Soohimmwa sa madelegado

ANAMATHOONYERA Muteko aya wookhaviherani. Txontte, nwiiweleleke muttharaka itthu anhima aya woohima sa weemexa itxinka, moota wooweetteetta, moota woowasunkera mapuro amusaanyu ni ale munaasuwelaanyu, ni nyaha ikina awo anhima aya.

OBATIZO Ale anrowa obatiziwa mapuro aya eri ohoolo, waattamela otribuna yaahikhanle matxentxo makina. Ale anrowa obatiziwa, ekilaathiki mapuro ala ohinaakuve ene mwaha wa obatizo, yoowo onrowa opakiwa nihiku na eSaabado oxeexelo. Txontte, ale anrowa obatiziwa eruuheke yoowaraaya ni ekhaleke yoohuliha muru.

SOOVELEELA Weera nipake muthukumano ola, waatthuneya musurukhu mwintxipale weera irehereriwe ihitxe, ikaruma sooruma, ikaruma sa iviidiyu ni miteko mikina, weera muthukumano ola okhale wootepa oreera ni onikhavihera omwaattamela Yehova. Yooveleela anyu yoohinyesereriwa enookhavihera vantxipale muteko wootheene ovariwe ni muteko wa elapo yootheene. Mwaatthunaka ovaha musurukhu anyu, sookhala ikaaxa siri mukhwipi va muthumanoni va. Nyuwo-tho pooti ovaha yooveleela anyu nvarelaka muteko esaite ahu, donete.jw.org. Sooveleela sootheene sinnaheliwa mwiitti. Mukuttula Woolamulela onnaxukurela vantxipale mwaha wa soovaha sanyu sinkhavihera miteko sa Omwene.

MAKHAVIHERO A ERETTA YOOTUTUXERA Txontte, musuwele weera enkhaviheriwa paahi atthu yaakhumelenle eretta yootutuxera.

ITTHU SOORIHEYA NI SOOTTOTTIWA Itthu sootheene siriheñye naari sittottiwe siroihiwe edepartamentu ela. Wakhala weera yohooriheyani etthu, txontte murowe wa anna yaawo envara edepartamentu eyo, weera mwahime etthu yoomonreni. Naari-tho wakhala weera moomuttotta mwaana, mmuroihe nipuronene nenna. Nto weera asinna awo muhavahe muteko mutokotoko, txontte mwaathokororeke anamwane anyu, muhahiyeke yoorakamelakani.

MAPURO OOKILAATHI Txontte, nwuupuweleke atthu akina. Muupuweleleke weera mwatthunaka waasunkera nipuro amusi anyu, ale munaasomiha anyu Biblya ni atthu munaasuwelaanyu mwaasunkereke yaaworu paahi. Muhisunkeke nipuro nneera nihikilaathiwe.

WIIVAHERERA OVARA MUTEKO Wakhala weera munnatthuna okhavihera ovara muteko ori poothe vamuthukumanoni va, mwaaleele asinna anvara edepartamentu ya oowivaherera ovara muteko.