Ntheli—ti namahuku ootheene

Vaavo ntheli na makristu ninkhalaaya nooreera, awo annanvuwiha Yehova ni ntheli nno ninnakhala noohakalala. (Mk 10:9) Ntheli weera nikhale noohakalala ni noolipa, makristu entthuneya ohikuxera matheela miruku simphwanyeya mBiblyani voohima sa omuthanla nnene ole munrowaanyu othelanano.

Neereke nyuwo mummwaasa mutthu weera muthelaneno? Muupuweleke weera waamukhala nnene oweherera ovira “iyaakha sa omiravo”, eyo tiiyo, oweherera ovira etempu yeele amiravo antepaaya otthuna okonihana. Mwaha wooweera etempu eyo pooti ovoleela soothanla sanyu. (1Akor 7:36) Muttottele mureerelo vaavo muraanyu muttiye weera mulipihe onthamwene anyu ni Yehova ni weera mukhaleno mikhalelo se ekristu. Mwapaka eyo, munookhala oolikaneene weera mukhaleno ntheli noohakalala.

Muhinaaye othela naari otheliwa, nviriheke etempu yintxipale ni mutthu owo muntthunaanyu othelanano weera musuwele “mpuwa mwa murima” wa mutthu owo. (1Ped 3:4) Yakhala etthu mummuhovelaanyu namorado anyu, mutthekuleno voohima sa itthu iyo munhovelaanyu. Ntoko hiihaale eneereyaaya ni matheli makina aatthu, vanthelini vanyu mwasaseke vantxipalevene etthu muneeraanyu mpake weera mwavahe amwaarinyu naari aiyanyu, ohiya ele muneeranyu mwakhele wa ole muthelannanyuno. (Af 2:3, 4) Wakhala weera nyuwo munoovarela muteko miruku sa mBiblyani muhinaaye othela naari otheliwa, munoorowa okhalano ntheli noolipa ni noohakalala mwathela vale naari mwatheliwa.

OONELE EVIIDIYU ENEERA: WA ALE ANUUPUWELA OTHELA NAARI OTHELIWA—EPARTE 3: ‘MPHIME MUTHENKO AYA’, AVINYAKA MWAAKHULE MAKOHO ALA:

• Namoru anviidiyuni amurokora ni Shane oneetta hayi?

• Murokora ole apatxerakaru omusuwela nnene Shane oonelenle eheeni?

• Asipapawe murokora ole yaamukhavihenre moota heeni, ni yoothanla heeni ya miruku murokora ole apankaawe?