Cossa che imparemo dela professia de Giacò? — Parte 1

1-2. Cossa che Giacò el ga fato vanti dela so morte, e parché? (Varda anca la ilustrassion.)

GIACÒ l’era un servo fedele de Geovà e l’era belche vècio quando l’è ndato de Canaan fin el Egito con tuta la so fameia. (Gén. 47:28) Lu el ga bio tanta alegria de veder so fiol Giusepe e tuta la so fameia insieme nantra volta. Dopo 17 ani, lu el savea che presto el ndaria morir. Alora, lu el ga ciamà tuti i so fioi par dirghe robe tanto importante. — Gén. 49:28.

² In quela època, quando un paron de fameia l’era darente dela so morte, lu el disea quel che la gavaria de far de lì avanti. (Isa. 38:1) Pol esser che lu anca el scoliesse chi che saria el pròssimo paron dela fameia.

3. De acordo con Génesi 49:1, 2, parché quel che Giacò el ga dito l’è stà tanto importante?

³ Ledi Génesi 49:1, 2.a Come Giacò l’era un profeta, quel che lu el ga dito ai so fioi l’è stà tanto importante. Col aiuto de Geovà, Giacò el ga fato una professia quando el ga dito cossa che sucederia con cada un dei so fioi e cole so fameie.

4. Cossa che Giacò el ga dito, e cossa che podemo imparar dele so parole? (Varda anca el quadro “La fameia de Giacò”.)

⁴ Vanti de morir, Giacò el ga parlà de quel che ndaria suceder coi so fioi e coi so dissendenti, che pi tardi i deventaria la nassion de Israel. In questo stùdio, ndaremo veder quel che Giacò el ga dito a Ruben, Simeon, Levi e Giudà. Nel pròssimo stùdio, ndaremo veder quel che el ga dito ai so altri oto fioi. Imparar sora la stòria dei fioi de Giacò e dei so dissendenti ne giutarà a veder che quel che lu el ga parlà ga pròpio sucedesto. Anca ndaremo imparar quel che ghemo de far par contentar a Geovà.

RUBEN

5. Cossa che fursi Ruben el pensea che el riceveria?

⁵ Giacò el ga dito a Ruben: “Te sì el me primo fiol.” (Gén. 49:3) Alora, pol esser che Ruben el pensea che el riceveria una eransa pi granda che i so fradei. Fursi lu anca el pensea che el deventaria el paron dela fameia dopo dela morte del so pare, e che el passaria questa autorità ai so dissendenti.

6. De acordo con Génesi 49:3, 4, parché che Ruben el ga perso la eransa del primo fiol?

⁶ Ma, Ruben no’l ga mia ricevesto la eransa del primo fiol. (1 Cró. 5:1) Parché? Un per de ani indrio, lu el ga bio relassion sessuai con Bila, una dele done de Giacò. Ela la era serva de Rachel, la cara dona de Giacò che la era belche morta. (Gén. 35:19, 22) Pol esser che Ruben el ga fato quel sbàlio parché el pensea che so pare el daria de pi atension a Bila, invesse de darghe atension a so mare, Lèia. O fursi lu sol el gavea voia de far imoralità sessual con ela. Ma el pi importante l’è capir che el bruto sbàlio de Ruben ga disgustà tanto a Geovà e al so pare Giacò. — Ledi Génesi 49:3, 4.b

7. Cossa ga sucedesto con Ruben e coi so dissendenti? (Varda anca el quadro “La professia de Giacò”.)

⁷ Ruben el ga mostrà bone qualità e la Bìblia no la dise che lu el ga fato imoralità nantra volta. (Gén. 37:20-22; 42:37) Ma Giacò el gavea dito che Ruben no’l saria meio che i so fradei. Par quela, nissun dei so dissendenti l’è deventà rè, sasserdote o profeta. Ancora cossita, Giacò el ghe ga dato una eransa, e i so dissendenti i ze deventadi una tribo in Israel. — Gios. 12:6.

8. Cossa che imparemo con quel che ga sucedesto con Ruben?

⁸ Cossa che noantri imparemo? Ghemo de sforsarse par dàrghene fora cola voia de far robe sbaliade e mai far imoralità. Alora, se vien fora la voia de far un pecato, ghemo de pensar come che Geovà, la nostra fameia e altri ndarà sentirse. Anca ghemo de ricordarse che la Bìblia la dise che “la persona la ndarà tor su quel che la ga piantà do”. (Gàl. 6:7) Ma quel che ga sucedesto con Ruben anca ne ricorda dela misericòrdia de Geovà. L’è vera che lu no’l ne protege de quel che pol vegner fora par causa de un bruto sbàlio che ghemo fato. Ma se noantri se ciamemo grami e se sforsemo de far quel che l’è giusto, Geovà el ndarà perdonarne e giutarne.

SIMEON E LEVI

9. Parché che Giacò no l’era mia contento con Simeon e Levi? (Génesi 49:5-7)

⁹ Ledi Génesi 49:5-7.c Dopo, Giacò el ga parlà con Simeon e Levi. Quel che lu el ga dito mostra che no l’era mia contento con quel che i gavea fato. Un per de ani indrio, un cananeo de nome Sichen el gavea violentà Dinà, la fiola de Giacò. Sicuro che tuti i so fioi i ze restadi disgustadi con quela bruta roba, ma Simeon e Levi i ga assà vegnerghe su le fumane. Lori due i ze ndati parlar con Sichen e i ghe ga dito che lu e i so òmini sol i gavaria pace cola fameia de Giacò se i fusse sircunsidadi. Sichen e tuti i òmini i ga acetà, e i ze stati sircunsidadi. Ma Simeon e Levi i era drio imbroiarli. Intanto che Sichen e i so òmini i era drio guarirse, Simeon e Levi ‘i ga ciapà le so spade, i ze ndati ala cità e lori i ga copà tuti i òmini’. — Gén. 34:25-29.

10. Come quel che Giacò el ga parlà sora Simeon e Levi ga pròpio sucedesto? (Varda anca el quadro “La professia de Giacò”.)

¹⁰ Giacò l’è restà tanto disgustà cola bruta roba che i so due fioi i gavea fato. Alora, lu el ga dito che i so dissendenti i ndaria ricever sol tochi de tera spaiadi in meso le altre tribo de Israel. Questo ga pròpio sucedesto intorno de 200 ani dopo, quando i israeliti i ze ndati rento la Tera Prometesta. La tribo de Simeon la ga ricevesto arquante cità spaiade nel teritòrio de Giudà. (Gios. 19:1) E la tribo de Levi la ga ricevesto 48 cità spaiade nel teritòrio de Israel. — Gios. 21:41.

11. Cossa che i dissendenti de Simeon e Levi i ga fato?

¹¹ Ma i dissendenti de Simeon e Levi no i ga fato bruti sbali cossita. Par esémpio, varda come tanti òmini dela tribo de Levi i ze stati leai a Geovà. Quando Moisè l’era nel Monte Sinai par ricever la Lege de Geovà, arquanti israeliti i ga fato un vedel de oro par adorarlo. Ma i leviti i ga seità leai a Geovà e i ga giutà Moisè a finir fora con tuti quei che i gavea adorà quel vedel. (Éso. 32:26-29) Geovà el ga scoliesto i òmini dela tribo de Levi par esser sasserdoti in Israel. (Éso. 40:12-15; Nùm. 3:11, 12) Dopo, i òmini dela tribo de Simeon i ga lotà insieme ai òmini dela tribo de Giudà contra i cananei par tor el poder dela Tera Prometesta, cossita come Geovà el volea. — Giui. 1:3, 17.

12. Cossa che imparemo con quel che ga sucedesto con Simeon e Levi?

¹² Cossa che noantri imparemo? No ghemo de far gnente quando semo massa cativi o inrabiadi. Sicuro che te resti disgustà quando te sì drio sofrir, o quando te vedi che una persona che te ghe vol ben la ze drio tribolar. (Sal. 4:4) Ma ghemo de ricordarse che Geovà no ghe piase che femo qualcossa de bruto contra i altri o che ghe disemo su. (Tia. 1:20) Cossita, ghemo de star atenti de mai far o dir qualcossa che ofende i altri. (Rom. 12:17, 19; 1 Pie. 3:9) Invesse, quando una persona la fà qualcossa contra noantri, seitemo a far quel che l’è giusto, anca se questa persona no la serve a Geovà. E imparemo che, anca se i nostri genitori i fà robe sbaliade, no ne ocore ndarghe drio al so esémpio. Mai ghemo de pensar che no saremo boni de servir a Geovà. Invesse podemo esser sicuri che Geovà el ndarà giutarne a far quel che l’è giusto e che riceveremo tante benedission.

GIUDÀ

13. Parché che fursi Giudà l’era preocupà con quel che so pare el ndaria dirghe?

¹³ Dopo, Giacò el ga parlà con Giudà. Pol esser che Giudà l’era preocupà dopo de scoltar quel che el so pare el gavea dito ai so fradei pi veci. Parché? Parché anca Giudà el gavea fato bruti sbali. Dopo che Simeon e Levi i ga copà tuti i òmini de Sichen, lu l’è ndato insieme ai so fradei ciavar tute le robe che ghen’era in quela cità. (Gén. 34:27) Lu l’era insieme ai so fradei quando i ga vendesto Giusepe come schiavo e el ga giutà a imbroiar el so pare. (Gén. 37:31-33) Lu anca el ga bio relassion sessuai con Tamar, la dona de un dei so fioi, parché el pensea che la era una prostituta. — Gén. 38:15-18.

14. Che bele robe Giudà el ga fato? (Génesi 49:8, 9)

¹⁴ Anca se Giudà el gavea fato bruti sbali, Giacò lo ga lodà e el ga dito che lu e i so fioi i riceveria tante benedission. (Ledi Génesi 49:8, 9.d) Giudà el gavea mostrà che el se preocupea tanto coi sentimenti del so pare, che l’era belche vècio. E lu anca el ga mostrà amor par el so fradel pi gióveno, Bengiamin. — Gén. 44:18, 30-34.

15. Cossa che ga sucedesto cola tribo de Giudà?

¹⁵ Giacò el ga dito che Giudà el gavaria autorità sora i so fradei. E questo ga sucedesto intorno de 200 ani dopo quando i israeliti i ze ndati fora del Egito. Come? La tribo de Giudà la ndea davanti tute le altre tribo nel deserto. (Nùm. 10:14) Arquanti ani dopo, Geovà el ga domandà che la tribo de Giudà ndesse rento la Tera Prometesta prima dele altre tribo e scominsiesse a lotar contra i cananei. (Giui. 1:1, 2) Tanti dei rè che Geovà el ga scoliesto i ze vegnesti dela tribo de Giudà. El primo l’è stà Davi, ma dopo ghen’è stà tanti altri. E Geovà ghe ga dato ancora altre benedission a questa tribo.

16. Come che ga sucedesto quel che l’è scrito in Génesi 49:10? (Varda anca el quadro “La professia de Giacò”.)

¹⁶ Giacò anca el ga dito che quel che ndaria governar tute le persone par sempre el vegnaria dela tribo de Giudà. (Ledi Génesi 49:10.e) Giacò el ga ciamà questo governante de Silò, che l’è Gesù Cristo. Un àngelo el ga dito sora Gesù: “Geovà el ghe darà el trono de so pare, Davi.” (Luc. 1:32, 33) La Bìblia anca la dise che Gesù l’è “el Leon dela tribo de Giudà”. — Apo. 5:5.

17. Come che podemo far compagno a Geovà?

¹⁷ Cossa che noantri imparemo? Anca se Giudà el gavea fato bruti sbali, Geovà lo ga benedio tanto. Sarà che i so fradei i se domandea parché che Giudà el gavea ricevesto tante benedission? Noantri no savemo quel che lori i pensea, ma semo sicuri che Geovà lo ga benedio tanto parché el ga visto le so bele qualità. Come che podemo ndar drio al esémpio de Geovà? Quando un fradel el riceve un laoro spessial, pol esser che no semo mia de acordo parché cognossemo i so difeti. Ma ghemo de ricordarse che Geovà l’è contento col laoro che lu l’è drio far e ghe piase le so bele qualità. Geovà sempre el varda quel che ghemo de bon, e noantri ghemo de far compagno a lu e vardar le bele qualità che i altri i ga.

18. Parché che ne ocore portar passiensa?

¹⁸ Nantra roba che podemo imparar con quel che ga sucedesto cola tribo de Giudà la ze che ne ocore portar passiensa. Anca se Giacò el gavea dito che Giudà el gavaria autorità sora i so fradei, ga volesto tempo fin che sucedesse quel che el gavea dito. Geovà el ga scoliesto òmini de altre tribo par tender dei israeliti par tanto tempo. Par esémpio, lu el ga doperà Moisè dela tribo de Levi, Giosuè dela tribo de Efrain e el rè Saul dela tribo de Bengiamin. Ma tuti dela tribo de Giudà i ga seità leai a Geovà e i ga obedio a quei che gavea autorità. Cossita capimo che, anca se Geovà sempre el fà quel che el promete, pol esser che lu no lo fae dela maniera che speteino o nela ora che voleino. Alora, anca noantri ghemo de far compagno ala tribo de Giudà e obedir a quei che Geovà el scòlie par tender de noantri ancoi. — Ebr. 6:12.

19. Cossa ghemo imparà sora Geovà nela professia de Giacò?

¹⁹ Cossa che podemo imparar de quel che Giacò el ga parlà a quatro dei so fioi? Semo sicuri che Dio no’l vede le robe come le persone le vede. (1 Sam. 16:7) Geovà el ga tanta passiensa e l’è sempre pronto par perdonar. Anca se lu no’l sarà mai de acordo con robe sbaliade, lu el sa che no semo mia boni de obedirghe de maniera perfeta. Alora, se una persona che la ga fato un bruto sbàlio nel passà la se ciama grama e la torna a far quel che l’è giusto, la pol esser sicura che Geovà el ndarà perdonarla e benedirla. Nel pròssimo stùdio, ndaremo veder quel che Giacò el ga dito ai so altri oto fioi.