Neereke ifesta sootheene sinnamusivela Muluku?

Yehova ontthuna weera nihakalaleke ni nikhalaneke ehuhu yootthekula. Vano nto, neereke ifesta sinnamusivela Muluku? Ninkela woonihera hayi weera ninnamusivela Yehova woohima sa mwaheene yoowo?

1. Mwaha wa heeni ifesta sootheene sihimmusivelaaya Yehova?

Nyuwo pooti ootutuxereya mwaha woosuwela weera ifesta ikina sinkhuma moovarihana ni sooxuttiha sininvirikanyiha Biblya. Kapena tho, sinhimwa weera sinkhuma mwa sooxuttiha sa ittiini soowootha. Ifesta ikina pooti weera sinnavarihana ni onammunepani naari sooxuttiha seethiru woohima sa munepa ohinkhwa. Ifesta ikina sinvarihana ni itthu soohitthuneya ni soowiithanlela. (Yesaya 65:11) Yehova onnaaleela atthu awe eeraka: “Mwa yeeyo variyari vaya mukhume ni mmwalane ni yawo, . . . muhitannye itthu sa muxino.”—2 Akorinto 6:17.a

2. Yehova onoonela hayi ifesta seiyo sinaavuwiha atthu mootepiha?

Yehova onnanleela weera nihimorele mmurakhoni ‘woomuroromela mutthu onkhwa.’ (Mmusome Yeremiya 17:5.) Ifesta ikina sipakiwe weera saattittimiheke atthu ntoko, anakhotto naari anamalamulela. Ifesta ikina sinttittimiha elapo naari nihuku ñyarinwaahu. (1 Yohani 5:21) Ni ifesta ikina sinvarihana ni ipoliitika ni itthu sineereya mulaponi. Yehova onoonela hayi aanoonaka hiyo ntxaaka ifesta sinaavuwiha atthu, naari sa mareherero anwooperera atthu opaka itthu sihinvarihana ni yootthunaawe?

3. Neereke wookhala ovirikana woohima sa moota atthu ampakaaya ifesta ikina?

Biblya onnakhoottiha ‘ohapaliwa, ifesta sinhinvarihana ni Biblya ni owuraxa.’ (1 Pedru 4:3) Ifesta ikina simpakiwa, atthu khaaniikosoopa ni annipaka mararuwo. Weera nikhale nthamwene a Yehova, nintthuneya otthawa mikhalelo iyo samwiikho.

WEERA MUXUTTERE SINTXIPALE

4. Musempeke ifesta sihimmusivela Yehova

Mmusome Aefeso 5:10. Avinyaka mutthekule ni ipontu sinttharelana:

• Heeni nintthuneyaahu othanla wakhala weera ninnatthuneya otxa ifesta?

• Ifesta heeni isuweliwe mapuro munkhalaanyu?

• Nyuwo munoona weera ifesta iyo sinnamusivela Yehova?

Mwa ntakihero, nyuwo mootoko wiikoha wakhala weera Yehova sinnamusivela ifesta sa nihuku nooyariwa [aniversariyu]? Biblya khanathalihe weera ookhala murumeyi a Yehova khalayi aamutxa aniversariyu. Ni aniversariyu miili onhimmwa mBiblyani aari aatthu yahaamukokhorela Muluku. Musome Ephattuwelo 40:20-22 ni Matheyo 14:6-10. Avinyaka mutthekule ni ipontu sinttharelana:

• Aniversariyu ala eeli eheeni anlikanaaya?

• Moovarihana ni soolepa iya, nyuwo munoona weera Yehova onuupuwela heeni woohima sa aniversariyu?

Mene nto nyuwo, pooti weera munniikoha: ‘Neereke Yehova onnamunanara kaamutxaaka aniversariyu naari ifesta ikina sihinvarihana ni ele Biblya onxuttihaawe?’ Mmusome Ottimula 32:1-8. Avinyaka moone EVIIDIYU ni mutthekule ni ipontu sinttharelana.

EVIIDIYU: Ifesta ni sootxa sihimmusivela Muluku (5:07)

• Mwaha wa heeni oraaya wootthuneya osuwela ifesta simmuhakalaliha Yehova?

• Moota heeni nneeraahu nipake eyo?

Ninkela osuwela hayi ifesta sihimmusivela Muluku?

• Neereke efesta eyo enrwela yooxuttiha ehinvarihana ni Biblya? Mwaasaase osuwela epatxenraayaawo efesta eyo.

• Neereke ennaavuwiha mootepiha atthu, mareherero naari elapo? Hiyo nninvuwiha Yehova mwa sootheene ni ninnaroromela weera owo onoomaliha maxupo a elapo yootheene.

• Itthu heeni atthu ampakaaya nfestani mmo? Itthu ampakaaya sinnavarihana ni ele niitthu sooreera Biblya onhimaawe? Nintthuneya okhala ootteela mmuupuweloni.

5. Mwaakhavihere atthu akina wiiwexexa yoothanlaanyu

EVIIDIYU: Muthaliheke ni nttittimiho ele munroromelaanyu (2:01)

Mmusome Matheyo 7:12. Avinyaka mutthekule ni ipontu sinttharelana:

• Moovarihana ni yoolepa ela, neereke nyuwo mwaamweerera waanyeserera amusi anyu ohitxa ifesta sihinvarihana ni Biblya?

• Moota heeni nyuwo muneeraanyu nwoonihere amusi anyu weera mwaha woohitxa ifesta sihinvarihana ni Biblya khontaphulela weera moohiya waasivela?

6. Yehova ontthuna weera nihakalaleke

Yehova khannikhoottihera oviriha ehuhu ni amusaahu ni asinthamwene ahu. Mmusome Koheleti 8:15. Avinyaka mutthekule ni epontu enttharelana.

• Moota heeni yoolepa ela enooniheraaya weera Yehova ontthuna weera nihakalaleke?

Yehova ontthuna weera arumeyi awe etthekuleke ni ehakalaleke vamoha. Moone EVIIDIYU weera moone moota etthu enooneyaaya mmithukumano sahu sa kongresu internasional.

EVIIDIYU: Wakhelana mwaakongresuni a elapo yootheene (5:40)

Mmusome Agalata 6:10. Avinyaka mutthekule ni ipontu sinttharelana:

• Neereke nintthuneya otxa ifesta seiyo atthu antxaaya weera naapakele ‘itthu sooreera atthu’ akina?

• Eheeni yeera yoohakalaliheni mwaayesereriwa ovaha nihuta mwaha wa ifesta? Naari munvaha nihuta mwaha wooweera muntthuna opaka yeeyo?

• Anamoona a Yehova antxipale ennapaka marehero mwa ifesta ikhaanene ni annaavaha mahuta anamwanaaya. Ehilempeene edaata yoopaka eyo. Wakhala weera nyuwo mookhalano anamwane itthu heeni ikhaanene muntthuneyaanyu waapakela?

NYAHA SOOTTHUNEYA

Yehova khannikhoottihera otthekula naamusi ahu ni asinthamwene ahu. Mene etthu owo ontthunaawe eri yooweera, hiyo nihitxeeke ifesta sihimmusivela yoowo.

Wuuluula

• Nikoho heeni neera nookhavihereni osuwela ifesta sihimmusivela Yehova?

• Munkela waakhavihera hayi amusi anyu ni asinthamwene wiiwexexa mwaha wa heeni nyuwo muhintxaanyu ifesta?

• Ninsuwela hayi weera Yehova ontthuna weera hiyo nihakalaleke ni otthekula?

WEERA MUSUWELE ITTHU SINTXIPALE

Moone ifesta ikina makristu ahintthuneeyaaya otxa.

“Mwaha wa heeni Anamoona a Yehova ahintxaaya ifesta ikina?” (Mwaha va jw.org)

Moone mathowa maxexe anniroromeliha weera omutxa aniversariyu onnamunanara Yehova.

“Mwaha wa heeni Anamoona a Yehova ahimmutxaaya aniversariyu?” (Mwaha va jw.org)

Moone moota mmiravo mmoha oonihenraawe nttittimiho vaavo aaveehiwaawe ni asikhwaawe oxikola mwaha woohimutxa Natal.

Moonihere nttittiniho mwaaveehiwaka vale (2:04)

Makristu eekhaikhai annathanla ohimutxa Natal. Awo anoonela hayi mwa yoothanla apankaaya?

“Awo yaaphwanya etthu yootthuneya” (A Sentinela, a 1.º a Dezembro a 2012)