Masu yaakhumelenle vaxirini

Evinreene etempu, Balthazari aakhala mwene oBabilonia. Ohiyu omoha, aapakiha efeesta yeeyo aawompaawe atthu ootepa otthuneyaxa oBabilonia. Avinyaka, Balthazari aahaaruma anamuteko awe weera yakuxe ikoopho sa ewooru seiyo Nabukodonosori aakunxaawe mutemplu mwa Yehova. Balthazari ni atthu ootheene yaari ofeestani iwe, yaawurela ikoopho sa ewooru ni yannaattottopela amiluku aya. Nto naakhumelela ntata na mulopwana! Ntata nne naalepa masu ootepa oxupa osoma vaxirini weiwo yaapakaayawo efeesta.

Balthazari aahoova vantxipale. Owo aawiitthana anamataphulela itthu ni aaweerela: ‘Ole onrowa okitaphulela masu ala, anookhala mutthu ootepa otthuneyaxa a naararu, elapo ela ya oBabilonia.’ Atthu ootheene yaaheerera otaphulela, menento khaavo aawenre. Nto pwiyamwene aamweerela Balthazari: ‘Mulopwana mmoha oneeriwa Daniyeli, aamutaphulela itthu sintxipale Nabukodonosori. Owo pooti otaphulela etthu antthunaaya ohima masu ala.’

Nto Daniyeli aarowa wuuluma ni mwene. Balthazari aaheera: ‘Daniyeli, weyo wawera osoma ni otaphulela masu ala eri vaxirini va, kinimoowariha ekolaare ya ewooru, ni kinooweeriha weyo okhala mulopwana anaararu ootepa otthuneya a oBabilonia wootheene.’ Daniyeli aaheera: ‘Pwiya, miyo nkintthuna sootheene iyo, menento miyo kinimootaphulelani etthu entthunaaya ohima masu ala. Tiithi anyu Nabukodonosori, aari mulopwana oowiiteexa vantxipale, menento Yehova aamuxuttiha etthu yootepa otthuneya. Nnaamweera nyuwo musuwelaka etthu yeereñye nuuwo, nyuwo moowurela eviinyu ikoopho sa otemplu. Nto Yehova oonyoonyiwa vantxipale, ni tiyeeyo olempaawe vaxirini vale masu ala eneera: ‘Mane, Tekel, parsin. Entaphulela weera, mwene a Amedia ni a Apersia enoorowa omutuphela Babilonia ni nyuwo khamunrowa okhala-tho mwene.’

Babilonia aakhalano exiri yoolipa ni aarukureriwa ni mooloko woowiixa. Mwaha wa yeeyo, atthu ootheene yuupuwela weera khaavo aarowa omutuphela Babilonia. Menento, ohiyu omoha epakiwaka efeesta, anakhotto oMedia ni oPersia, yaamutuphela Babilonia. Mwene oPersia yoowo iitthaniwa Kiro, a ahapuxa maahi aweleelihaka mooloko. Nto eyo yaahaakhweihera anakhotto awe weera ewere olapuwa ni ophiya milako sa oBabilonia. Emaara yaaphiñyaaya iwe, yaaphwannye milako sootheene sihulinweene! Anakhotto ale yaavolowa ootheene, ni yanwina Babilonia ni yaamwiiva mwene Balthazari. Nto Kiro aakhala mwene oBabilonia.

Evinreene eyaakha emoha, Kiro aahaaleela atthu ootheene eeraka: ‘Yehova ookiruma weera kireherere etemplu oYerusalemu. Kinimwaahiya atthu ootheene oYudeya antthuna orowa okhavihera muteko owo.’ Hiihaale ntoko Yehova aalaihenraawe, ayuda antxipale yaatthikela oYerusalemu sivinreene iyaakha 70 Yerusalemu anyaanyinweene. Kiro aatthikiha ikoopho sootheene sa ewooru ni sa eparatha ni itthu sootheene Nabukodonosori aakunxaawe otemplu. Nyuwo mohoona moota Yehova anvarihenlaawe muteko Kiro weera aakhavihere atthu awe?