Mulopwana oopatxerani muthiyana oopatxera

Yehova aapaka ejardim nipuro nenno niithaniwa Edeni. Ejardim eyo yaakhalano ifiloore sintxipale, miri ni inama. Nto ameyaka etthaya vakhaani, Muluku ampaka mulopwana oopatxera ni aamwiiseelela mphulani mwawe. Moosuwela etthu yeereñye? Mulopwana owo aakhalano ekumi, ni Yehova aahinvaha nsina na Adamu, ni aamweerela weera akosoopeke ejardim ni othanla masina a inama sootheene.

Yehova-tho anvaha nlamulo Adamu: ‘Pooti otxeeke soowiima sootheene siri ojardim nno. Mene wookhala mwiri mmoha woothanleya, ohitxe mwiri owo, wapaka eyo, onookhwa.’

Noovira etempu vakhaaneene, Yehova aalakela ompaka muthiyana weera amukhavihereke Adamu. Moota heeni aapankaawe eyo? Woopatxerani, aamweeriha Adamu okona, avinyaka aavarihela muteko niparari nawe weera ampake mwaarawe. Owo iithaniwa Eva. Adamu ni Eva naari ntheli noopatxera. Neereke Adamu aamusivela mwaarawe? Owo aahakalala vantxipale ni aaheera: ‘Etthu Yehova opankaawe nniparari naka ti yootepa oreera, mweekhaikhai ompaka mutthu yoowo onlikana ni miyo.’

Yehova aamweerela Adamu ni Eva weera ekhalekeno anamwane ni esareye elapo yootheene. Muluku aatthuna weera evareke muteko vamoha, moohakalala weera etatuxe elapo yootheene okhala eparayiisu. Eparayiisu nipuro nootepa oreera, ntoko ejardim ya wEdeni. Nto elapo khaiyene eparayiisu, mwaha wa heeni? Nrowe noone.