Domande dei Letori

Parché che Giusepe e Maria i ze restadi in Belen invesse de tornar casa in Nasarè dopo che Gesù l’è nassesto?

La Bìblia no la dise, ma la spiega arquante robe che le pol giutarne a capir parché che lori i ze restadi in Belen.

Par esémpio, quando un àngelo el ga dito a Maria che la gavaria un fiol, ela e Giusepe i era drio viver in Nasarè, la cità ndove Giusepe l’era nassesto. (Luc. 1:26-31; 2:4) Pi tardi, quando lori i ze tornadi del Egito, i ze ndati a Nasarè e l’è stà lì che Gesù l’è stà slevà. Par quela che lu l’era ciamà de nasareno, e quando pensemo in Nasarè, se ricordemo de Gesù, Giusepe e Maria. — Mat. 2:19-23

Maria la gavea una parente de nome Elisabete che la era de star in Giudà. So omo de Elisabete l’era un sasserdote de nome Zacaria e so fiol l’era Gioani, el Batesador. (Luc. 1:5, 9, 13, 36) Maria la ga visità Elisabete e la ze restada tre mesi nela so casa in Giudà. Ma dopo, la ze tornada a Nasarè. (Luc. 1:39, 40, 56) Alora, Maria la cognossea Giudà.

Quando el governo el ga mandà che tuti i se registresse ndove i era nassesti, Giusepe el ghe tochea ndar de Nasarè fin Belen. Cossita, lori i ze ndati ala ‘cità de Davi’, ndove la professia la disea che el Messia el saria nassesto. (Luc. 2:3, 4; 1 Sam. 17:15; 20:6; Mic. 5:2) Alora, Gesù l’è nassesto in Belen. Come Maria la gavea pena guadagnà el bambin, no i ga volesto viaiar fin Gerusalen. Magari, Belen la era distante de Gerusalen intorno de 9 chilòmetri. Par quela, l’è stà pi fàcile ndar al témpio far un sacrifìssio par causa de so fiol che l’era pena nassesto. — Lev. 12:2, 6-8; Luc. 2:22-24.

El àngelo de Dio anca el ga dito a Maria che so fiol ‘el saria un rè’ e che ‘ghe saria dato el trono de Davi’. Par quela, fursi Giusepe e Maria i ga pensà che l’è stà bon che Gesù l’è nassesto nela cità de Davi e che saria meio restar lì fin che Geovà el ghe disesse cossa far. — Luc. 1:32, 33; 2:11, 17.

No savemo mia quanto tempo fea che Giusepe e Maria i era de star in Belen quando i astròloghi li ga visitadi. Ma, lori belche i gavea un posto de star e Gesù l’era belche un “toseto” e nò un bambin pena nassesto. (Mat. 2:11) Alora, invesse de tornar a Nasarè, pol esser che so fameia de Gesù la ze restada un bon tempo in Belen.

Dopo, Erode el ga mandà copar ‘tuti i tosatei de Belen che i gavesse due ani o manco’. (Mat. 2:16) Alora, un àngelo el ga avisà Giusepe che lori i gavea de scampar via par el Egito e restar lì fin che Erode el morisse. Magari, dopo, lori i ze ndati a Nasarè. Parché? Parché un àngelo el gavea avisà a Giusepe che saria pericoloso se i tornesse a Belen e parché el governante dela Giudea in quela època l’era Archelau, el fiol de Erode e un omo pròpio rugno. Par quela, Giusepe e Maria i ze ndati a Nasarè par slevar su Gesù nte un posto pi sicuro. — Mat. 2:19-22; 13:55; Luc. 2:39, 52.

Noantri credemo che quando Giusepe l’è morto, Gesù l’era ancora vivo. E come le persone sol le ze state scolieste par ndar al cielo dopo dela morte de Gesù, Giusepe sarà ressussità par viver nela Tera. Cossita, tanti i podarà cognosserlo e saver arquante robe, come par esémpio, parché che lu e Maria i ze restadi in Belen dopo che Gesù l’è nassesto.