Estheri aavuluxa muloko awe

Estheri aari muthiyana mmoha oYuda yoowo aakhala oSusa, esidade emoha yiitthaniwa Persia. Owo aakhala iwe, mwaha wooweera mwa iyaakha sa muttuli, Nabukodonosori aakumihawo emusi awe oYerusalemu. Estheri aahuuwale ni Mardokeyi, pirimu awe. Mardokeyi aanvarela muteko Asuwero mwene oPersia.

Mwene Asuwero aamutthuna pwiyamwene mmoha munyowani. Nto, anamuteko awe yaahaakuxa asithiyana oreera a omwene, omuhela mpuwa Estheri yaaroihaka wa yoowo. Moomusuwela taani mwene amuthanliyaawe? Estheri! Menento Mardokeyi amuleela owo weera ahimuleele mutthu weera aari mwaana aYuda.

Moomweneni aakhala mulopwana mmoha oowiisunnuwiha iitthaniwa Hamani owo aari muhooleli aasitokweene, ni aatthuna weera atthu ootheene ekokhoreke ohoolo wawe. Menento Mardokeyi khaakokhora ohoolo wawe. Eyo yaamunyonyiha Hamani mpaka owo otthuna omwiiva Mardokeyi! Ni oonelelakaru weera Mardokeyi aari muYuda, Hamani aakhalano miruku weera awiive aYuda ootheene. Owo aahimweerela mwene: ‘Ayuda toowoopiha! Onnareerela weera nyuwo pwiya mwaathorihe.’ Mwene Asuwero iiwakaru eyo, aamuhiya Hamani okumihera nlamulo. Nlamulo nno naahima weera, aYuda ootheene yaamurowa wiiviwa nihiku na 13 mweeri wa Adari. Mene Yehova annoona itthu sootheene iye.

Estheri khaasuwenle nlamulo nne. Nto, Mardokeyi aarumiha ekopiya emoha ni aahima weera owo aatthuneya orowa wuuluma ni mwene. Estheri aahaakhula: ‘Mene mutthu ootheene onrowa wuuluma ni mwene ahiwompwale pooti wiiviwa. Ni aavira mahiku 30 owo ahikiitthanne! Mene miyo kinoorowa. Wakhala weera mwene onookeemexera mukopo awe miyo kinookhala mukumi. Aahikeemexera, miyo kinimookhwa.’

Nto Estheri aarowa mpaka vaate va mwene. Mwene amoonakaru Estheri owo aaheemexa mukopo awe. Owo aarowa mpaka wa Asuwero, ni aamukoha: ‘Etthu heeni kintthuneyaaka woopakela weyo, pwiyamwene Estheri? Estheri waakhula enre: ‘Miyo kintthuna woowopani nyuwo pwiya, ni Hamani weera natxe yootxa yoothanleya.’ Mpuwa mwa yootxa ele, Estheri anwopa mwene ni Hamani weera emutxe xantar mukina. Xantar anaaveeli mwene aamukoha veeli, etthu aatthuneyaawe ompakela Estheri. Estheri aaheera: ‘Ookhala mutthu ontthuna owiiva atthu a nloko naka. Ni okiiva miyo-tho, txontte munivuluxe!’ Mwene aamukoha: ‘Mene taani ontthuna owiivani nyuwo pwiyamwene?’ Estheri aahaakhula: ‘Hamani, mulopwana owo oonanara murima!’ Asuwero aanyonyiwa vantxipale, emaara ene yeele Asuwero aalamula wiiviwa Hamani.

Mene khaavo eera atxentxe nlamulo na Hamani naari mwene. Avinyaka, Asuwero aamweeriha Mardokeyi okhala muhooleli aasitokweene, ni aamuhiya weera Mardokeyi apake nlamulo nikina. Nlamulo nno naahima weera emaara ayuda yeeraaya etupheliweke yaahereke wiisaakiha. Vano, nihiku na 13 na Adari, ayuda yaahaawina amwiittani aya. Muhoolo mwaya, aYuda yannatthapela oweera iwo iyaakha sootheene.