Kayini aanyoonyiwa vantxipale

Adamu ni Eva ekhumakaru ojardim wa Edeni, awo yaahayara anamwane antxipale. Oopatxera aari Kayini anaaveeli ari Abeli. Kayini aari namalima, naari neere, annaphatteya makukhu. Abeli aari mukukhuli, naari neere, annakosopa iputtiputthi.

Nihiku nimoha, Kayini ni Abeli yaahilakela onvaha Yehova soovaha. Nyuwo moosuwela moota atthu yiitthanaaya soovaha iyo? Yoovaha naari mukuttho. Yehova aahakalala ni yoovaha ya Abeli, mene khaahakalanle ni yoovaha ya Kayini. Eyo yaamweeriha Kayini onyoonyiwa vantxipale. Yehova aahoonelela eyo ni aamweerela weera wakhala weera anvirelela opaka eyo aamurowa opaka etthu yoonanara. Mene Kayini khaiwelenle.

Opwaha mwa yeeyo, owo aamweerela Abeli: ‘Nrowe omatta.’ Ereenesa meekhaaya, Kayini aamwiiva Abeli. Yehova aanyoonyiwa vantxipale ni Kayini. Mwaha wa yeeyo, aamurakameliha ni amusi awe. Kayini khaarowa otthikela-tho owannyawe.

Etthu heeni ninxutteraahu? Ikwaha ikina, itthu khasinkhumelela ntoko nintthunaahu, ni eyo pooti oninyoonyiha vantxipale. Noonelela eyo, naari mutthu mukina anileela, hiyo nintthuneya wiikosoopa. Nintthuneya owehexexa itthu sinnixupa. Naahipaka eyo miyuupuwelo soonanara pooti waatxeerereya ni oneeriha opaka etthu yoonanara.

Neereke Yehova oomuttiwala Abeli? Hooye. Abeli aari mulopwana mmoha aamusivela Yehova. Mwa yeeyo, Yehova khanrowa omuttiwala owo. Nto, elapo yakhala eparayiisu, Yehova onoorowa onvinyereriha Abeli weera akhaleno ekumi veeli.