Yehova anvaha ikuru Sansoni

Ana a Israeli antxipale yaatthikela waakokhorela amiluluku eethiru. Mwaha wa yeeyo, Yehova aahaahiya ana a Israeli ohasuliwa ni Afilisti. Mene ana a Israeli akina yaavirelela omusivela Yehova. Mmoha a yaawo iitthaniwa Manowa. Owo ni amwarawe khayaakhanleno anamwane. Nihiku nimoha nlaika naaweerela amwarawe Manowa: ‘Yehova onimoovaha mwaana mmoha yoowo onkela waavuluxa ana a Israeli wa Afilisti. Mwaninyu owo onkela okhala munaziri.’ Moosuwela taani yaari manaziri? Yaari atthu yaanvarela muteko Yehova moothanleya ni khiyaamettha maihi aya.

Noovira etempu, Manowa ni amwaarawe, yaakhalano mwaana ni yanvaha nsina na Sansoni. Yehova aamweeriha Sansoni okhala mulopwana a ikuru vantxipale. Ni owo aawera omwiiva kharamu ni matataru paahi. Ekwaha emoha aahiwiiva Afilisti 30 meekhaawe. Afilisti yannamukhalela nrima owo ni yannaasaasa omwiiva Sansoni. Nihiku nimoha, Sansoni aakona esidade emoha yiitthaniwa Gaza. Afilisti yaatthuna omwiiva mwaha wa yeeyo, yaarowa mulako wa oGaza enwehereraka mpaka oxavo. Menento Sansoni aahivinya ohiyu eriyari ni aateexawo mulako wa esidade. Owo aateexa mulako mmakhatani aroihaka osulu wa mwaako yowo waari waattamela esidade ekina yiitthaniwa Hebroni!

Afilisti khiyaakhulumunwe omwaasaasa Sansoni. Mwaha wa yeeyo yaarowa oveka nikhavihero wa Dalila, namoraataawe Sansoni. Awo yaamuleela: ‘Hiyo ninntthuna onvara Sansoni. Wanleela esiiri awe yeeyo emmweeriha okhala ni ikuru vantxipale, hiyo nnimoovaha musurukhu woowaatta.’ Dalila annatthuna musurukhu ole vantxipale. Mwaha wa yeeyo aahaakhavihera Afilisti. Owo annamukohexexa Sansoni mpaka omuleela esiiri awe. Woopatxerani, Sansoni khaatthuna omuleela esiiri awe. Noovira etempu owo aamuleela: ‘Aani! Miyo kinoohima. Miyo kamunaziri, nkitonko omettha maihi aka. Wakhala weera mutthu mukina oomettha maihi aka miyo ikuru sinookimalela.’ Sansoni khaakhumenle nnene mwaha woomuleela esiiri awe Dalila! Moosuwela etthu owo aapankaawe?

Dalila aahivenya atthimakaka orowa waaleela Afilisti. Avinyakaru aatthika, owo aamweeriha okona vamettoni vawe ni aamuruma mutthu weera ametthe maihi awe. Mene Afilisti ephiyakaru, Sansoni aaheerera wiisaakiha menento ahoonelela weera ikuru sawe saahimala. Nto Afilisti yaahinvara Sansoni ni yaamuthorola maitho awe ni yaahinwalela mukateya.

Nihiku nimoha, Afilisti yaathukumana weera emukokhorele Dagoni muluku aya, awo yannakhuwela yeeraka hiyo nonvara Sansoni mwaha wooweera Dagoni onikhavihenre. Awo yaamweemexa vakhiviru ni mavatta meeli yawo yaalipiha empa ele yaaraaya, ni yaapatxera otheya ekhove awe. Maihi awe yeera yunnunweene veeli. Nto Sansoni aavekela: ‘Yehova txontte, mukivahe ikuru ekwaha ela paahi.’ Nto, Sansoni aakhala ni ikuru veeli ni aawera okakha mavatta ale yaavarelela empa ele. Nipuro nne yaakhalawo Afilisti antxipale ni empa ele yaahaamorela. Atthu ootheene yaahookhwa omuhela mpuwa Sansoni.