Watchtower ONLINE LIBRARY
Watchtower
LIBRARY ONLAINE
Makhuwa-Shirima
Vanipuroni sinkhumelela aya ileetera sikhalanne asento
  • Waasaasa
  • BIBLYA
  • IBUUKHU
  • MITHUKUMANO
  • lfb yoosoma 54 epaax. 130-epaax. 131 eparag. 1
  • Yehova ampixera murima Yona

Eviidiyu muthanliya anyu khemphwanyaneya

Munlevelele khuvanwereya orumiha eviidiyu

  • Yehova ampixera murima Yona
  • Muxuttere ni Sooweereya sa mBiblyani
Muxuttere ni Sooweereya sa mBiblyani
lfb yoosoma 54 epaax. 130-epaax. 131 eparag. 1
Yona aneelaka mphareya ni ehopa emoha etokotoko ewaaka

YOOSOMA 54

Yehova ampixera murima Yona

Ninive yaari esidade emoha yeeyo yaakhala wa aSiriya. Atthu aiwe yaari oonanara murima. Mwaha wa yeeyo, Yehova aamuruma profeta Yona orowa iwe weera aaleele atthu ale weera yannatthuneya ottharuwa. Mene, ohiya okela iwe, Yona anwela paarku ni aatthawela esidade ya oTarxixi yeeyo yaakhala ottayi ni oNinive.

Mpuwa mwa ekwaha ele, yaapatxera woopa epheyo ya ikuru. Atthu yaamweettiha paarku ole yannoova vantxipale. Awo yaapatxera waavekela amuluku aya weera esuwele mwaha wa heeni yaakhumelelaaya epheyo ele. Nto, Yona aaweerela atthu ale yaamweettiha paarku: ‘Nthowa ti nawaka. Yehova aakirumme opaka etthu emoha ni miyo kitthawa. Nyuwo mwakivonyeraru mphareya epheyo ela enoomaala.’ Atthu ale khayaatthuna onvonyera mphareya, menento Yona aahaanyeserera. Emaara atthu ale yanvonyenraaya Yona mphareya, epheyo ele yaamaala.

Yona aapatxera oneela. Owo uupuwela weera aamurowa okhwa, nto anvekela Yehova. Emaara ene yeele, Yehova aarumiha ehopa etokotoko. Ehopa ele yammira Yona, menento Yona khaakhwiiye. Mmirimani mwa ehopa ele Yona anvekela: ‘Yehova, okhumela vaanaano vaava mpaka muhoolo, miyo kineereke owiiwelelani.’ Yona aamala mahiku mararu areene mmirimani mwa ehopa ele. Avinyaka, Yehova aaheeriha weera ehopa ele yamuumule Yona vamihaavani soowuuma.

Neereke eyo enoonihera weera Yona aamurowa otthikela owannyawe? Hooye. Veeli tho, Yehova aamuruma Yona orowa oNinive. Menento ekwaha ela Yona aahiiwelela. Aphiyakaru iwe, Yona aaweerela atthu ale oonanara murima: ‘Yamala mahiku 40, Ninive onoonyaanyiwa.’ Menento yaaheereya etthu emoha yeeyo mutthu ori poothe ahaawehereraawe. Atthu oNinive yaattharuwa! Mwene oNinive aaheera: ‘Nrowe ninvekele Muluku weera anlevelele. Apale owo pooti othanla ohiniiva hiyo.’ Emaara Yehova oonnaawe weera atthu oNinive yaattharuwa, owo aalakela ohinyaanya esidade ele.

Yona aphiyaka oNinive

Yona aanyoonyiwa vantxipale ni etthu ele. Owo khaapixenre murima atthu oNinive, hiihaale ntoko Yehova ampixenraawe murima. Opwaha mwa yeeyo, owo aakhumawo osidade anyoonyinweene ni aarowa okilaathi va muutuxini va murampela. Murampela ole waahuuma, ni eyo yaamunyoonyiha Yona. Nto, Yehova aamuxuttiha Yona etthu yootthuneya: ‘Weyo ommorela ikharari murampela ola ni onnyoonyiwa vano wuumaaya. Weyo khonoona weera atthu oNinive tootepa otthuneya opwaha murampela ola?’

“Apwiya ari òpixa murima ni nyuwo, niwoko khanatthuna wi akina eriheye, mene othene erukunuxe murima.” — 2 Pedru 3:9

Makoho: Itthu heeni Yehova aatthunaawe omuxuttiha Yona? Etthu heeni ninxutteraahu ni yooweereya ya Yona?

Yona 1:1–4:11

    Ibuukhu sa Makhuwa-Shirima (2018-2025)
    Okhuma
    Ovolowa
    • Makhuwa-Shirima
    • Okawela
    • Muntthuna Anyu
    • Copyright © 2025 Watch Tower Bible and Tract Society of Pennsylvania
    • Masu Oovarihela muteko
    • Mwaha Woosunka Isiiri
    • Privacy Settings
    • JW.ORG
    • Ovolowa
    Okawela