Okawanyeya wa omwene

Etempu Salomoni aamwiwelelaawe Muluku, omwene wa wIsraeli waakhala ni murettele. Salomoni aahaathela athiyana antxipale yaawo yakhanle ana a Israeli ni yaawo yahaamukokhorela Yehova. Vakhaani-vakhaani, Salomoni aapatxera waakokhorela amuluku eethiru aasaarawe. Yehova aanyoonyiwa vantxipale. Aamweerela Salomoni: ‘Miyo kinoovenxa omwene wa wIsraeli mmatatani mwaa ni mwa amusi aa. Omwene owo onrowa okawanyeya iparte piili. Eparte etokotoko enrowa okhala ni kaporo aa, ni eparte ekhaani enaahale enrowa okhala ni amusi aa.’

Mmoha a kaporo a Salomoni, yoowo iitthaniwa Yerobowamu, eera eettaka mphironi ni amphwanya profeta Ahiya. Ahiya aakuxa yoowara awe ni aahaahula ipetasu 12. Avinyaka owo aamweerela Yerobowamu: ‘Yehova onoovenxa omwene wa wIsraeli emusi ya Salomoni ni onoorowa okawanya iparte piili. Okuxe ipetasu iya 10 niwoko weyo onrowa okhala mwene a mahimo 10.’ Salomoni aasuwela etthu eyo ni annatthuna omwiiva Yerobowamu. Nto, Yerobowamu aatthawela wExipitu. Sivinreene iyaakha vakhaani, Salomoni aahookhwa ni mwanawe yoowo iitthaniwa Robowamu aakhala mwene. Vano, Yerobowamu aahoona weera ela yaari etempu yootthikela wIsraeli.

Asilopwana oowunnuwelavo a wIsraeli yaamweerela Robowamu: ‘Weyo waakosoopaka ana a Israeli nnene, awo enoovirelela okhala ni weyo ni owiiwelela.’ Mene asinthamwene amiravo a Robowamu yaamuleela: ‘Ohaareereleke murima atthu. Waalamuleke ana a Israeli ovara muteko vantxipale!’Robowamu aapaka ele asinthamwene awe amiravo yaamulenlaaya. Nto eyo yaaweeriha ana a Israeli ohimwiiwelela. Mene mahimo 10 a wIsraeli, yaamuthanla Yerobowamu okhala mwene aya. Ni mahimo makina meeli, yaavirelela okhala eparte ya Robowamu. Vano mahimo 12 a wIsraeli yaakawanyeya mwa imwene piili. Mahimo 10 yiitthaniwa omwene wa wIsraeli, ni mahimo meeli yiitthaniwa omwene wa oYuda.

Yerobowamu khaatthuna weera atthu awe yamukokhoreleke Yehova oYerusalemu, weiwo waakhanle omwene wa Robowamu. Moosuwela waari mwaha wa heeni? Mwaha wooweera aamoova atthu omurukunuwela ni omuthanla Robowamu ntoko mwene aya. Mene, Yerobowamu aapaka imompe piili sa ewooru ni aaweerela atthu: ‘OYerusalemu orakamawo. Mmukokhoreleke Muluku wenno.’ Avinyaka atthu yaapatxera okokhorela imompe sa ewooru. Ela-tho yaari ekwaha ekina yaamuttiwanlaaya Yehova.