Munaawere hayi okhalano etthoko yoohakalala?

1. Othela anyu, onatthuneya olepiha opooma?

Aani, Yehova Muluku toohakalala nave topattunxe ntheli, nto ontthuna weera matthoko ehakalaleke ntoko yoowo. (1 Timotheyo 1:11) Koma Muluku onnoonihera weera, mulopwana ni muthiyana ontthuna opaka etthoko, ontthuneya othelana. Mweera hiiho etthoko anyu enookhala yowiiwananeya ni yoothokorereya. Ti yeyo makristau aneeraya, awo anithelana moovarihana ni malamulo a mapuro anikhalaaya. — Mmusome Luka 2:1, 4, 5.

Muluku ontthuna weera othelana okhaleke wa atthu eeli, mulopwana ni muthiyana. Mene ontthuna weera alipa othelana ala, ekhaleke oororomelana. (Aheberi 13:4) Suwelani ela, Muluku onniitta omwalana. (Malakhiya 2:16) Vano wakhala weera mmoha wa atthu ala eeli, oomuraruwela mukwaiye ereke hayi? Muluku onnamuhiya mutthu wiithanlela omwalana naari hooye. — Mmusome Matheyo 19:3-6, 9.

2. Anamathelana ethokororaneke moota heeni?

Yehova ontthuna weera mulopwana ni mwaariye ekhaviheraneke. (Ephattuwelo 2:18) Mulopwana ookhalano miritti miili vatthokoni: woopatxera, okhavihera etthoko ni wa naaveli, waaxuttiha malamulo a Muluku anamwane vamoha ni amwaariye. Mulopwana onaasivela amwaariye, owo onnawupuwela. Nave anamathelana ethokororaneke mwa nttittimiho. Weera etthoko evireleleke okhala yoohakalala, ontthuneya olevelelana mukina ni mukwaawe, mwaha wooweera atthu hiyo toottheka. — Mmusome Aefeso 4:31, 32; 5:22-25, 33; 1 Pedru 3:7.

3. Eheeni Biblya onahimaawe mpuwa mwa omwalamwala?

Mene musuwele weera itthoko sootheene, sinnakhalano maxupo. Anamathelana, ontthuneya weera yaakuveleke omaliha milatthu saya ni nsivelo. (1 Akorinto 13:4, 5) Biblya onahima weera omwalamwala khaiyono omaliha mulatthu. — Mmusome 1 Akorinto 7:10-13.

4. Anamwane, ethokororiweke moota heeni vatthokoni?

Yehova ontthuna weera anamwane ehakalaleke. Nave onnaavaha miruku sooreera. Mene Yehova osuwela weera asitiithi aakhalano sookumanano sintxipale mweekumini, nto anoowera waxuttiha ni waavaha miruku. (Akolosi 3:20) Nave anamwane ontthuneya ekhaleke oomwiiwelela Yehova. Amiravo anipwanya ohakalala, tiyaale anipaka yootthuna ya Yehova ni Yesu. — Mmusome Koheleti 11:9–12:1; Matheyo 19:13-15; 21:15, 16.

5. Asitiithi anrowa waakhavihera hayi anaaya okhala oohakalala?

Anamwane annitthuna okhalano soowara, yootxa, nave nipuro nookhala. (1 Timotheyo 5:8) Anamwane nave, enoowera okhala oohakalala yaamusivelaka Muluku, ni etthunaka oxuttera ikano sawe. Asitiithi aakhalano muritti woowaxuttiha anaaya. (Aefeso 6:4) Moota heeni? Muritti woopatxera, entthuneya owoonihera anaaya weera ennimusivela Muluku, koma aniinyu pooti wootakihani. wa naaveli, ontthuneya weera sooxuttiha sa tiithi, sikhumeke mBiblyani weera soothanla sa anaaya sikhaleke sooreera mwekumini mwaya. — Mmusome Olaleya 6:4-7; Miruku 22:6.

Asitiithi ontthuneya waattottopelaka anaaya, emaara anipakaya itthu sooreera. Nava-tho, anamwane ontthuneya waxuttiya ni waxuxula, weera evireleleke okhala nnene mwekumini mwaya. (Miruku 22:15) Mene asitiithi ontthuneya weera yaapixereke murima anaaya, weera ehatthekele naari waanyonyiha. — Mmusome Akolosi 3:21.

Anamoona a Yehova, akhalano ibuukhu sooreera sineera saakhavihereke asitiithi ni anaaya. Ibuukhu iyo, sookhalano miruku sa mBiblyani. — Mmusome Nsalmu 19:7, 11.