STÙDIO 44
Fà pi forte la to speransa par el futuro!
“Speta in Geovà.” — SAL. 27:14.
CÀNTICO 144 Proa imaginar quel che Dio el farà
COSSA CHE NDAREMO IMPARAR?a
1. Che speransa Geovà el ne ga dato?
GEOVÀ el ne ga dato la bela speransa de vita eterna. Arquanti i ga la speransa de viver par sempre nel cielo. (1 Cor. 15:50, 53) Ma, quasi tute le persone le ga la speransa de viver par sempre nela Tera con alegria e bona salute. (Apo. 21:3, 4) Sicuro che tuti noantri ghe demo tanto valor ala nostra speransa.
2. Parché che semo sicuri che quel che credemo ndarà suceder?
2 Nela Bìblia, la parola “speransa” la vol dir spetar che robe bone le ndarà suceder. Noantri semo sicuri che quel che spetemo ndarà suceder parché l’è stà Geovà che el ga prometesto, e savemo che lu sempre el fà quel che el promete. (Rom. 15:13; Nùm. 23:19) Noantri savemo che Geovà el vol e el pol far tuto quel che el ga prometesto. Questa speransa no la ze sol robe dela nostra testa o qualcossa che volemo che suceda. Invesse, credemo in quel che Geovà el ne promete parché savemo che l’è vera.
3. Cossa che ndaremo imparar in questo stùdio? (Salmo 27:14)
3 Nostro Pare Geovà el ne vol ben e el vol che se fidemo in lu. (Ledi Salmo 27:14.b) Quando se fidemo in Geovà e ghemo una forte speransa, semo pi contenti e ghemo coraio, anca quando infrontemo dificoltà. In questo stùdio, ndaremo imparar come la nostra speransa la pol protegerne. Dopo, ndaremo veder parché che la speransa la ze come una àncora e un capassete, e come che podemo farla ancora pi forte.
LA NOSTRA SPERANSA LA ZE COME UNA ÀNCORA
4. Parché che la speransa la ze come una àncora? (Ebrei 6:19)
4 Nela so carta ai ebrei, Paolo el ga dito che la nostra speransa la ze come una àncora. (Ledi Ebrei 6:19.c) Paolo el viaiea tanto de barca e el savea che una barca la gavea bisogno de una àncora par tegnerse firme in meso el mar. Par esémpio, nte un colpo ga scominsià una bruta tempesta nel mar, e lu el ga visto come le persone le ga molà le àncore vanti che la imbarcassion la ndesse contra i sassi. (Ati 27:29, 39-41) La nostra speransa la ze come una àncora parché la ne giuta a infrontar brute tempeste dela nostra vita. Come cossita? La nostra speransa la ne giuta a seitar darente de Geovà e a restar calmi parché savemo che suito le dificoltà le ndarà finirse. E Gesù el ga dito che i nemighi ne vegnaria contra. (Gioani 15:20) Alora, pensarghe sora la bela speransa che ghemo par el futuro ne giuta a seitar leai a Geovà.
5. Parché che la speransa la ghe ga dato forsa a Gesù?
5 La speransa la ga dato forsa anca par Gesù. Lu el ga seità leal ancora che el savesse che ndaria sofrir tanto e che el ndaria morir. El apòstolo Piero el ga parlà de una professia dei Salmi che la mostra che Gesù el restaria calmo e el gavaria coraio. Questa professia la dise: ‘Mi vao viver con speransa parché no te vè assarme nel Sepolcro. No te vè assar che quel che l’è leal a ti cognossa la tomba. Ti te me fè restar tanto contento davanti de ti.’ (Ati 2:25-28; Sal. 16:8-11) La speransa la ghe ga dato forsa a Gesù parché el savea che Geovà el ndaria ressussitarlo e lu el saria nantra volta insieme a so Pare nel cielo. — Ebr. 12:2, 3.
6. Cossa che el fradel Leonard el ga dito sora la so speransa?
6 La nostra speransa anca la ze drio giutar tanti fradei. Varda quel che ga sucedesto col fradel Leonard Chinn, che el vivea nela Inglatera. Nela Prima Guera Mondial, lu l’è stà metesto in preson parché no’l volea ndar ala guera. Lu l’è stà metesto lu sol nte un posto pròpio pìcolo e l’è restà là par due mesi. Dopo de questo lu el ga bio de laorar tanto nela preson. Lu el ga dito: “Go imparà che l’è tanto importante gaver speransa par esser boni de perseverar. Quando studiemo le bele promesse dela Bìblia, el esémpio de Gesù, dei apòstoli e dei profeti, ghemo pi forsa par perseverar e femo ancora pi forte la nostra speransa.” Alora, la speransa la ze stata come una àncora par el fradel Leonard, e la pol esser anca par noantri.
7. Parché che le dificoltà le fà pi forte la nostra speransa par el futuro? (Romani 5:3-5; Tiago 1:12)
7 Nostra speransa la resta ancora pi forte quando vedemo che Geovà l’è drio giutarne a darghene fora cole nostre dificoltà e che lu l’è contento con noantri. (Ledi Romani 5:3-5d; Tiago 1:12.e) Alora, l’è sicuro che la nostra speransa la ze pi forte adesso de quando ghemo imparà la verità dela Bìblia. Anca se Sàtana el vol che restemo desanimadi cole dificoltà, semo boni de perseverar col aiuto de Geovà.
LA NOSTRA SPERANSA LA ZE COME UN CAPASSETE
8. Parché che la nostra speransa la ze come un capassete? (1 Tessalonissensi 5:8)
8 La Bìblia anca la dise che la speransa la ze come un capassete. (Ledi 1 Tessalonissensi 5:8.f) Un capassete el protege la testa de un soldà nte una guera. La nostra speransa la ze come un capassete parché la protege i nostri pensamenti, o sia, la ne giuta a pensar in quel che l’è giusto e nò in quel che l’è sbalià. Ghemo pròpio bisogno de proteger la nostra mente contra Sàtana parché lu el seita proar farne pensar in robe sbaliade.
9. Cossa che le persone sensa speransa le fà?
9 Ghemo de seitar a far cada volta pi forte la nostra speransa par el futuro. Parché? Parché se la nostra speransa la resta pi fiaca, scominsiaremo a pensar e a far le robe compagno ale persone del mondo. Alora, ndaremo desmentegarse dela nostra speransa de vita eterna. L’è stà questo che ga sucedesto con arquanti fradei de Corinto. Lori no i credea pi nela speransa dela ressuression, e Paolo el ga dito che persone cossita sol le vive par far quel che lore le vol. (1 Cor. 15:12, 32) Ancoi ghen’è tante persone che no le crede nele promesse de Dio e le vive sol par ndar drio ale so voie sensa pensar nel futuro. Ma noantri semo difarenti de lore. Semo sicuri che Geovà el farà quel che el ga prometesto e questa speransa la ne giuta a far bone dessision nela vita ancoi. Alora, la speransa la ze come un capassete che la protege i nostri pensamenti e la ne giuta a no pensar sol in noantri. Cossita, semo boni de gaver una bela amicìssia con Geovà. — 1 Cor. 15:33, 34.
10. Parché che la nostra speransa la ne protege dele busie de Sàtana?
10 La nostra speransa anca la protege i nostri pensamenti parché, se ghemo una forte speransa, no ndaremo pensar che no saremo mai boni de contentar a Geovà. Arquanti i pol pensar: ‘Mi mai vao esser bon de far tuto polito e no mèrito viver par sempre. No sarò mai bon de contentar a Dio.’ Ma ricòrdate che l’è stà Elifaz, el falso amigo de Giò, che el ga parlà robe cossita. Lu el ga dito: ‘Come che un poro omo el pol esser puro? Varda, Dio no’l se fida nei so santi e gnanca el cielo l’è puro par lu.’ (Giò 15:14, 15) Questa la ze pròpio una bruta de una busia! Sàtana el vol che pensemo cossita parché lu el sa che la nostra speransa la restarà pi fiaca. Alora, no stà mai pensar in queste busie e ricòrdate sempre dele bele promesse de Geovà. Te pol esser sicuro che Geovà el vol che te viva par sempre e che el ndarà giutarte a far questo. — 1 Tim. 2:3, 4.
FÀ PI FORTE LA TO SPERANSA
11. De cossa ghemo de ricordarse intanto che spetemo che Geovà el fae quel che el ga prometesto?
11 Pol esser fadiga seitar a gaver una forte speransa parché fursi restemo stufi de spetar che Geovà el fae quel che el ga prometesto. Ma ghemo de ricordarse che tanto tempo par noantri l’è poco par Geovà, parché lu el ga sempre vivesto e sempre el ndarà viver. (2 Pie. 3:8, 9) E ghemo anca de ricordarse che lu el farà quel che el ga prometesto dela meio maniera, ma che fursi no sarà come noantri volemo. Alora, cossa pol giutarne a seitar a gaver una speransa forte par el futuro? — Tia. 5:7, 8.
12. Cossa che Ebrei 11:1, 6 ne insegna sora la nostra fede e la nostra speransa?
12 La Bìblia la mostra che se ghemo forte fede che Geovà “el ricompensa quei che i fà sforso par ndar in serca de lu”, la nostra speransa anca la sarà forte. (Ledi Ebrei 11:1,g 6.h) Alora, se ghemo una forte fede in Geovà, saremo sicuri che lu el ndarà far quel che el ga prometesto. Se seitemo a far cada volta pi forte la nostra amicìssia con lu, anca la nostra speransa la sarà cada volta pi forte. Adesso, ndaremo imparar come che podemo far questo.
Se preghemo a Geovà e ghe pensemo sora, la nostra speransa la sarà forte (Vedi i paràgrafi 13 a 15.)i
13. Come che podemo esser amighi de Geovà?
13 Prega a Geovà e ledi la Bìblia. Anca che no podemo veder a Geovà, podemo esser so amighi. Noantri parlemo con Dio quando preghemo a lu, e lu el ne scolta. (Ger. 29:11, 12) E Geovà el parla con noantri quando ledemo la Bìblia. Se ledemo sora come lu el ga tendesto dei so servi del passà e ghe pensemo sora, la nostra speransa la resta pi forte. Semo sicuri che tuto quel che ghen’è nela Bìblia “l’è stà scrito par insegnarne, cossita par meso dela perseveransa e del consolo dele Scriture noantri ghemo speransa”. — Rom. 15:4.
14. Parché che l’è bon pensarghe sora quel che Geovà el ga belche fato?
14 Pensaghe sora quel che Geovà el ga dito che ndaria far e el ga belche fato. Varda quel che ga sucedesto con Abraon e Sara. Dio el ga prometesto che lori i gavaria un fiol ancora che i fusse massa veci. Abraon l’era sicuro che Dio el ndaria far quel che el gavea prometesto. Abraon el ga bio ‘fede che el deventaria pare de tante nassion’. (Rom. 4:18) Fursi ghe parea che quela roba mai la ndaria suceder, ma la so fede no la ze stata par gnente. Pensarghe sora esempi come questi mostra che, anca se ne par che una roba mai la podaria suceder, Geovà sempre el fà quel che el promete.
15. Parché che te ocore pensarghe sora quel che Geovà el ga belche fato par ti?
15 Pensaghe sora quel che Geovà el ga belche fato par ti. Se te ghe pensi sora quel che Geovà el ga belche fato par ti, te gavarè una forte speransa che lu anca el ndarà far quel che el ga prometesto par el futuro. Par esémpio, Gesù el ga prometesto che Geovà el te darà quel che te ocore par viver. (Mat. 6:32, 33) Gesù anca el ga dito che Dio el ndarà darte spìrito santo sempre che te ghe domandi. (Luc. 11:13) E Geovà el promete perdonarte, consolarte e giutarte a seitar a esser so amigo. (Mat. 6:14; 24:45; 2 Cor. 1:3) Sicuro che ti te sì bon de ricordarte de altre robe che Geovà el ga belche fato par ti.
RESTA CONTENTO COLA SPERANSA CHE TE GHÈ
16. Parché che la nostra speransa la ze un bel presente?
16 La speransa de viver par sempre la ze un bel presente che Geovà el ne ga dato. Semo premosi de veder questo bel futuro e semo sicuri che la nostra speransa la ndarà realisarse. La nostra speransa la ze come una àncora parché la ne giuta a esser boni de infrontar le dificoltà, la perseghission e fin la morte. La nostra speransa la ze anca come un capassete parché la protege i nostri pensamenti, o sia, la ne giuta a no pensar in quel che l’è sbalià e a far quel che l’è giusto. Quando ledemo sora questa speransa nela Bìblia, cognossemo meio a Dio e vedemo che lu el ne ama tanto. Se la nostra speransa la ze forte, gavaremo pròpio tante benedission nela nostra vita!
17. Parché che la speransa la ne giuta a restar contenti?
17 Paolo el ga dito ai romani: “Resté contenti cola speransa.” (Rom. 12:12) Paolo el restea contento parché l’era sicuro che, se el seitesse leal, el ndaria viver par sempre nel cielo. Anca noantri podemo restar contenti cola nostra speransa parché semo sicuri che Geovà el ndarà far quel che el ga prometesto. L’è come el salmista el ga scrito: ‘Felice l’è el omo che ga speransa in Geovà, so Dio, quel che l’è sempre leal.’ — Sal. 146:5, 6.
CÀNTICO 140 La vita eterna la ze rivada!
a Geovà el ne dà una bela speransa par el futuro. Questa speransa la ne dà coraio e la ne giuta a no pensar sol nei problemi che ghemo adesso. Questa speransa la ne dà forsa par seitar leai a Geovà anca cole nostre dificoltà e la ne giuta a seitar pensar dela maniera giusta. In questo stùdio, vederemo parché l’è importante seitar a gaver una forte speransa.
b (Salmo 27:14) Speta in Geovà. Sìpia coraioso e forte de cuor. Si, speta in Geovà.
c (Ebrei 6:19) Ghemo questa speransa sicura e firme che la ze come una àncora par la ànima, e la va rento fin al posto par de drio dela coltrina,
d (Romani 5:3-5) Nò sol questo, ma gavemo alegria anca quando passemo par sofrimenti, parché savemo che el sofrimento el ne fà gaver perseveransa. 4 La perseveransa la ne fà gaver una condission aprovada. La condission aprovada la ne fà gaver speransa. 5 E la speransa no la ne assa disgustà. Parché el amor de Dio l’è stà spandesto nel nostro cuor par meso del spìrito santo, che l’è stà dato a noantri.
e (Tiago 1:12) Felice l’è quel che el seita a far quel che l’è giusto anca cole dificoltà. Parché quando Dio lo aprova, el riceverà la corona dela vita che Geovà el ga prometesto darla a quei che i seita a amarlo.
f (1 Tessalonissensi 5:8) Ma noantri, che semo del giorno, ghemo de restar atenti e meter su la corassa dela fede e del amor e el capassete dela speransa dela salvassion.
g (Ebrei 11:1) La fede la ze la forte confiansa de che se realisarà quel che se speta. La ze la prova sicura che le robe le ze vere anca se no se le vede.
h (Ebrei 11:6) Sensa fede no se pol contentar a Dio. Parché quei che i riva darente de lu i ga de creder che lu el esiste e che el ricompensa quei che i fà sforso par ndar in serca de lu.
i ILUSTRASSION Pàgina 27: Un capassete el protege la testa de un soldà nte una guera. La nostra speransa la ze come un capassete parché la protege i nostri pensamenti, o sia, la ne giuta a pensar in quel che l’è giusto e nò in quel che l’è sbalià. Cossita come una àncora la tien una barca firme nte una tempesta, la nostra speransa la ne giuta a infrontar le dificoltà. Una sorela la ze drio pregar a Geovà. Un fradel l’è drio pensarghe sora come Geovà el ga fato tuto quel che el ga prometesto a Abraon. Nantro fradel l’è drio pensarghe sora le benedission che el ga.