Silempwale ni Marko
13 Emaara Yesu aakhumaawe mutemplu, mmoha aatthareli awe aamweerela: “Muhusiha, munnoona maluku ni empa ela moota erenraaya!” 2 Avinyaka Yesu aahaakoha: “Munnoona impa iya itokotoko? Enoophiya mahiku nihinrowaaya ohala nluku vasulu va nluku nikhwaaya nihimorihelinwe vathi.”
3 Emaara aakilanthaawe vamwaako wa Oliveira nipuro nenno nooneya etemplu, Pedru, Yakobe, Yohani ni Andreya yaamukoha wiiphiini: 4 “Munleele: Liini sinkelaaya weereya itthu iya, ni teevi eri ethoonyero yooweera itthu sootheene iya sihanle omala?” 5 Nto Yesu, aapatxera waaleela eeraka: “Mwiikosoope weera ahikhale anaawoototheni. 6 Enoowa atthu antxipale mwa nsina naka, yeeraka: ‘Ti miyo’, ni enimwaawoka atthu antxipale. 7 Opwaha mwa yeeyo, mwiiwa woohima sa ekhotto ni mitthenka sa ekhotto, muhituthuwe. Okhala weera itthu iyo sintthuneya weera sikhumelele, mene khaiyene omala wa elapo.
8 “Mwaha wooweera muloko onoowana ni muloko mukina ni elapo ni elapo ekina; ni onookhumelela otetereya* wa elapo mapuro oovirikana; nave-tho, enoothowa yootxa. Sootheene iya mapatxerero a soohooxa.
9 “Woohima sa nyuwosa, mwiikosoope. Atthu animooroihani otripunaale ni woowaxulani musinakooka, ni munooroihiwa ohoolo wa makovernatore ni mamwene mwaha wa miyo, weera mukhale anamoonaaka. 10 Nave-tho, atthu a maloko ootheene, elaleeriwe toko mitthenka sooreera sa Omwene. 11 Mwaroihiwa vale otripunaale, muhixupeye ni etthu munkelaanyu ohima, mene muhime etthu munkelaanyu wuupuxeriwa ewoora ene yeeyo. Mwaha wooweera khaiyene ti nyeenyu munuuluma, mene munepa wootteela. 12 Opwaha mwa yeeyo, munna ananveleele munnawe weera iiviwe, paapa ananvaherere mwanawe, ni anamwane enoopakavo etthu weera asitiithi aya yiiviwe. 13 Mene nyuwosa muneereke wiittiwa ni atthu ootheene mwaha wa nsina naka. Mene ole oneera avilele mpaka okhwipi, onoovuluxiwa.
14 “Vaavo munkelaanyu woonaka yeereyaka etthu yoonanara yeeyo ennanariha itthu ereene nipuro nootteela, (ole onsoma ontthuneya okhalano miruku weera iiwexexe muulumo ala), vano ale enkela okhala oYudeya, etthawele omwaako. 15 Ole anaakhale vasulu va empa ahikhuruwele vathi, naari ahivolowe mpaani mwawe weera akumihe etthu, 16 ole anaakhale omatta, ahitthikele owannyawe weera akuxe itthu ohiñyaawe ottuli ntoko maleyaawe. 17 Ootakhaliwa athiyana oorupala ni ale eneera ewaamwiheke anamwane aya mahiku ene yaale! 18 Mwiilipihereke ovekela weera eyo eheereye eyiita; 19 nto mahiku ene yaawo, enookhumelela maxupo matokweene ehintale weereya, ovinyera ephattuwelo Muluku apattuxakaru elapo mpaka vano,* naari khenkela otthikela weereya veeli. 20 Mene mahiku awo Yehova ahaavukunle, khaavo eera avuluxiwe. Menento mwaha wa oothanliwa owo aathanliyaawe, mahiku awo onoovukula.
21 “Menento wakhala weera mutthu onooweerelani: ‘Kristu ori va!’, naari ‘Iwe!’, muhimwaakhulele. 22 Mwaha wooweera enookhumelela makristu ni maprofeta oowootha, ni awo eneereke opaka ithoonyero ni miiriira weera yaawoke atthu, wawereya, ni oothanliweene. 23 Tivawonto, mukhale oowehaweha. Koolenleni itthu iya sootheene sihinaaye weereya.
24 “Mene mahiku ene yaawo, noomala ovira mahiku amaxupo matokweene, nsuwa nnootxipha, mweeri onoohiya waara, 25 ithenyeeri sinoomora wiirimu, ni itthu siri wiirimu inoottikinyiwa. 26 Ni enoomoona Mwaana a Mutthu, awaaka mmahutteni wiirimu ni owera ni ovuwa otokweene. 27 Nto owo onooruma malaika awe, weera yaathukumanye oothanliwa awe wa ipaarte ixexe,* okhuma okhwipi wa elapo mpaka okhwipi wa erimu.
28 “Muxuttere nniphwanaphwaniho na mwiri wa ifiiku: vaavo itamphi inyowani simpatxeraaya ophuwa makukhu, nyuwo munnasuwela weera elimwe yohaattamela. 29 Emoha-moharu, moona vale itthu sootheene iya seereyaka, musuwele weera Mwaana a Mutthu ohaattamela vamulako. 30 Kinnooleelani ekhaikhai weera atthu a mahiku ala, khenrowa omala itthu iya sihinaaye weereya. 31 Erimu ni elapo enoolakaseya,* menento masu aka enoovirelela okhala wa mahiku ootheene.
32 “Woohima sa nihiku nno ni ewoora ene itthu iyo sinkelaaya weereya, khaavo osuwenle, nnakhala malaika wiirimu, nnakhala Mwaana a Muluku, mene osuwenle paahi Tiithi. 33 Mukhale oowehexexa ni ootxentxera, mwaha wooweera khamusuwenle etempu ene. 34 Eyo enoolikana ni mulopwana mmoha, otthunaka weetta ekwahaawe onaahiyera anamuteko awe empaawe, onnaakawela miteko saya, ni onnamulamula kwaarta weera awehaweheke. 35 Mukhale oowehexexa mwaha wooweera khamusuwenle nihiku mwaneene vaate onkelaawe owa, onwa othana, ohiyu eriyari, ohinaaye oxa,* oxeexelo, 36 weera awa vale mootutuxera ahoophwanyeni mukonaka. 37 Ele kinooleelaakani nyuwo, kinnaaleela atthu ootheene weera: Mukhale oowehexexa.”