Masu oopatxera a eparte 11

Ovinyera viinaano va, ninrowa woona sooweereya sa soolempwa sa ekereku seekristu. Nnoorowa oxuttera itthu sintxipale woohima sa Yesu. Owo aayarinwe emusi yoowiiyeviha, yeeyo yaakhala esidade ekhaanini, ni aavara muteko wa okaripintariya vamoha ni apapawe. Yesu aathanliwa ni Yehova weera aavuluxe atthu ni weera akhale Mwene a Omwene wa Muluku. Wakhala weera nyuwo tiithi naari maaye, mmukhavihere mwaninyu wiiwexexa moota Yehova aamuthanlenlaawe Yesu emusi yooreera. Mmoonihere moota Yehova ahaakhulenlaawe weera Herodi amwiive Yesu, ni weera khiyaavo etthu eneera emukhoottihere Muluku opaka etthu owo ontthunaawe. Nnoorowa oxuttera-tho moota Yehova anvarihenlaawe muteko Yohani weera aareherere atthu ni owa wa Yesu. Muhime moota Yesu aavahaawe mwiitti osuwela wa Yehova, nnaamweera aari mmiravo.