Malamulo eri mBiblya enaanikhavihere haayi?

1. Neereke miruku sa Muluku ti sootthuneya?

Aani, mwaha wooweera mpattuxaahu ta miruku onipwaha hiyo. Owo tiithi ansivelo ni onnanithokorora. Mene ohakalala waahu onkhuma wa Muluku. (Yeremiya 10:23) Ntoko mwaana onkhaviheriwaawe naasitithawe, nave hiyo tho ontthuneya okhaviheriwa ni Muluku. (Yesaya 48:17, 18) Biblya yoovaha etokweene ya Muluku, mwaha wooweera owo onnanikhavihera. — Mmusome 2 Timotheyo 3:16.

Naaiwelelaka malamulo a Yehova, nnokhala atthu oohakalala, nave nnoosuwela moota woopwanya ohakalala mahiku ootheene. Hiyo nipattuxiwe ni Muluku, mwaha wa yeeyo nnoowera otthara miruku sawe sootheene. — Mmusome Nsalmu 19:7, 11; Apokalise 4:11.

2. Nnanvarihele hayi muteko Biblya, weera nipake soothanla sahu?

Biblya ookhalano malamulo anivarihana ni soopaka sahu. (Olaleya 22:8) Emaraa ekina, soothaliha sa Biblya ti soovareleya muteko mweekumini mwahu. Nto nuupuweleke moota Biblya onnikhaviheraawe opaka soothanla mweekhumini. (Miruku 2:10-12) Mwa ntakihero, Biblya onahima weera, ekumi yoovaha etokweene ya Muluku. Mwaha woowupuwela weera ekumi yoovaha ya Muluku, onnanikhavihera othokorora nnene ekumaahu ni yaakwiihu. Nave, ennanikhavihera othokorora ekumaahu vamutekoni, mmawannyihu naari vamukwahani. — Mmusome Miteko 17:28.

3. Malamulo heeni meeli ootepa otthuneya?

Yesu aathaliha malamulo meeli ootepa otthuneya. Noopatxera ori omusuwela, onvarela ni omusivela Muluku opwaha itthu sootheene. Eyo etthu yootthuneya wuupuwelela emaara nimpakahu soothanla sahu mweekumini. (Miruku 3:6) Atthu anitthara nlamulo nna, annikhalano ontthamwene woolipa ni Muluku, nave annaweherera okhalano ekumi yoohimala. — Mmusome Matheyo 22:36-38.

Nlamulo nanaaveli, ninnaanikhavihera okhalano murettele naatthu. (1 Akorinto 13:4-7) Weera niwere otthara nlamulo nna,ontthuneya omutakiha Muluku moota onaathokororaawe atthu. — Mmusome Matheyo 7:12; 22:39, 40.

4. Moota heeni Biblya oneeraawe anikhavihere?

Biblya onnaxuttiha itthoko okhalano nsivelo ni okhala oowiiwanana. (Akolosi 3:12-14) Biblya onathaliha weera, etthoko epattuxiwe weera ekhaleke mahiku oottheene. Mene otthara miruku iya, sinookhavihera etthoko anyu. — Mmusome Ephattuwelo 2:24.

Ovarela muteko ele Biblya onaxuttihaawe enimookhaviherani vantxipale. Mwa ntakihero, Biblya onahima weera niroromeleyeke mmutekoni mwahu, nave nihikhaleleke oresi muteko ninvaraahu. Ettiitthu weera anamuhakhu antxipale, anaatthuna atthu owiilipiha ni oororomeleya. (Miruku 10:4, 26; Aheberi 13:18) Biblya onahima weera okhala nthamwene a Muluku, onnipwaha okhalano musurukhu muntxipale. Nave-tho owo onanoperera weera khontthuneya okhalano muhakhu naari musurukhu muntxipale, mene nakhalanoru yootthuneya ya vekumini vahu. — Mmusome Matheyo 6:24, 25, 33; 1 Timotheyo 6:8-10.

Ale anitthara miruku sa Biblya, annakiha ekumi aya. (Miruku 14:30; 22:24, 25) Mwa ntakihero, ekhaikhai weera Biblya khankhottiha owura evinyu, naamwi vareene hiho, owo onnahima moowiiwanyeya moota woowura. Wiiwelela nlamulo nna, nnonikhavihera osepa iretta ni irisa. (Nsalmu 104:15; Miruku 23:20; 1 Akorinto 6:10) Opwaha mwa yeeyo, Biblya onnanikhavihera okhalano miruku sooreera. (Nsalmu 119:97-100) Ekhaikhai, opaka ele Biblya onahimaawe, enoonikhavihera mweekumini mwahu. Mene arumeyi a Muluku, onnaasivela otthara ele Biblya onahimaawe, mwaha wooweera antthuna omuttittimiha Yehova. — Mmusome Matheyo 5:14-16.