YOOSOMA 56
Yosiya yannamusivela malamulo a Muluku
Yosiya aakhala mwene a oYuda areeneno iyaakha 8. Etempu ene yeele, atthu yannapaka itthu soomunanara Yehova. Awo yannapaka maxitta ni yannaakokhorela amiluku eethiru. Emaara aaraaweno iyaakha 16, aakoha moota woomukokhorela nnene Yehova. Etempu owo aaraaweno iyaakha 20, owo aapwexa ilataratho sootheene ni mapuro yaawo yaakokhoreliwaya amiluku eethiru oYuda. Ni emaara aaraaweno iyaakha 26, Yosiya aalamula weera erehereriwe etemplu.
Emaara yaarehererinwasya, namakeya mmoha Helkiya, aaphwanya eroolu ni malamulo a Yehova, apaale yaari eroolu Mose aalempaawe. Xafani sekretaariyu a mwene, aakuxa eroolu ele amuroihelaka Yosiya ni aapatxera osoma moowiiwanyeya. Emaara iiwalaawe yoosoma ele, Yosiya aariipiwa murima vantxipale. Mwaha wooweera atthu khayaatthariha malamulo a Yehova aarummaawe. Yosiya aamweerela Helkiya: ‘Yehova ori oonyoonyiwa vantxipale ni hiyo. Orowe wuulume nuuwo, Yehova onimooleela etthu nintthuneyaahu opaka.’
Yehova aahaakhula: ‘Okhala weera atthu oYuda aakittiwala, awosa anrowa ottaruxiwa. Mene etthu eyo enkela weereya akhwa vale mwene Yosiya. Mwaha wooweera owo oosoma malamulo aka ni onnatthuna opaka itthu sooreera.’
Iiwalaawe waakhula wa Yehova, Yosiya aarowa otemplu ni aahaatthukumanya atthu ootheene oYuda. Nto owo aasoma moowiiwanyeya, malamula a Yehova wa atthu ootheene. Yosiya ni muloko yaamulaihera omwiiwelela Yehova ni murima aya wootheene. Yosiya aahoona weera va malamulo ale, Yehova aahaaleela atthu awe weera, empakeke mpaasika iyaakha sootheene. Mene atthu oYuda yaaviriha iyaakha sintxipale ehimpakaka. Nto Yosiya aalakela omureherera mpaasika a Yehova. Owo aavaha inama sintxipale weera siheleliweke makeya, ni aahela eliivuru ya etxipo mutemplu weera siipiweke. Avinreene mpaasika atthu yaapaka efeesta yeeyo yamalihale mahiku 7. Yeeyo yiitthaniwa efeesta ya ipaawu soohiheliwa efaramenta. Ekwaha yoomalihera atthu yampankaaya mpaasika ntoko ole aari mahiku a Samuweli. Yosiya wannamusivela oxuttera sa Yehova ni malamulo awe. Ankha nyuwo, onnoosivelani oxuttera woohima sa Yehova?
“Muthiko wa nnani naka ti nsu nanyu ni warya wa iphiro saka.”— Nsalmu 119:105