Mwiiriira ophareya yooxeera

Emaara Farawo aasuwenlaawe weera ana a Israeli yaakhumawo wExipitu, owo aahakhuwelela anakhotto awe eeraka: ‘Mureherere ikaaro saka sa ekhotto! Nrowe naatthimakele!’ Hiyo khawaatthuneya waahiya awosa epwahaka!

Yeereyaka eyo, Yehova eera awooniheraka ana a Israeli ephiro yeeraaya evireke. Moosuwela moota heeni? Othana owo aavarihela muteko nihutte ni ohiyu owo annavarihela muteko waara wa mooro. Noovira etempu, ana a Israeli yaaphwanya ephareya yooxeera, Yehova aaweerela atthu awo, weera eweherereke vakhaaniini.

Ereene iwe, ana a Israeli yaamoona Farawo areene ni anakhotto awe, aatthimakelaka. Awo khiyaarinono wootthawelawo. Ohoolo waya yaariwo ephareya yooxeera ni ottuli waya yaariwo anakhotto a wExipitu. Ana a Israeli yannoova vantxipale ni yannuuluma weera yaatthuna otthikela wExipitu. Mene Mose annamuroromela vantxipale Yehova. Owo aaheera: ‘Niweherere, nihoove ni noone moota Yehova onrowaawe onivuluxa.’

Nto Yehova ahaaleela ana a Israeli weera yiireherereke weera evireleleke weetta mukwaha. Avinyaka, Yehova aaheeriwa weera nihutte naari ohoolo wa ana a Israeli, ntthikele ottuli waya. Nihutte nne naakhala ohoolo wa anakhotto a wExipitu. Eparte yaaraayawo ana a Israeli waakhalawo waara, ni eparte yaaraayawo anakhotto a wExipitu, yaakhalawo epiphi.

Yehova aamweerela Mose weera ookolele ntata ephareya yooxeera. Ni Yehova aaheeriha woopa epheyo ohiyu wootheene mwa ephareya ele. Mwaha wa epheyo, ephareya ele yaakawanyeya variyari, yaakhala ntoko ixiri piili sa maahi. Nto variyari va ixiri iyo piili, yaakhalavo ephiro. Imiliyawu sintxipale sa ana a Israeli yaavolowa mphiro ole, ni yaaheetta ehikhanlevo maahi naari matope mpaka ophiya ekhopela ekina ya ephareya.

Farawo ni anakhotto awe, yaahaatthimakela ana a Israeli eviraka ephiro yeele Yehova aahunlaawe mphareya. Menento, Yehova aahaakumihera maxupo anakhotto a Farawo, ni aananariha maroota a ikaaro saya sa ekhotto. Anakhotto a wExipitu yaakhuwela: ‘Nrowe nitthikeke! Yehova onnaakosoopa ana a Israeli.’

Yehova aamweerela Mose weera ookolele ntata nawe veeli ephareya ele yooxeera. Mose apakakaru eyo, ixiri iye sa maahi, saahaakhuneela anakhotto ale a wExipitu. Farawo ni anakhotto awe ootheene yaahookhwa. Khaavo aahanle naari mmoha.

Elapunweene ephareya ele, ana a Israeli yaahoona etthu Yehova aapankaawe. Nto weera emuxukurele owo, athiyana yaapatxera wiina, ni ootheene yanniipa: ‘Mmwiipele Yehova, mwaha wooweera ootheene aasuwela weera owo tooweraxa! Owo ohaavonyera mphareya akavalo, ni anakhotto aya.’ Atthu ootheene yaari oohakalala. Moohihovela, ana a Israeli yaari ootaphuwa mweekhaikhai!