Yoolaihera yootepa otthuneya

Sivinreene miyeeri miili ekhumakaru wExipitu, ana a Israeli yaaphiya waattamela omwaako Sinayi ni yaakhala iwe mwa etempu vakhaani. Iwe, Yehova aahimuruma Mose weera awele mwaako Sinayi ni aamweerela: ‘Miyo kohaavuluxa ana a Israeli. Wakhala weera awo enoopaka itthu sootheene kineeraaka kaarumeke, awo enookhala atthu aka oothanleya.’ Mose aakhuruwa omwaako ni aahaalela ana a Israeli etthu Yehova aamulenlaawe. Moosuwela etthu ana a Israeli yaahimmaaya? Hiyo nneereke opaka itthu Yehova aneeraawe anirumeke.

Mose aawela-tho ekwaha yanaaveeli omwaako Sinayi. Yehova aamweerela owo weera: ‘Kinoorowa wuuluma ni ana a Israeli mpuwa mwa mahiku mararu. Waaleele awo weera ehiwele mwaako Sinayi.’ Mose aakhuruwa omwaako ni aahaaleela ana a Israeli weera yiireherereke, mwaha wooweera Yehova aakhalano etthu yootepa otthuneya weera aaleele.

Evinreene mahiku mararu, ana a Israeli yaaweha etari ni nihutte nimoha nooriipa nikhunenleene mwaako Sinayi. Nave-tho awo yaahiiwa okukutteya waanyakula vantxipale ni yaahiiwa oruma wa nipenka. Avinyaka, awo yaahoona mooro okhuruwaka omwaako. Yoonakaru itthu sootheene iyo, ana a Israeli yaahoova vantxipale. Mwaako ole waakhuneeliwa ni mwiixi ni wannatetereya ni ikuru, ni oruma wa nipenka wannaatxeerereya vantxipale. Nto variyari va mooro, ana a Israeli yaahiiwa nsu na Muluku neeraka: ‘Miyo ka Yehova. Nyuwo khamuntthuneya omukokhorela Muluku mukina.’

Mose aawela veeli omwaako Sinayi, ni Yehova aamuleela owo malamulo ana a Israeli yeeraaya yiiweleleke. Malamulo awo yaahima moota ana a Israeli yeeraaya emukokhoreleke Muluku. Nave-tho yannahima etthu yeeraaya epakeke ni etthu yeeraaya ehipakeke. Mose aalepa sootheene ni aasoma ohoolo wa ana a Israeli. Nto ana a Israeli yaalaihera: ‘Yehova, hiyo nnoopakaka itthu sootheene nyuwo munnirumaanyu.’ Mene neereke awo yaapaka etthu yaalaihenraaya?