Yesu aamulamiha mutthu oohoona

Afarisi khiyaasiveliwa ni Yesu ni yannaasaasera etthu weera enwalele. Awo yannahima weera Yesu khawaatthuneya waalamiha atthu nihiku na esaabadu. Mene esaabadu emoha, Yesu aamoona mulopwana mmoha oohoona avekaka musurukhu ni aaweerela atthareli awe weera aamurowa omulamiha mulopwana ole ni owera wa Muluku. Nto, Yesu aaheetheya etthaya ni mare awe, aahela mmaithoni mwa mulopwana ole ni aaheera: ‘Orowe ni wasuusule omooloko wa oSilowe.’ Mulopwana ole aapaka ele Yesu aamurummaawe. Nto, mwa emiravo awe yootheene, owo aahipatxera woona.

Atthu khayaaroromela weera aari mulopwana yoole aayarinwe ahoonaka. Nto mwa ikwaha sootheene, mulopwana ole eera weera aari yoowo. Nto, atthu yannamukoha moota owo aalamihinwaawe. Mulopwana ole ahimakaru etthu yeereñye, atthu yaamukuxera wa afarisi.

Mulopwana ole aahima moota aalamihinwaawe nihiku nne na esaabadu. Nlamulo na Muluku naahima weera khaavo eera avareke muteko nihiku na esaabadu. Mwaha wa yeeyo afarisi ale yaaheera: ‘Yesu owo olaminhe nihiku na esaabadu?’ Nto, khaiyene Muluku onanvaha owera iwo. Mene afarisi akina yaahima weera Yesu aawera waalamiha atthu mwaha wooweera Muluku aanvaha owera.

Avinyaka, afarisi yaawiitthana asipapawe mulopwana ole ni yaahaakoha moota owo aaweraawe woona. Asipapawe yannoova vantxipale. Yannoova woomoliwa musinakooka ni afarisi. Mwaha wa yeeyo awo yaahima weera khiyaasuwenle eetthu. Nto, afarisi yaarowa veeli omukoha mulopwana ole. Owo aahaakhula: ‘Miyo koohima moota kilammaaka, mene nyuwo khamuntthuna okiroromela.’ afarisi ale yaanyoonyiwa vantxipale ni yaamoomola mulopwana ole musinakooka.

Yesu aasuwela itthu sootheene iye ni aarowa wuuluma ni mulopwana ole: ‘Weyo wookhalano nroromelo ni Mesiya?’ Mulopwana ole aaheera: ‘Pwiyaka, Mesiya taani?’ Yesu aaheera: ‘Miyo ka Mesiya!’ Mweekhaikhai, mulopwana ole iiwakaru ele, aakhalano nroromelo. Yesu aari mutthu ooreera murima ohiya paahi omulamiha mulopwana ole, mene aapwattha nroromelo nawe.