Yoottheka ya mwene Davidi

Sawuli akhwaakaru, Davidi aakhala mwene. Owo eera areeneno iyaakha 30. Ohiyu omoha, Davidi aamoona muthiyana mmoha ootepa oreera. Owo aasuwela weera iitthaniwa Bathixeba ni aathelinwe ni nakhotto mmoha iitthaniwa Uriya. Nnaamweera vareene hiiho, Davidi aamwiitthana Bathixeba owannyawe ni aamukoniha. Davidi aatthuna wiipithiha etthu aapankaawe amuthelaka Bathixeba. Mwaha wa yeeyo, aaheeriha weera Uriya iiviwe okhottoni. Uriya akhwaakaru, Davidi aathelana ni Bathixeba.

Yehova aahoona itthu sootheene soonanara Davidi aapankaawe. Nto, owo aamuruma Profeta Natani weera uulume ni Davidi. Natani aahimme ha: ‘Mulopwana mmoha a muhakhu aakhalano iputtiputthi sintxipale, ni mulopwana mukina oohaawa, aarinono eputtiputthi emoha yeeyo aasivelaawe vantxipale. Moosuwela etthu mulopwana a muhakhu aapankaawe? Aahiiya eputtiputthi emoha ya mulopwana oohaawa.’ Emaara Davidi iiwalaawe eyo, owo aanyoonyiwa vantxipale ni aahima weera mulopwana owo a muhakhu annaphwanela wiiviwa. Menento Natani, aahaakhula: ‘Menento ti yeeyo weyo opankaawe ni Uriya.’ Davidi aariipiwa murima vantxipale ni aahaakhulela weera aattheka. Mwaha wa yoottheka eyo, Yehova aahiya weera emukhumelele maxupo Davidi ni emusi awe. Menento okhala weera Davidi aahiiyeviha ni aahima etthu aapankaawe, Yehova aamulevelela.

Sivinreene iyaakha vakhaani, Davidi aatthuna ompakela Yehova etemplu. Menento Yehova aamuthanla Salomoni, mwanawe Davidi, weera apake eyo. Davidi aapatxera oreherera itthu sa Salomoni ni aahimme ha: ‘Okhala weera Salomoni nlelo mmiravo, ni etemplu ya Yehova entthuneya weera ekhale yootepa oreera, miyo kintthuna omukhavihera owo.’ Davidi aakumiha musurukhu muntxipale weera ovareliwe muteko wooteka. Owo aawiitthana anamuteko antxipale ni aathukumanya ewooru, eparatha weera sivareliwe muteko wooteka. Ahinaakuve okhwa, Davidi aamweerela Salomoni: ‘Yehova ookivekela weera kiwoonihere moota eneeraaya ekhale etemplu. Ohoove mwanaka, mwaha wooweera Yehova onimookhavihera. Mukhale oolipa nvare muteko!’