YOOSOMA 13
Ittiini soowootha sinaarakameliha hayi atthu omukokhorela Muluku?
Mwaha wooweera Muluku nsivelo, heeni ittiini simpakaaya itthu soonanara ehimaka weera emukokhorela Muluku? Ohima mookwasa, mwaha wooweera ittiini iya ti soowootha. Nava sinnamoothera Muluku. Ittiini soowootha sinaarakameliha hayi atthu omukokhorela Muluku? Muluku onoonela hayi mwaha owo? Nto onrowa opaka eheeni?
1. Ittiini soowootha sinaarakameliha hayi atthu omukokhorela Muluku ni itthu anxuttihaaya?
Ittiini soowootha “sohakakhanyiha ekhaikhai ya Muluku ni wotha.” (Aroma 1:25) Mwa ntakihero, ittiini soowootha khasinxuttiha nsina na Muluku. Mene Biblya onnahima weera ti wootthuneya ovarela muteko nsina na Muluku. (Aroma 10:13, 14) Vano wakhala weera yookhumelela etthu yoonanara, mapadri, mapastore ni anamaholela a ittini aneera “Etthu ela yootthuna ya Muluku.” Mene etthu ela anhimaaya ethiru. Muluku khampaka itthu soonanara. (Mmusome Yakobe 1:13.) Mooriipiha murima soowootha iya, sinnaarakameliha atthu omwaattamela Muluku.
2. Ittiini soowootha sinaarakameliha hayi atthu omukokhorela Muluku ni itthu ampakaaya?
Biblya onhima weera soottheka sa ittiini soowootha “sòphiya wirimu.” (Apokalise 18:5) Mpuwa mwa iyaakha sintxipale, ittiini iyo, sinniivoleeihera mpoliitikani ni-tho sinnakhavihera ikhotto. Opwaha mwa yeeyo, awo ahaatannya ni ahaakhulela wiiviwa wa atthu imiliyau sintxipale. Ahooleli akina a ittiini soowotha, annakhalano ekumi yooreera. Ni antthuna weera atthu anvekela igreja saya eliveleke ekumi eyo. Ittiini soowootha khasinaathokorora nnene atthu ntoko Yehova onathokororaawe. Anamahoolela awo a ittiini, anhima weera arummwale ni Muluku, mene soopaka saya, khasinvarihana ni yootthuna ya Muluku. Anamahoolela ala a ittiini khaamusuwenle naari vakhaani mano Muluku.—Mmusome 1 Yohani 4:8.
3. Muluku onoonela hayi ittiini soowootha?
Soonyonyihakani itthu simpakiwa ni ittiini soowootha, nkuupuwelani moota Yehova onoonelaawe! Anamahoolela a ittiini annaarakameliha atthu wa Muluku ni khanaathokorora atthu aya. Mene Yehova onnaasivela atthu ni onatikiniheya ni itthu simpakiwa ni anamahoolela a ittiini. Owo onnalaihera weera moohipisa onoonyaanya ittiini iyo ni ‘khasinrowa ophwanyiwa.’ (Apokalise 18:21) Aani, Muluku onoonyaanya ni omaliha ittiini sootheene soowotha.—Apokalise 18:8.
WEERA MUXUTTERE SINTXIPALE
Yoosomeene yeela ninrowa wiiwexexa voohima sa ele Muluku onuupuwelaawe voohima sa ittiini soowootha. Nave ninkela woona itthu soonanara simpakaaya ittiini soowootha, ni mwaha heeni itthu iya sihintthuneyaaya woohihani oxuttera sa Yehova.
4. Muluku khanaakhulela ittiini sootheene
Atthu antxipale anuupuwela weera ittiini iphiro soovirikana sinniphiiha wa Muluku. Neereke eyo ekhaikhai? Mmusome Matheyo 7:13, 14, ni avinyaka mutthekule ni ipontu sinttharelana:
Biblya onhima eheeni voohima sa ephiro ephwanyiha ekumi?
Moone EVIIDIYU, ni avinyaka mutthekule ni ipontu sinttharelana.
Neereke Biblya onhima weera ittiini sootheene sinnamusiveliha Muluku?
5. Ittiini soowootha khasinoonihera nsivelo na Muluku
Ittiini soowootha sinnaarakameliha atthu wa Muluku moohiyana-hiyana. Moota mmoha ampakaaya eyo, ori okhavihera ikhotto. Nrowe noone ntakihero. Moone EVIIDIYU, ni avinyaka mutthekule ni ipontu sinttharelana.
Ittiini sintxipale sapanke eheeni ehuhu ya ekhotto ensuweliwa okhala ekhotto ya naaveeli ya elapo yootheene?
Munoonela hayi itthu ittiini iya sinpankaaya??
Mmusome Yohani 13:34, 35 ni 17:16, ni avinyaka mutthekule ni ipontu sinttharelana:
Nyuwo munoonela hayi, neereke Yehova onnamusivela oonaka ittiini sivoleiheraka mukhottoni?
Ittiini soowootha sookhalano mathowa mantxipale wa itthu soonanara sineereya. Itthu heeni nyuwo monnaanyu ni maitho anyu sinoonihera weera ittiini soowootha khasaano nsivelo na Muluku?
Ittiini soowootha khasinoonihera nsivelo na Muluku
6. Muluku ontthuna waakumiha atthu eri muttiinini moowootha
Mmusome Apokalise 18:4,a ni avinyaka mutthekule ni ipontu sinttharelana:
Ittiini soowootha sinnaawoototha atthu. Nyuwo munoonela hayi mwiiwaka weera Muluku ontthuna waakumiha atthu ari muttiinini moowootha?
7. Nvirelele oxuttera voohima sa Muluku eekhaikhai
Itthu soonanara simpakiwa ni ittiini soowootha, neereke sinnatthuneya woohihani omwaattamela Muluku? Nkamuupuweleni mwaana ohiniiwelela miruku saapapawe. Mwaana owo onnalakela okhuma owannyawe onarowa opaka itthu soonanara. Tiithi awe khansiveliwa ni itthu mwanawe ompakaawe. Waamurerela waakhupanya apapawe mwaha woohiwelela wa mwaana ole?
Neereke onnareera omukhupanya Yehova ni ohiya oxuttera ikhaikhai sawe, mwaha wa itthu soonanara ittiini simpakaaya?
ATTHU AKINA ANEERA: “Miyo nkintthuna osuwela etthu voohima sa ittiini mwaha wooweera iyo sinwihera maxupo.”
Nyuwo munnaakhulela eyo atthu akina anhimaaya?
Mwaha wa heeni itthu simpakiwa ni ittiini soowootha sineeraaya sinihiihe omwaattamela Muluku?
NYAHA SOOTTHUNEYA
Ittiini soowootha sinnarakameliha atthu wa Muluku. Annapaka eyo, yaaxuttihaka atthu itthu seethiru ni epakaka itthu soonanara. Yehova onoonyaaya ittiini soowootha.
Wuuluula
Nyuwo munoonela hayi itthu ittiini soowootha sinxuttihaaya ni simpakaaya?
Yehova onoonela hayi ittiini soowootha?
Yehova onkela opaka eheeni ni ittiini soowootha?
WEERA MUSUWELE ITTHU SINTXIPALE
Nwehe moota miili ittiini soowootha sihimpakaaya yootthuna ya Muluku.
Heeni Yehova ontthunaawe weera nimukokhorele yooworu vamoha ni atthu akina?
“Neereke vannatthuneya weerela empari mareherero a ittiini?” (Mwaha va jw.org)
Nwehe yooweereya ya paadri mmoha aapatxenre ohovela ettiini awe. Nnaamweera vareene hiiho, aavirelela waasaasa ikhaikhai voohima sa Muluku.
“Mwaha heeni paadri mmoha aahiñyaawe egrejaawe?” (Despertai!, Fevereiro a 2015)
Mpuwa mwa iyaakha sintxipale ittiini sinnahima itthu soowootha voohima sa Muluku. Mwaha wa yeeyo, atthu anuupuwela weera khannaapwattha. Muxuttere ekhaikhai ni soowootha iya tthaaru.
“Soowootha sinaarakameliha atthu wa Muluku” (A Sentinela, 1.º a Novembro a 2013)