Etemplu ya Yehova

Salomoni akhalakaru mwene a wIsraeli, Yehova aamukoha: ‘Salomoni, ontthuna eheeni weera koovahe?’ Salomoni aahaakhula: ‘Pwiyaka Yehova, miyo ka mmiravo ni nkinsuwela etthu yoopaka. Txontte, mukivahe miruku weera miyo kiwereke okosoopa muloko anyu ola. Yehova aiwakaru eyo, aaheera: ‘Okhala weera weyo okivekenle miruku, miyo kinooweeriha okhala mulopwana a miruku valaponi vootheene. Miyo-tho kinooweeriha weyo okhalano muhakhu muntxipale. Ni wakiiwelelaru, weyo onookhalano ekumi iyaakha sintxipale.’

Salomoni aapatxera opaka etemplu. Asilopwana ni asithiyana antxipale yaavara muteko ole wooteka evarihelaka muteko ikaruma sooreerela. Sivinreene iyaakha 7, etemplu yaamala. Nto, Salomoni aalakela onvaherera Yehova etemplu. Owo aahela soovaha va altaari aakokhora ni aapaka nivekelo: ‘Yehova, nyuwo pwiya munnaphwanela nipuro nooreerela opwaha etemplu ela. Txontte mwaakhelele nipuro nna ni mwaakhuleleke mavekelo hiyo nneeraahu nipakeke vaava.’ Moosuwela etthu Yehova aapankaawe weera oonihere weera yaamusivela etemplu? Salomoni amalihakaru ovekela, Yehova aarumiha mooro wiirimu ni aahisa itthu sootheene saari vasulu va altaari. Emaara ana a Israeli yonnaaya etthu ele, yaahakalala vantxipale.

Salomoni aavuwa vantxipale mwaha wa miruku sawe. Atthu a mapuro ootheene yannarowa wa Salomoni ni yannanvekela weera athorihe maxupo aya. Mpaka pwiyamwene yoowo aakhala nipuro noorakamela, nenno niitthaniwa Saba, aarowa wuuluma ni Salomoni. Owo aatthuna osuwela mweekhaikhai aareene a miruku. Atthekulakaru ni Salomoni, pwiyamwene ole aaheera: ‘Emaara kaaleliwaka weera weyo wa mutthu a miruku, miyo nkaakhulela, vano koosuwela weera ekhaikhai. Yehova Muluku aa, onnookhavihera tthiri. WIsraeli ekumi yaari yooreera, ni atthu yaari oohakalala vantxipale. Mene moohipisa itthu saamurowa otxentxa.