Makoho empakiwa ni ale ensoma irevista sahu

Masu elempwale va 2 Atesalonika 3:14 yaari yoothanla empakiwa ni muloko naari ni mukristu ori poothe?

Murummwa Paulo aahaalepela akristu a oTesalonika eeraka: “Vano akhalá mutthu ohinatthara nsu nahu na ekaratta ela, mmusuwelihe yowo.” (2 Ates. 3:14) Khalayi naahima weera iya saari miruku yaavahiwaaya asitokweene a mmulokoni. Wakhala weera mutthu anvirelela okhootta miruku sa mBiblyani nnaamweera avahinweene miruku ikwaha sintxipale, asitokweene a mmulokoni yannatthuneya ohima mmulokoni weera mutthu owo oottaruxiwa. Okhuma vaavo, namalaleera ori poothe khaarowa otthekulaka nuuwo.

Menento onnatthuneya opakiwa matxentxo. Onooneya weera miruku Paulo aavanhaawe, aahima etthu yeeyo mukristu meekhaawe ontthuneyaawe othanla wakhala weera yookhumelela etthu ntoko eyo. Vano, khontthuneya asitokweene a mmulokoni ohima weera mutthu owo oottaruxiwa. Mwaha wa heeni epakinwaaya matxentxo ala? Nrowe noone etthu Paulo aatthunaawe ohima.

Paulo aahoonelela weera atthu a muloko ole ‘yaakhalano mweettelo woohireera.’ Awo khiyaatthara miruku yaavahiwaaya. Oxekura wawe wa muttuli, owo aavaha nlamulo eeraka: “Akhalá mutthu ohintthuna ovara muteko, yole ahitxe tho.” Mene nnaamweera vareene hiiho, atthu akina yannakhootta ovara miteko weera yiitxiheke, nnaamweera yaawera opaka itthu iyo. Opwaha mwa yeeyo, awo yanniivoleihera nyaha sa atthu akina. Moota heeni akristu yaarowaaya waathokororaka atthu ntoko awo? — 2 Ates. 3:6, 10-12.

Paulo ohimme ha: “Mmusuwelihe yowo.” Ni ekereku, masu ala entaphulela wiikosoopa ni mutthu owo. Paulo aavaha miruku iya muloko wootheene, ohiya paahi asitokweene a mmulokoni. (2 Ates. 1:1; 3:6) Mwa yeeyo, yoole ori mukristu aarowa omoona munna naari murokora ahittharaka miruku sa Yehova, aamurowa othanla ‘omusepa’ munna naari murokora owo.

Neereke eyo entthuna ohima weera mutthu owo waatthuneya othokororiwaka ntoko mutthu okumihinwe mmulokoni? Hooye, mwaha wooweera Paulo aahaatxeerera eeraka: ‘Nvirelele omulaka ntoko munna.’ Mwa mukhalelo ene yoola, akristu yaaheereke okhala vamoha nuuwo mmithukumanoni naari mmutekoni moolaleera, mene yaaheereke wiikosoopa weera ehikhale vamoha ni mutthu owo vaavo entthekulaaya. Mwaha wa heeni? Paulo enre, “Wera ùliwe muru.” Etthu enkhumelela wakhala weera nnoohiya okhala ni mutthu owo, owo pooti wuuliwa muru ni otxentxa mikhalelo sawe. — 2 Ates. 3:14, 15.

Moota heeni olelo akristu enrowaaya ovarihela miruku iya? Nihinaaye, nintthuneya osuwela wakhala weera mukhalelo wa munna naari murokora owo ‘ti woonanara’ tthiri ntoko Paulo olempaawe. Owo khaiyene aahima ovirikana miyoonelo naari yoowuupuxera ya murima, naari ovirikana wa soothanla sa mutthu mwaneene. Naari owo khaahima atthu ale ennyoonyinhe. Opwaha mwa yeeyo, Paulo aahima otepaxa wene yaale enthanla moolakela ohitthara miruku sa Muluku.

Olelo, namoona munna naari murokora ahittharaka miruku sa Yehova,a hiyo pooti opaka yoothanla ya mutthu mwaneene, yoohiya otthekula ni mutthu owo vaavo nintthekulaahu ni atthu akina. Okhala weera ela yoothanla ya mutthu mwaneene, hiyo khontthuneya waaleela moowaakuveya atthu akina. Hiyo nneereke okhala vamoha ni mutthu owo, mmithukumanoni mwahu ni mmutekoni moolaleera. Areherera vale mukhalelo awe, hiyo nneereke otthekulano mutthu owo nnene sene.