Munvariheleke muteko Biblya ntoko espelyu

Murummwa Yakobe oomulikanxera Biblya ni espelyu yeeyo ennikhavihera woona omutthu ahu wa mpuwa. (Yak. 1:22-25) Moota heeni ninrowaahu onvarihela muteko Biblya nnene sene ntoko espelyu?

Musomeke moomaaleleya. Wakhala weera ninniiwehera moowaakuveya va espelyu, hiyo pooti ohiwera woonelela itthu soohireerela nintthuneyaahu oreherera. Vamoha-moharu, wakhala weera ninnamusoma Biblya moowaakuveya, hiyo khaninwera woonelela itthu nintthuneyaahu otxentxa. Nto weera noonelele itthu nintthuneyaahu otxentxa, ninthuneya omusomaka Biblya vakhaani-vakhaani.

Mwiiwehexexeke mwaneene anyu ohiya waawehexexa atthu akina. Wakhala weera espelyu onwehihiwa mutthu mukina, hiyo pooti woonelela mikhalelo soohireerela sa mutthu owo. Moolikana ni eyo, hiyo pooti onvarihela muteko Biblya weera noonelele mikhalelo soohireerela sa atthu akina. Mene eyo khenrowa onikhavihera oreherera makhalelo ahu.

Muhiwehexexeke mikhalelo sanyu soonanara paahi. Wakhala weera ninwehexexa mikhalelo sahu soonanara paahi va espelyu, hiyo pooti okhulumuwa. Vaavo nimmusomaahu Biblya nintthuneya okhala atthu oowiiyeviha ni khanintthuneya owehexexa paahi mikhalelo sahu soonanara opwaha moota Yehova onnoonelaawe. — Yak. 3:17.