“Elapo enoorowa okhala eparayiisu”

Yehova oolaihera: ‘Oriipiwa murima, woona ovoreya, iretta ni okhwa khasinrowa okhala-tho veeli. Miyo kinoopuputtha maithori aatthu ootheene, ni khaavo onrowa wuupuwelelaka itthu soonanara.’

Yehova aatthuna weera Adamu ni Eva ekhaleke oohakalala ni a murettele ojardim wa Edeni. Awo yaarowa omukokhorelaka Muluku ni waayara anamwane antxipale mpaka osareya elapo ya vathi. Adamu ni Eva khayaamwiiwelenle Yehova, mene nlelo Yehova ontthuna weera elapo ekhale eparayiisu. Mwa eliivuru ela hiyo nohoona moota Muluku okwanihenraawe soolaihera sawe sootheene. Ni Omwene wa Muluku onoorowa owiiha itthu sootheene sooreera Yehova aamulaihenraawe Abrahamu.

Diabo, mademoniyu ni atthu ootheene oonanara murima enoorowa onyaanyiwa. Atthu ootheene a wiirimu ni elapo ya vathi enoorowa omukokhorelaka Yehova. Khaavo onrowa ovoreiwaka ni khaavo onrowa okhwaaka. Mahiku ootheene, ninrowa ovinyaka nihakalanleene ni ekumi yooreera. Elapo enoorowa okhala eparayiisu! Atthu ootheene enoorowa okhalano yootxa yooreera ni enoorowa okhalaka impa soovareleleya ehoovaka etthu. Atthu khenrowa okhalaka oowali naari khenrowa waavulalihaka akhwaaya. Asinama khenrowa onoovaka, ni hiyo-tho khaninrowa owoovaka.

Munnawera wuupuwelela moota onrowaaya okhala wooreera Yehova apatxera waavinyereriha atthu? Hiyo nnoorowa waasuwelaka atthu yaakhanle etempu ya khalayi, ntoko Abeli, Nowa, Abrahamu, Sara, Mose, Ruthi, Davidi ni Estheri. Awo enoorowa onikhavihera otatuxa elapo okhala eparayiisu. Ikwaha sootheene nneereke okhalano muteko muntxipale weera nivareke!

Yehova ontthuna weera nyuwo mwakhale oparayiisu! Khaninwera wuupuwelela itthu ikavi nneeraahu naxuttere woohima sa Muluku. Nto, nenne nxiiye mukhaleke nthamwene a Yehova. Mwa yeeyo, nyuwo munoorowa okhala nthamwene awe mwa mahiku ootheene!