Ruthi ni Nowemi

Ekwaha emoha, yaapatxera othowa yootxa wIsraeli. Nto muthiyana mmoha iitthaniwa Nowemi, aathaamela oMowabi ni aiyawe ni anamwane awe eeli asilopwana. Noovira etempu aiyawe Nowemi yaahookhwa, ni anamwane awe asilopwana yaahaathela asithiyana eeli oMowabi. Yaawo yiitthaniwa Ruthi ni Orpa. Mooriipiha murima, evinreene etempu vakhaani, anamwane ale asilopwana a Nowemi yaahookhwa-tho.

Nowemi asuwelakaru weera wIsraeli yaakhalawo yootxa, aalakela otthikelawo. Ruthi ni Orpa yaarowa nuuwo. Nto mpuwa mwa ekwaha, Nowemi aaweerela awosa: ‘Nyuwosa mohaareerela murima anamwane aka vamoha ni miyo. Miyo kintthuna weera nyuwosa mutheliwe veeli. Mutthikeleke owaani waasipapinyusa.’ Awosa yaahaakhula: ‘Nowemi, hiyo ninnoosivela weyo. Hiyo khaninrowa woohiya.’ Nowemi aavirelela oweerela Ruthi ni Orpa weera etthikeke. Orpa aalakela otthikela owannyawe ni waatthikela amiluku awe. Mene Ruthi aamweerela Nowemi weera aroweke nuuwo. Nto Ruthi annamusivela vantxipale Nowemi. Owo aamwaakhula: ‘Nowemi, miyo nkinrowa woohiya weyo. Muloko aa onoorowa okhala muloko aka, ni Muluku aa onoorowa okhala Muluku aka.’

Nto Ruthi ni Nowemi yaaphiya wIsraeli. Nihiku nimoha Ruthi aarowa ovara muteko uurulaka makala a triku ematta ya Bowazi mwaana a Rahabi. Bowazi aahiwa weera Ruthi aari nthamwene ekhaikhai a Nowemi. Mwaha wa yeeyo, owo aaharuma anamuteko awe weera emuhiyeke Ruthi ottotta makala yaahala eeraawe awerelekevo.

Ruthi aphiyakaru owannyawe ohiyu, Nowemi aamukoha: ‘Olelo nvanre muteko woowi?’ Ruthi aahaakhula: ‘Ematta ya mulopwana mmoha onitthaniwa Bowazi.’ Nowemi aamweerela: ‘Bowazi, aari mmoha a emusi ya aiyaka. Ovirelele ovara muteko mmattamwawe ni asimwali akina. Iwe, khaavo aneera ooxupeke.’

Ruthi aavirelela ovara muteko mmatta mwa Bowazi, mpaka omala ohattiwa. Bowazi aahoonelela weera Ruthi aari muthiyana ooreera murima ni oovara muteko. Nto Bowazi aathelana nuuwo. Awosa yaakhalano mwaana iitthaniwa Obede, moovira etempu owo aakhala vovo a Davidi. Asinthamwene awe Nowemi yaahakalala vantxipale ni yaamweerela ha: ‘Yoopatxera, Yehova ohoovaha Ruthi, yoowo ooreerenle murima weyo. Vano weyo wookhalano musulwaa. Nrowe nimuxukurele Yehova mwa sootheene iyo.’