STÙDIO 49
Ti te pol viver par sempre
“El don dato par Dio l’è la vita eterna.” — ROM. 6:23.
CÀNTICO 147 Dio el promete vita eterna
COSSA CHE NDAREMO IMPARAR?a
1. Cossa che va suceder se ghe pensemo sora la speransa de vita eterna?
GEOVÀ el promete dar la “vita eterna” a quei che ghe obedisse. (Rom. 6:23) El nostro amor par Geovà el resta ancora pi forte quando ghe pensemo sora la bela speransa che lu el ne dà. Imagina sol: Dio el ne ama tanto che el vol che semo so amighi par sempre!
2. Come che la speransa de viver par sempre la ne giuta?
2 La promessa de vita eterna la ne giuta a infrontar qualche dificoltà che vegna fora adesso. Par esémpio, anca se i nemighi i dise che i va coparne, no ndaremo fermarse de servir a Geovà. Parché? Parché Geovà el ndarà ressussitar quei che i ze stati leai fin la morte e el ghe darà la speransa de mai pi morir. (Gioani 5:28, 29; 1 Cor. 15:55-58; Ebr. 2:15) Parché che podemo esser sicuri che podaremo viver par sempre? Ndaremo imparar adesso.
GEOVÀ EL VIVE PAR SEMPRE
3. Come che savemo che Geovà el pol farne viver par sempre? (Salmo 102:12, 24, 27)
3 Ledi Salmo 102:12,b 24,c 27.d Noantri savemo che Geovà el pol farne viver par sempre parché lu l’è la fonte dela vita e lu el vive par sempre. (Sal. 36:9) Ghen’è tanti testi dela Bìblia che i mostra che Geovà el ga sempre esistio e che mai el ndarà morir. Par esémpio, Salmo 90:2 el mostra che Geovà el esiste de sempre e par sempre. E anca el Salmo 102 el dise questo. Anca el profeta Abacuche el ga scrito che Geovà l’è el Dio dela eternità e che lu mai el morirà. — Aba. 1:12.
4. Sarà che ne ocore preocuparse se no semo boni de capir che Geovà el ga sempre esistio? Spiega.
4 Par ti, elo fadiga capir la idea che Geovà el ga sempre vivesto? (Isa. 40:28) Se te pensi cossita, no stà preocuparte parché tanti i ghe fà fadiga capir questa verità. Eliù el ga dito che noantri ‘no semo boni de capir quanti ani Dio el ga’. (Giò 36:26) Magari, se no semo boni de capir qualcossa, questo no vol mia dir che sìpia una busia. Par esémpio, fursi noantri no capimo polito come laora la luce che impissemo rento casa. Ma ancora cossita, savemo che la esiste e la doperemo. Dela medèsima maniera, anca se no semo boni capir che Geovà el ga sempre esistio e che mai el ndarà morir, questa la ze una verità. (Rom. 11:33-36) L’è stà Geovà che el ga creà la Tera, el cielo, el Sol e altre stele. Alora, Geovà belche el vivea vanti de crear el Universo. (Ger. 51:15; Ati 17:24) Cossa ancora ne assa sicuri che podemo viver par sempre?
GEOVÀ EL NE GA FATO PAR VIVER PAR SEMPRE
5. Che speransa Adon e Eva i gavea?
5 Geovà el ne ga creà par viver par sempre, difarente dele bèstie e dele piante. Ancora cossita, Geovà el gavea dito a Adon: “El fruto dela pianta dela cognossensa del ben e del mal, no stà mia magnarlo, parché ntel giorno che te lo magni, sicuro che te ndarè morir.” (Gén. 2:17) Adon e Eva i podaria viver par sempre, ma ghe tochea obedir a Geovà. Se i fusse stati obedienti, pol esser che un giorno Geovà li assaria magnar del fruto dela ‘pianta dela vita’. Cossita, lori i ‘viveria par sempre’.e — Gén. 3:22
6-7. (a) Parché che savemo che le persone no le ze state fate par morir? (b) Cossa che ti te vol far nel novo mondo? (Vedi la ilustrassion.)
6 Ancoi, le persone le vive sol intorno de 70 a 80 ani. Ma i studiosi i ga catà prove che el nostro sarvel el gavaria capassità de laorar tanti ani de pi. Par esémpio, nel ano de 2010, un giornal dei Stati Unidi el ga dito che el nostro sarvel l’è bon de meter via tanta informassion fà 3 milioni de ore de vìdeo, e ghe meteria de pi de 300 ani par vardarlo. Ma, pol esser che el nostro sarvel el sìpia bon de meter via ancora de pi. Cossita, vedemo che Geovà el ga fato el nostro sarvel par imparar tanto de pi de quel che imparemo in 70 o 80 ani. — Sal. 90:10.
7 La Bìblia la dise che, quando Geovà el ne ga fato, lu el ne ga dato la “voia de viver par sempre”. (Ecl. 3:11) L’è par quela che vedemo la morte come un nemigo. (1 Cor. 15:26) Metemo dir che te ghè una malatia che la pol coparte. Rèstito casa e no te fè pi gnente invesse de ndar al dotor? Sicuro che te vè in serca de aiuto, parché nissuni de noantri vol morir. E quando more qualchedun che l’è caro par noantri, sìpia gióveno o vècio, restemo tanto disgustadi. (Gioani 11:32, 33) El nostro Creador el ne ama tanto. Alora, lu no’l ndaria farne cola voia de viver par sempre se el volesse che vivessino par poco tempo, mia vera? Adesso, ndemo veder cossa che Geovà el ga belche fato e cossa l’è drio far che mostra che lu ancora el vol che vivemo par sempre.
L’è tanto bel pensarghe sora come la sarà la nostra vita quando viveremo par sempre (Vedi el paràgrafo 7.)j
GEOVÀ ANCORA EL VOL CHE VIVEMO PAR SEMPRE
8. Cossa che Isaia 55:11 ne insegna sora Geovà?
8 Par causa del pecato de Adon e Eva, tute le persone le more. Ma, Geovà no’l ga mia cambià quel che el gavea in mente par noantri. (Ledi Isaia 55:11.f) Lu ancora el vol che vivemo par sempre. Semo sicuri de questo par causa de quel che Geovà el ga dito e el ga fato par darne questa bela speransa.
9. Cossa che Geovà el ga prometesto? (Daniel 12:2, 13)
9 Geovà el ga prometesto che i morti i sarà ressussitadi e i podarà viver par sempre. (Ati 24:15; Tito 1:1, 2) Giò, che l’era un servo fedele de Dio, l’era sicuro che Geovà l’è premoso de ressussitar quei che i ze morti. (Giò 14:14, 15) Anca el profeta Daniel el savea che le persone le podaria esser ressussitade par viver par sempre. (Sal. 37:29; Ledi Daniel 12:2,g 13.h) I giudei dei giorni de Gesù i savea che Geovà el pol dar la vita eterna ai so servi fedeli. (Luc. 10:25; 18:18) Anca Gesù el ga parlà diverse volte sora questa promessa, e lu l’è stà ressussità par so Pare. — Mat. 19:29; 22:31, 32; Luc. 18:30; Gioani 11:25.
De cossa che la ressuression che Elia el ga fato la ne assa sicuri? (Vedi el paràgrafo 10.)
10. Cossa che le ressuression del passà le prova? (Vedi la ilustrassion.)
10 La vita la vien de Geovà e lu el pol far le persone viver nantra volta. Le ressuression che le ga sucedesto nel passà le prova questo. Par esémpio, lu el ga dato poder al profeta Elia par ressussitar el fiol dela védova de Sarefà. (1 Rè 17:21-23) Un tempo dopo, Geovà el ga dato poder a Eliseo par ressussitar el fiol de una dona de Sunèn. (2 Rè 4:18-20, 34-37) Quando l’era qua nela Tera, anca Gesù el ga ressussità i morti col poder che Dio el ghe gavea dato. (Gioani 11:23-25, 43, 44) Ancoi, Gesù l’è nel cielo, e Dio el ghe ga dato “autorità sora tute le robe, nel cielo e nela tera”. (Mat. 28:18) Par quela, lu el sarà bon de ressussitar tuti quei che i ze morti e darghe la speransa de viver par sempre. — Gioani 5:25-29.
11. Parché che el sacrifìssio de Gesù l’è importante par noantri?
11 Parché che Geovà el ga assà el so caro Fiol sofrir tanto e morir? Gesù el ga dito: “Dio el ga amà tanto el mondo, che el ga dato el so ùnico Fiol, cossita tuti quei che i dimostra fede in lu no i sìpia destruti, ma i possa viver par sempre.” (Gioani 3:16) Alora, Geovà el pol perdonar i nostri pecati e darne la vita eterna par causa del sacrifìssio de Gesù. (Mat. 20:28) El apòstolo Paolo el ga spiegà parché che el sacrifìssio de Gesù l’è stà tanto importante. Lu el ga scrito: “Cossita come la morte la ze vegnesta par meso de un omo, anca la ressuression dei morti la vien par meso de un omo. Cossita, par causa de Adon tuti i more ma par causa de Cristo tuti i riceverà la vita.” — 1 Cor. 15:21, 22.
12. Come che Geovà el ndarà far la so volontà?
12 Gesù el ga insegnà i so dissìpoli a pregar che vegna el Regno de Dio e che la volontà de Dio la sìpia fata nela Tera. (Mat. 6:9, 10) Una dele robe che Geovà el vol far la ze dar ale persone la vita eterna. Par quela, lu el ga scoliesto Gesù par esser rè del Regno de Dio. Geovà anca l’è drio scòlier 144 mila persone che le ndarà laorar insieme de Gesù. — Apo. 5:9, 10.
13. (a) Cossa che Geovà l’è drio far adesso? (b) Cossa che i servi de Dio i ze drio far?
13 Ancoi, Geovà l’è in serca de persone che le vol imparar sora lu e l’è drio insegnarghe come viver soto el so Regno. (Apo. 7:9, 10; Tia. 2:8) Tanti ancoi no i vive in union par causa del òdio e dele guere. Ma, i servi de Dio i se sforsa par mostrar amor a tuti e viver in pace, come se i fusse drio ‘far dele so spade làmine de arado’. (Mic. 4:3) Invesse de ndar ala guera, lori i giuta altri a cognosser a Geovà e la so volontà. Cossita, lori i giuta queste persone a gaver “la vera vita”. (1 Tim. 6:19) Come i servi de Dio i difende el so Regno, pol esser che ghe manche soldi o che le so fameie ghe vae contra. Ma Geovà sempre el ghe dà quel che i ga de bisogno. (Mat. 6:25, 30-33; Luc. 18:29, 30) Alora, semo sicuri che el Regno de Dio l’è belche drio governar e el seitarà a far la volontà de Geovà.
EL NOSTRO FUTURO EL SARÀ TANTO BEL
14-15. Come che Geovà el finirà cola morte par sempre?
14 Nel ano 1914, Gesù el ga scominsià a governar nel Regno de Dio e, de là in qua, lu l’è drio ndar contra i so nemighi. (Sal. 110:1, 2) Ancoi, Gesù l’è Rè nel cielo e l’è pronto par far quel che Geovà el ga prometesto. (2 Cor. 1:20) Suito, lu e i 144 mila i ndarà finir fora con tute le persone rugne che ghen’è. — Apo. 6:2.
15 Nel Governo de Mila Ani de Cristo, i morti i sarà ressussitadi e tuti quei che i ze obedienti i deventarà perfeti. Dopo del giulgamento che sucederà nel fin dei mila ani, quei che i ze “giusti i sarà paroni dela tera e i viverà par sempre ntela tera”. (Sal. 37:10, 11, 29) Sarà pròpio bel quando Geovà el finirà fora col nostro “ùltimo nemigo”, la morte. — 1 Cor. 15:26.
16. Parché che volemo seitar leai a Geovà?
16 Come ghemo visto, la nostra speransa de viver par sempre la vien dela Bìblia. Par quela, podemo esser sicuri che la ndarà suceder pròpio. Questa speransa la ne giuta a seitar leai in questi bruti ùltimi giorni. Ma, no ghemo de contentar a Geovà sol parché volemo viver par sempre. Invesse, volemo seitar leai a Geovà e a Gesù parché li amemo pròpio tanto. (2 Cor. 5:14, 15) Questo amor ne motivarà a far compagno le so bele qualità e a far el nostro meio nela predicassion. (Rom. 10:13-15) Ghemo de imparar a giutar i altri, invesse de sol pensar in noantri stessi. Cossita, Geovà el volerà esser nostro amigo par sempre. — Ebr. 13:16.
17. Cossa che te ghè de far? (Mateo 7:13, 14)
17 Sarà che te sarè intrà de quei che i viverà par sempre? Geovà el ga belche fato tuto quel che ghe ocorea par darte questa speransa. Adesso, toca a ti far quel che ghe vol par restar nela strada che la mena ala vita. (Ledi Mateo 7:13, 14.i) Ma, come che sarà viver par sempre in Paradiso? Nel pròssimo stùdio, ndaremo imparar sora questo.
CÀNTICO 141 La vita, un presente de Geovà
a Sito premoso de viver par sempre? Geovà el ga prometesto che un giorno podaremo viver sensa paura de morir. In questo stùdio, ndaremo veder parché podemo esser sicuri che Geovà el ndarà far quel che el ga prometesto.
b (Salmo 102:12) Ma ti, ò Geovà, te vivi par sempre, e el to nome el sarà ricordà par tute le generassion
c (Salmo 102:24) Mi go dito: “Ò me Dio, ti che te vivi par sempre, no stà finirme fora intanto che son ancora gióveno.
d (Salmo 102:27) Ma ti te sì sempre el medèsimo, e i to ani no i ndarà mai finirse.
e Vedi el quadro “Cossa che vol dir ‘par sempre’ nela Bìblia?”
f (Isaia 55:11) Cossita la sarà la me parola che la vien fora dela me boca. Ela no la tornarà a mi sensa resultadi, ma sicuro che la realisarà quel che mi vui, e sicuro che la farà quel che mi go mandà far.
g (Daniel 12:2) E tanti de quei che i dorme soto tera i se desmissiarà. Arquanti i ndarà ricever la vita eterna, ma altri i sarà invergognadi e assadi de banda par sempre.
h (Daniel 12:13) Ma ti, seita fin al fin. Te ndarè riposar, ma ntel fin dei giorni te ndarè levar su par ricever la to parte.
i (Mateo 7:13, 14) “Ndé rento la porta streta, parché granda la ze la porta e larga la ze la strada che la mena ala destrussion, e tanti i ze quei che i va rento.14 Invesse che pìcola la ze la porta e streta la ze la strada che la mena ala vita, e pochi i ze quei che i la cata.
j RITRATO: Un fradel pi vècio el pensa sora come sarà la so vita in Paradiso.