Nahamani ni mwaaruusi mwIsraeli

Nipuro nimoha niitthaniwa Siriya, woorakamela wIsraeli, aakhala mwaaruusi mmoha mwIsraeli. Owo aakuxiwa arakamiheliwaka ni amusi awe ni nakhotto mmoha a wasiriya. Mwaaruusi ole aapatxera ovara muteko ntoko kaporo owannyawe Nahamani, mutokweene a anakhotto a wasiriya. Iwe khaavo aamukokhorela Yehova, aakhanle mwaaruusi ole mwisraeli.

Nahamani aakhalano eretta ya makokho erutthu yootheene yeeyo yaavoreya vantxipale. Mwaaruusi ole annatthuna vantxipale omukhavihera. Nto, owo aahuuluma ni amwaarawe Nahamani: ‘Miyo koomusuwela taani onrowa owera waalamiha aiyanyu. WIsraeli ookhalawo profeta mmoha a Yehova yoowo oniitthaniwa Eliseyo. Owo pooti waalamiha aiyanyu wa eretta aya.’

Amwaarawe Nahamani aarowa omulela eyo owo. Nahamani annatthuna vantxiaple olama. Nto, owo aarowa owannyawe Eliseyo wIsraeli. Okhala weera Nahamani anniisoona okhala mulopwana ootthuneyaxa, owo annaweherera weera Eliseyo aamukhuma owannyawe weera uulume nuuwo. Mweekhaikhai, Eliseyo aamuruma murumeyi awe weera amuleele masu Nahamani: ‘Orowe mooloko Yordani ni wiiruweye ikwaha 7. Wapaka eyo weeyo onoolama.’

Nahamani khiyaamusivenle eyo. Owo aahuuluma: ‘Miyo kuupuwela weera profeta owo aamurowa okilamiha anvekelaka Muluku awe ni atavaka makhwatta aka. Opwaha mwa yeeyo, owo onkiruma miyo orowa omooloko wa wIsraeli nno. Miyooloko sa wa aSiriya ti sootepa oreera. Mwaha wa heeni ahikirummaawe orowa wuuwu?’ Nahamani aanyoonyiwa vantxipale ni aavinyawo owannyawe Eliseyo.

Mene arumeyi a Nahamani yaahuuluma nuuwo: ‘Pwiya mwenre weera mwaamurowa opaka ele munweraanyu weera mulame. Mwaha wa heeni muhineereraanyu opaka ele profeta uulummaawe? Onkhala ntoko etthu yookhweya.’ Nahamani aapaka etthu arumeyi awe yaamulenlaaya. Owo aarowa mpaka mooloko Yordani ni aahiiruweya mweemmo ikwaha 7. Akhumakaru mmaahini ekwaha ya naa 7, Nahamani aahoona weera aalama! Owo aahakalala vantxipale ni aatthikela wa Eliseyo weera amuxukurele. Nahamani aaheera: ‘Vano miyo koosuwela weera Yehova Muluku eekhaikhai.’ Muupuwele moota mwaaruusi ole a wIsraeli aahakalanlaawe vantxipale amoonakaru Nahamani atthikelaka owaani alamihinweene!