Ixiri sa oYerusalemu

Nrowe ntthikele ottuli vakhaani. Opersia aakhalawo Nehemiya, mwIsraeli mmoha aavara owanyawe Artaserse. Nihiku nimoha, munnawe Nehemiya aatthika oYuda areeneno mitthenka sooriipiha murima: ‘Atthu etthikenle oYerusalemu eri veerisani. Mpaka olelo va khaavo onweera otthikihera ixiri sa esidade aBabilonia enyanyalaaya.’ Eyo yaahimuriipiha murima Nehemiya. Owo annatthuna orowa mpaka oYerusalemu weera akhavihere, mene khaasuwela wakhala weera mwene ammuhiya owo orowa. Menento, anvekela Yehova weera amukhavihere.

Nihiku nimoha, mwene aahimoona Nehemiya ariipinweene murima, ni aamukoha mwaha wa heeni owo aaraawe hiiho. Nto, Nehemiya aahuuluma voohima sa oYerusalemu ni moota saaraaya ixiri ni milako. Mwene aamukoha wakhala weera owo ampaka etthu. Mwa etempu ene yeele, Nehemiya aapaka nivekelo noomaaleleya ni aamuleela mwene: ‘Miyo kaatthuna orowa oYerusalemu oteka ixiri. Pwiya munookihiya orowa?’ Owo aamuhiya orowa ni aapaka etthu eri poothe weera Nehemiya eette nnene. Mwene owo-tho aamukhaliha kovernatore oYuda, anvaha ithapwa weera apake milako sa oYerusalemu.

Nehemiya aphiyakaru oYerusalemu, owo aarowa woona moota saaraaya ixiri sa esidade. Avinyaka, aahaathukumanya asilopwana ootthuneya oYerusalemu ni aaweerela: ‘Itthu sootepa onanara, nintthuneya weera nipakevo etthu!’ Atthu ootheene yaahaakhulela ni yaapatxera oteka ixiri.

Nto, amwiittani akina ana Israeli yaapatxera waatheya awo ni yaaheera: ‘Exiri ela khelimpe mpaka khwatte onooweera onyaanya!’ Mene ana Israeli khayaapwantthe etthu ni yaavirelela ovara muteko. Noovira etempu, ixiri iye sannavirelela okhala soorakama ni soolipa.

Nto, amwiittani yaalakela omutuphela Yerusalemu mootutuxera. Ayuda esuwelakaru eyo, yaahoova. Mene Nehemiya aaweerela: ‘Muhoove. Yehova ori ni hiyo.’ Avinyaka, Nehemiya aahaahelamo makwaarta weera yaakosoopeke atthu yaateka ixiri. Mwa yeeyo amwiittani ale khayaawenre omutuphela Yerusalemu.

Mwa mahiku 52 paahi, ixiri ni milako saahimala. Weera etthapele, Nehemiya aahaakuxa alevi ootheene aaroihaka oYerusalemu ni aahaakawanya mwa ikhurupu piili. Nehemiya aari ekhurupu ekina ni Ezra aari ekhurupu ekina. Ikhurupu iyo piili saawela exiri ni kata ekhurupu yaahirowa nipuro naya. Awo yaaheetta erukureraka esidade, erumihaka malope, aviyola, isimbalu, ni emwiipelaka Yehova, mpaka ikhurupu soopiili okumanela otemplu. Asilopwana, asithiyana ni anamwane ootheene oYerusalemu yanvaha Yehova mukuttho ni yannatthapa. Awo yaahakalala vantxipale, ni okhuwela waya wanniiwanyeya mapuro oorakamela.