Muluku oopattuxa erimu ni elapo

Yehova Muluku ti Mpattuxa ahu. Owo oopattuxa itthu sootheene sikhanle, itthu ninweraahu woona ni itthu nihinweraahu woona. Woopatxerani, Muluku ahipankeene itthu nnoonaahu, owo aapaka malaika mantxipale. Malaika taani, neereke nyuwo moosuwela? Malaika soopattuxiwa seiyo Muluku opankaawe seiyo sinlikana ni yoowo. Hiyo khaninwera woona malaika, ntoko hiihaale nihinweraahu omoona Muluku. Nlaika noopatxera Yehova aapankaawe naahikhala namakhaviheraawe. Nlaika nno naamukhavihera Yehova opaka itheneeri, iplaneta, ni itthu ikina. Emoha ya iplaneta iyo, ti elapo ya vathi, nipuro nooreera hiyo ninkhalaahu.

Yehova oopaka elapo ya vathi, weera asinama ni atthu ekhalekemo. Owo oopaka weera waara wa nsuwa ophiyeke elapo ya vathi. Moottharelana, owo aapaka miyaako, iphareya ni miyooloko.

Avinyaka ti heeni yeereñye? Yehova ohimme ha: ‘Miyo kinoopaka malaxi, miri ikhaanene ni miri itokweene.’ Mene aapattuxa soowiima sintxipale, makukhu ni ifiloori valaponi. Avinyaka aahapaka asinama ootheene valaponi. Nyuwo annoosivelani asinama? Mwaamunama heeni ontepa woosivelani vantxipale? Yehova ohaapaka asinama eneetta, envava, enkhala mmahini ni aniipurula. Owo ohaapaka asinama akhaanene ntoko ahukula ni atokotoko ntoko itthepo.

Avinyaka Yehova aaherela nlaika noopatxera naamukhavihera: “Nrowe naapake atthu weera ekhaleke valaponi.” Atthu anoorowa okhala oovirikana ni inama. Awo anoorowa opakaka itthu, wuuluma, otheya ni ovekela. Awo anoorowa okosoopaka elapo ni inama. Nyuwo moosuwela nsina na mulopwana oopatxera opattuxiwa a elapo ela ya vathi? Nrowe noone.