Nlaika Gabriyeli naamuxekura Maria

Esidade ya oNazareti oGalileya, aakhalawo mwali mmoha iitthaniwa Maria. Owo aari a emusi ya Elizabeti ni aattomeriwa ni karipinteiru iitthaniwa Yosefe. Emaara Elizabeti aaraaweno erukulu ya miyeeri 6, nlaika Gabriyeli naarowa wuuluma ni Maria. Nno naaheera: ‘Salama Maria! Yehova ohoothanlela weyo etthu yoothanleya.’ Maria khiiwexenxe etthu nlaika nne naatthunaaya ohima. Nto, nlaika Gabriyeli naahima: ‘Weyo onoomuyara mwaana. Nsina nawe ninrowa okhala Yesu. Owo onkela okhala mwene a omwene yoowo onkela okhala wa mahiku ootheene.’

Mene Maria aaxupeya, mwaha wooweera owo aari mwali oopatxeriwa. Moota heeni owo eeraawe akhaleno mwaana? Nlaika naaheera: ‘Vamaithoni va Yehova khiyaavo enootxeeleya. Ni owera wawe weyo onoomuyara mwaana mwaamulopwana. Elizabeti yoowo ori mmusi aa, oorupala-tho.’ Maria aaheerela nlaika nne: ‘Aani. Yeereye ni miyo etthu Yehova ontthunaawe.’

Nto, Maria aarowa omuxekura Elizabeti. Maria amuulumihakaru owo, mwaana a mmirimani mwa Elizabeti aahiitannya ni owo aaheera: ‘Maria, weyo wa muthiyana ooreelihiwa ni Yehova. Ti woohakalaliha wa miyo owaakhela ameyawe Mesiya.’ Maria aahaakhula: ‘Ekhaikhai, Elizabeti. Mwaha wa yeeyo miyo kinnamuxukurela Yehova!’ Maria aakhala owannyawe Elizabeti miyeeri 3, avinyaka aatthikela owannyawe oNazareti.

Yosefe asuwelakaru weera Maria aarupala, owo aatthuna omuhiya. Mene moolohani mwawe nlaika naamweerela Yosefe: ‘Ohoove omuthela Maria owo khapanke etthu yoottheka.’ Nto, Yosefe aamuthela Maria ni aamukuxera owannyawe.