Silempwale ni Matheyo

16 Areene weiwe, afarisi ni asaduki yaamwaattamela etthunaka omweerera, nto yan­vekela weera awoonihere ethoonyero ya wiirimu. 2 Owaakhula enre: “Nsuwa neeraka oneela, nyuwo muneera: ‘Omaalo enookhala etempu yooreera mwaha wooweera erimu eri yooxeera,’ 3 ni oxeexelo: ‘Nyuwo muneera: ‘Olelo onaariire ni eneerupe epula mwaha wooweera erimu eri yooxeera ni yookhalano mahutte.’ Nyuwosa munnawera otaphulela mikhalelo sa erimu, menento khamunwera otaphulela ithoonyero sa etempu. 4 Atthu oowuuma murima ni oohiroromeleya! Munnyeserera weera moone ethoonyero, mene khamunooniheriwa ethoonyero eri poothe, ehikhanle yeele ya Yona.” Nto aasusa vale anaarera ettuli.

5 Nto, atthareli awe yaarowa ekhopela ekina, mene yaattiwala okuxa ipaawu.* 6 Yesu aaweerela: “Muhule maitho ni mwiikosoope ni efaramenta ya afarisi ni asaduki.” 7 Nto, atthareli yaapatxera wuuluma yaaworu, yeeraka: “Khanikunxe ipaawu.” 8 Ni Yesu asuwelaka etthu yuulumaaya, aaweerela aakohaka ha: “Atthu* anroromelo vakhaani, mwaha wa heeni munuulumaanyu mwaha woohikuxa ipaawu? 9 Nlelo khamwiiwexenxe naari khamunuupuwelela woohima sa ipaawu sin­ku yaatxiiyaaya atthu 5.000, ni mittanka* mikavi saattottelinwe soohala? 10 Naari ipaawu seete yaatxiiyaaya atthu 4.000, ni mittanka* mikavi mitokweene saattottelinwe soohala? 11 Vanonto, muhiniiwexexa hayi weera miyo nkuuluma sa ipaawu? Kenre mwiikosoope ni efaramenta ya afarisi ni asaduki.” 12 Atthareli ale, yaahiiwexexa weera khaahima weera yiikosoope ni efaramenta yaapakeliwa ipaawu, mene wiikosoopa ni sooxuttiha sa afarisi ni asaduki.

13 Aphiyakaru muttetthe wa oKesareya wa oFilipe, Yesu aahaakoha atthareli awe: “Moovarihana ni ele atthu enhimaaya, Mwaana a Mutthu, taani?” 14 Omwaakhula yenre: “Akina eneera nyuwo Yohani Mpatisa, akina Eliya ni atthu akina eneera nyuwo Yeremiya, naari mmoha a maprofeta.” 15 Vano, owo aahaakoha awo: “Ankha nyuwosa, muneera miyo taani?” 16 Simoni Pedru aahaakhula: “Nyuwo Kristu, Mwaana a Muluku mukumi.” 17 Yesu aamweerela: “Oohakalala ti nyuwo Simoni, mwaana a Yona, mwaha wooweera etthu eyo khamuleelinwe ni atthu, mene muleelinwe ni Atiithi aka eri wiirimu. 18 Kinnooleelani weera: Nyuwo mwa Pedru, ni vamwala vaava kinooteka muloko ni okhwa* khonkela owina ­miloko iyo. 19 ­Kinimoovahani ixaavi sa Omwene wa wiirimu, ni itthu sootheene muneeraanyu mutthuke elapo ela ya vathi, ­sinaatthukiwe wiirimu ni itthu sootheene muneeraanyu mutaphule elapo ela ya vathi, sinootaphuliwa wiirimu.” 20 Yesu, aahaaleela atthareli awe moowaalipihera weera ehimuleele mutthu weera owo aari Kristu.

21 Ovinya etempu ene yeele, Yesu aapatxera waaleela atthareli awe weera annatthuneya orowa oYerusalemu ni iwo, aamuhaaxiwa ni asitokweene aayuda, asitokweene aanamakeya ni alipa oolepa. Ni iwo aamwiiviwa, mene anvinyererihiwa nihiku nanaararu. 22 Pedru aamukuxera Yesu okhwipi, anamweerela: “Mwiimorele ikharari Pwiya, eyo khenkela oweereelani.” 23 Yesu aamurera ettuli Pedru, eeraka: “Okhale ottayi ni miyo Satana! Mwaha wooweera nyuwo nluku ninkikwattuliha mwaha wooweera khamwaano minyuupuwelo sa Muluku, menen­to sa atthu.”

24 Yesu aaweerela atthareli awe: “Ole ontthuna okhala mutthareli aka, aikhootte mwaneene awe ni akuxe mwiri wa nihaaxero* ni avireleleke okitthara. 25 Mene ole oneerera ovuluxa ekumi awe onooyeleela, mene ole oneera oyeleele ekumi awe mwaha wa miyo onoophwanya ekumi awe. 26 Yooreera eheeni, ophwanya elapo yootheene ya vathi eeraka mutthu ayeleele ekumi awe yootheene? Naari mutthu onrowa otxentxiha ni eheeni ekumi awe? 27 Mwaana a Mutthu, onimoowa moovuwani mwa Atiithi awe vamoha ni malaika ni onkela omutthuvela mutthu ti mutthu moovarihana ni mukhalelo awe. 28 Kinnooleelani ekhaikhai weera, akina eri va, khenkela okhwa ehinaaye omoona Mwaana a Mutthu awaaka Moomweneni mwawe.”