Silempwale ni Luka
16 Nto Yesu aaweerela-tho ha atthareli awe: “Mulopwana mmoha amuhakhu aakhalano muhooleli a empa awe yoowo ootherinwe omwiiyera. 2 Vano, owo aamwiitthana ni aamweerela: ‘Eheeni ela kiniiwaaka woohima sa nyuwo? Mukileele moota mweettinhaanyu itthu saka,* mwaha wooweera vano khamunrowa okhala muhooleli a empa aka.’ 3 Vano, muhooleli ole a empa aahiiseerela mwaneene awe: ‘Kinrowa opaka eheeni, koonaka weera apwiyaka enookihiiha okhala muhooleli a empa aya? Nkinwera olima ni okuuliha muru ovekela eximola. 4 Aah! Koosuwela etthu kinkelaaka opaka weera kahiya vale okhala muhooleli a empa ya apwiyaka, atthu ekaakheleke mmawannyaya.’ 5 Ni awiitthanaka anamakopha aapwiyawe, aamukoha oopatxera: ‘Mwaakophenle kavi apwiyaka?’ 6 Owo aamwaakhula: ‘Miphimo* 100 sa makhura.’ Muhooleli ole a empa aamuleela eeraka: ‘Mukuxe moowaakuveya edokumentu anyu ya nivarihano, mukilaathi moowaakuveya mulepe 50.’ 7 Moottharelana, aamukoha mukina: ‘Ankha nyuwo mukomphe kavi?’ Aahaakhula eeraka: ‘Isaakho 100 sa tiriku.’ Muhooleli ole a empa aamuleela eeraka: ‘Mukuxe moowaakuveya edokumentu anyu ya nivarihano, mulepe 80.’ 8 Vano, pwiya amuhooleli ole aamuttottopela nnaamweera owo aari oohiroromeleya, mwaha wooweera aapaka itthu mwa miruku. Mene atthu a elapo ela,* tootepa okhalano miruku waapwaha arumeyi a Muluku.
9 “Tivanto kinooleelaakani weera: Nvareleke muteko mihakhu sa elapo ela weera mwaapake asinthamwene, weera samala vale mihakhu iyo, atthu awo mpankaanyuno onthamwene, ewaakheleni mapuro oohimala. 10 Mutthu oororomeleya ni itthu vakhaaniini toororomeleya-tho ni itthu sintxipale, ni mutthu oohiroromeleya ni itthu vakhaaniini toohiroromeleya-tho ni itthu sintxipale. 11 Vanonto nyuwo mwaahiroromeleya ni mihakhu sa elapo ela yoonanara, taani onkela woororomelani ni mihakhu sa ekhaikhai? 12 Ni mwaahoonihera okhala oororomeleya nvarelaka muteko itthu sa atthu akina, taani onkela woovahani yoohiyeriwa? 13 Khaavo namuteko onwera waavarela muteko mapatarawu meeli, mwaha wooweera anaamwiitteke mmoha ni amusiveleke mukina, naari anampwattheke mmoha ni omuthanya mukina. Nyuwo khamunwera onvarela muteko Muluku ni emaara emoharu mihakhu.”
14 Afarisi, yaawo waasivela musurukhu, yanniiwa itthu sootheene iya, ni yaapatxera omutheya. 15 Vano, Yesu aaweerela: “Nyuwo munniihima vamaithoni va atthu weera mwa atthu oororomeleya, mene Muluku oosuwela murima anyu. Nto ele erino mwiitti vamaithoni va atthu, ti yoonanara vamaithoni va Muluku.
16 ”Nlamulo ni Soolepa sa maprofeta saalaleiwa mpaka mahiku a Yohani. Ovenya etempu ene yeele, mitthenka sooreera sa Omwene wa Muluku sinnalaleiwa. Ni atthu amakhalelo ootheene enniilipihera weera evolowemo. 17 Mweekhaikhai, ti wookhweya erimu ni elapo ya vathi omala, ehikhanle eleetera emoha mano ya Nlamulo ehikwaniherinwe.
18 “Ootheene ole ommwalana ni amwaarawe ni anamuthela muthiyana mukina, onooraruwa, ni ole ommuthela muthiyana oohiiwa ohikhanle weera orooraruwa, onooraruwano.
19 “Aakhala mulopwana mmoha a muhakhu aawara ikuwo sa musurukhu, aari oopuha ni aakhalano ekumi yoohakalala. 20 Ni mulipa ooveka eximola mmoha iitthaniwa Lazaro, annateexeriwa vamulako wa mulopwana ole a muhakhu, ni erutthu awe yaasareya makhwatta; 21 owo annamaliha* etala atxaaka inyenyeeri saamora vasulu vameesa va mulopwana ole oopuha. Mpaka alapwa yannawa olata makhwatta awe. 22 Evinreene etempu, mulipa ole ooveka eximola, aahookhwa ni aateexiwa ni malaika aroihiwaka nipuro aaraawewo Abrahamu.
“Nave-tho, mulipa ole amuhakhu aahookhwa ni aarowa ovithiwa. 23 Areene mmahiye* mwemmwe moohaaxiwani, aakhunula maitho awe, awehaka osulu aamoona Abrahamu ottayi wene areene ni Lazaro. 24 Mwa yeeyo, owo aamwiitthana eeraka: ‘Tiithi Abrahamu, mukimorele ikharari, mmurume Lazaro weera aruweye okhwipi wa ekathaawe mmaahini weera anaanihe nlumi naka, mwaha wooweera kinoohaawa omooroni nno ohintxipha.’ 25 Mene Abrahamu aamweerela: ‘Mwanaka, muupuweleke weera mureene mukumi mwaahaakhela sooreera sanyu, mene Lazaro aakhenle itthu soonanara. Vano owo onoohakalala nno, mene nyuwo munoohaawa. 26 Opwaha mwa yeeyo, nookhala nlitti ntokotoko ninnimwalaniha nyuwo ni hiyo, nto mwaha wa yeeyo, ale ari nno antthuna okela moono anyu khavanwereya. Naari atthu ari iwo khanwera owa nno.’ 27 Nto mwaha wa yeeyo, mulopwana a muhakhu aaheera: ‘Tiithi kinnoovekelani weera mmurumihe wa apapaka, 28 woona weera kookhalano asinnaka athanu. Mmuhiye weera aaleele weera awo ehiwe tho nipuro nna miyo kiraaka noohooxiwa.’ 29 Ni Abrahamu aaheera: ‘Awo aakhalano Solempwa sa Mose ni sa Maprofeta. Yiiweleleke seiyo.’ 30 Owo aamwaakhula: ‘Hooye, tiithi Abrahamu! Wakhala weera mutthu okhwiiye oovinya anarowa waaleela, awo enoorowa ottharuwa.’ 31 Mene Abrahamu aamweerela: ‘Waari weera awo khayiiwelenle Malamulo a Mose ni a Maprofeta, khenkela omwiiwelela mutthu nnaamweera avinnyeene mookhwaani.’”