Anakhotto oowera a Yehova

Beni Hadadi, mwene a wAsiriya, aaheerera ikwaha sintxipale omutuphela Israeli. Mene profeta Eliseyo ikwaha sootheene annamulela mwene a wIsraeli etthu Beni Hadadi aarowaawe opaka. Mwaha wa yeeyo, otuphela wa Beni Hadadi khiwaakhumela nnene. Nto, owo aahuupuwela waaruma anakhotto a wAsiriya orowa mpaka esidade ya Dotani weera yamutthuke Eliseyo.

Anakhotto a wAsiriya yaaphiya oDotani ohiyu. Nihiku naattharelana, murumeyi a Eliseyo aahoona weera esidade yaarukureriwa ni anakhotto antxipale. Owo aahoova vantxipale ni aakhuwela: ‘Eliseyo! Nankha vano, etthu heeni ninrowaahu opaka?’ Eliseyo aahaakhula: ‘Ohixupeye. Hiyo nookhalano atthu antxipale waapwaha awayasa.’ Mwa ewoora ene yeele, Yehova aamweeriha murumeyi a Eliseyo woona etthu yootikhiniha. Owo aahoona weera miyaako saarukurenre esidade saasareya akavalu ni ikaaro sa ekhotto sa mooro.

Emaara anakhotto a wAsiriya yeerenraaya omutthuka Eliseyo, owo aavekela: ‘Yehova, txontte, oweerihe asilopwana ala okhala oohoona.’ Anakhotto ale khiyaakhanle oohoona mweekhaikhai, mene, mootutuxera awo khayaasuwela nipuro yaaraaya. Eliseyo aaweerela: ‘Nyuwosa nwiiñye esidade ehikhanle yeeyo. Nwe ni miyo. Kinimookuxani nyuwosa kooroihakani wa mutthu yoowo mummwaasaanyu. Anakhotto ale yaamutthara Eliseyo mpaka oSamariya, esidade ene yeeyo-tho aakhalaawewo mwene a wIsraeli.

Anakhotto a wAsiriya yaasuwenle nipuro yaaraaya, oxaakaru. Mwene a wIsraeli aamukoha Eliseyo: ‘Kiwiiveke anakhotto ala?’ Eliseyo aamurowa okhalano eparakha yootthikiha isikula. Menento moosuwela etthu owo aapankaawe? Owo eenre: ‘Muhiwiive asilopwana ala, mwaavahe yootxa weera etxe ni mwaaleele ootheene awo weera epwaheke.’ Vano mwene a wIsraeli, aalamula weera erehereriwe yootxa yintxipale weera anakhotto etxe. Avinyaka, aahaaruma ootheene awo otthikela owannyaya.