Yoolaihera ya Yefte

Veeli-tho, ana a Israeli yaahiya omukokhorela Yehova, enaakokhorela amuluku eethiru. Mene amuluku awo eethiru khayaakhavihera ana a Israeli emaara atthu a wAmoni yaawiiyaaya owana naawo. Mwa iyaakha sintxipale, ana a Israeli khayaakhumela nnene. Mene nihiku nimoha awo yaaheera: ‘Yehova, etthu nipankaahu, khaiyene ti yooreera. Txontte munikhavihere!’

Ana a Israeli yaahinyaanya ilataratho sa amuluku aya ni yaatthikela omukokhorela Yehova. Mwaha wa yeeyo Yehova aalakela waakhavihera. Weera yaawine anakhotto a wAmoni, yaamuthanla muhooleli aya mmoha, nakhotto yoowo iitthaniwa Yefte. Mene ehinaaye okela okhottoni, Yefte aamulaihera Yehova: ‘Hiyo naawina anakhotto a wAmoni, mutthu oopatxera okhuma owannyaka, weera akaakhelele onoorowa woovarelakani muteko otapernaakulu ekumi awe yootheene.’ Nto ekhaviheriwaka ni Yehova, ana a Israeli yaawina ekhotto.

Emaara Yefte aatthikelawe owaani, mutthu oopatxera okhuma owannyawe omwaakhelela, aari mwanawe mwaamuthiyana. Owo aakhumme iinaka ni oopaka ekoma ekhaanini. Yefte aahuupuwelela etthu aaleihenraawe, ni aaxupeya vantxipale mwaha wooweera owo khaarinono mwaana mukina. Ankha vanonto, etthu heeni owo eeraawe apake? Owo aamuleela: ‘Miyo kaamulaiyera etthu emoha Yehova. Ni mwaha wa yeeyo, kinimookuxa weera wanvareleke Yehova otapernaakulu oSilo.’ Paapa, waari weera moopaka yoolaihera eyo, onnatthuneya okwanihera. Mene kihinaakuve opwaha, miyo kinoovekelani etthu emoha. Miyo kintthuna okhala naasinkhwaaka minyeeri miili ntthekulaka omiyaakoni. Mwanawe Yefte annavara muteko otapernaakulu ekumaawe yootheene. Asinkhwaawe, yannarowa vayaakhani omoha weera yamuxekure.