanto importante gaver sempre una forte amicìssia con lu. Go anca imparà che sempre che ghemo de dessider qualcossa, Geovà el ne dà la pace che la ze pi granda de quel che semo boni de capir. (Fil. 4:6, 7) Mi e la Sylvia semo tanto contenti de laorar in Betel. Noantri semo sicuri che Geovà el ne ga benedio e el ne ga giutà a far tute le dessision dela nostra vita.