Yehova aamuthanla Yehoxuwa

Mose aahaakosoopa ana a Israeli mwa iyaakha sintxipale, menento ekumi awe yannamala-mala. Yehova aamweerela: ‘Weyo khonrowa waakuxa ana a Israeli waaroihaka oKanani, elapo yeeyo kaalaihenraaka waavaha awo. Mene kinimoohiya weyo woona elapo eyo orakamenleene.’ Nto Mose aahinvekela Yehova weera amuthanle mulopwana mmoha aarowa waahoolelaka ana a Israeli. Yehova aamweerela: ‘Omukuxe Yehoxuwa, ni omuleele weera koomuthanla.’

Nto Mose aahaaleela ana a Israeli weera aahanle okhwa, ni weera Yehova oomuthanla Yehoxuwa weera aahooleleke mpaka oKanani, elapo yaalaiherinwaaya. Avinyaka, Mose aamweerela Yehoxuwa: ‘Ohoove. Yehova onoorowa wookhavihera weyo.’ Avinyaka, Mose aawela vasulu va mwaako wiitthaniwa Nebo, ni Yehova aamuhiya Mose woona elapo yootheene, yeeyo aalaihenraawe onvaha Abrahamu, Isakhi ni Yakobe. Nto Mose akhwiiye areeneno iyaakha 120.

Yehova aamweerela ha Yehoxuwa: ‘Olapuwe mooloko Yordani ni ovolowe oKanani. Miyo kinoorowa wookhavihera ntoko hiihaale kaamukhaviheraaka Mose. Osomeke mahiku ootheene malamulo kaavanhaaka ana a Israeli. Ohoove. Olipe murima. Orowe ni opake sootheene koorummaaka.’

Nto, Yehoxuwa aahaaruma anamahottela eeli weera yahottele esidade ya oYerikho. Sooweereya sinttharelana, nnoorowa osuwela vantxipale woohima sa itthu seereñye iwo. Anamahottela ale etthikakaru, awo yaahima weera yaari ewoora yooreerela ovolowa oKanani. Nto Yehoxuwa aahaaleela ana a Israeli weera yiireherereke, mwaha wooweera yaamurowa olapuwa mooloko Yordani. Owo aahaaruma anamakeya weera eteexe nivuku na nivarihano weera ehooleke. Ephiyakaru mooloko Yordani, yaahoona weera mooloko waasareya maahi, ni olapuwa waarowa okhala woowoopiha. Mene, anamakeya ale ehelakaru metto saya mmaahini, maahi khiyaavira ni yaapatxera oweleela. Anamakeya yaaheemela variyari va mooloko, yaawehereraka ana a Israeli ootheene olapuwa. Moohihovela, eyo yaaweeriha ana a Israeli wuupuwelela etthu Yehova aapakenlaawe elapuwaka ephareya yooxeera.

Okhwipi waya, sivinreene iyaakha sintxipale, ana a Israeli yaaphiya elapo yoolaiheriwa. Awo yaamurowa opakaka impa saya ni isidade. Awo yaamurowa ophatteyaka itthu yeeraaya etthuneke. Yaari elapo yootepa oreera.