YOOSOMA 51
Moota heeni wuuluma wahu onkelaaya omuhakalaliha Yehova?
Yehova oonivaha etthu yootepa otthuneya: wuuluma. Neereke Yehova onnaphwatthela moota hiyo ninvarihelaahu muteko yoovaha eyo? Moohihovela aani! (Mmusome Yakobe 1:26.) Vanonto, ninkela ovarihela hayi nnene nlumi nahu weera nimuhakalalihe Yehova?
1. Ninkela othanlela hayi itthu nnuulumaahu?
Biblya oneera: ‘Muhakalalihaneke mukina ni mukhwaawe ni munnùwihaneke mukina ni mukhwaawe.’ (1 Atesalonika 5:11) Munnamuupuwela mutthu yoowo ontthuna olipihiwa? Eheeni muneeraanyu mpake weera mutthu owo alipe? Moonihere weera mutthu owo munnampwattha. Munoonela hayi omuleela mikhalelo sooreera owo okhalannaawe? Munoonela hayi onvarihela muteko Biblya weera mmulipihe? Sookhala soolepa sintxipale mukhanlaanyu ovarela muteko. Mene muhittiwale weera: Moota munkelaanyu wuuluma pooti omulipiha naari omukhulumula mutthu owo. Mwa yeeyo, emaara munkelaanyu wuulumaka ni mutthu owo, mweerereke wuuluma mwa mmaaleleyo ni mooreerela murima.—Miruku 15:1.
2. Mwaha wa heeni nintthuneyaahu othanlela moota woowuuluma?
Biblya oneera: “Masu òthene onanara ehikhume mmwanoni mwanyu.” (Mmusome Aefeso 4:29.) Eyo entaphulela weera hiyo khanintthuneya wuuluma masu oonanara naari ooveha, yaawo ankela omunyoonyiha mutthu mukina. Opwaha mwa yeeyo, onnatthuneya osempa wootha naari waapa.—Musome Miruku 16:28.
3. Eheeni enkela onikhavihera ovarela muteko nnene nlumi nahu?
Moohihovela ele nnuulumaahu, enoonihera itthu nnuupuwelaahu nave siri vamurimani vahu. (Luka 6:45) Mwa yeeyo, onnitthuneya wiilipihera weera nuupuweleke nave wuuluma itthu ‘siri sa xariya, siri sootteela, siri soosiveleya ni siri soophwanelela’. (Afilipi 4:8) Ti vawonto ontthuneyaaya weera nathanleke nnene asinthamwene nneeraahu nitthekulekeno. (Miruku 13:20) Nave-thooni, onnitthuneya wuupuwela nihinaakuve wuuluma. Mene nihinaakuveene wuuluma, onnatthuneya wuupuwela moota itthu nnuulumaahu sineeraaya saavoleele atthu akina. Biblya oneera: “Muhorahora onnetha ntoko mwalo, nto nlumi na anaxariya ninnalamiha.”—Miruku 12:18.
WEERA MUXUTTERE SINTXIPALE
Moone etthu eneera yookhavihereni moota muneeraanyu muulumeke moomuhakalaliha Yehova. Moone-tho, moota munkelaanyu waalipiha akina ni masu anyu.
4. Musuwele okosoopa itthu munuulumaanyu
Ikwaha ikina, hiyo ninnuuluma itthu okhwipi waya nnattharuwa. (Yakobe 3:2) Mmusome Agalata 5:22, 23, avinyaka mutthekule ni epontu enttharelana:
Yoolepa ela ennathaliha mikhalelo sineera sinikhavihere okosoopa nlumi nahu. Vano mukhalelo heeni mwaatthunaayu onvekela Yehova? Mikhalelo iya sinkela wookhaviherani hayi?
Mmusome 1 Akorinto 15:33, avinyaka mutthekule ni epontu enttharelana:
Moota heeni asinthamwene ahu ni otthekula wahu oneeraaya ovoleele moota woowuuluma?
Eheeni envoleihera moota nnuulumaahu?
Mmusome Koheleti 3:1, 7, avinyaka mutthekule ni epontu enttharelana:
Etempu heeni ontthuneyaaya owala iyano ni oweherera wuuluma
5. Nwuulumeke nnene atthu akina
Ninkela wiikosoopa hayi weera nihaanyoonyihe atthu akina ni itthu nnuulumaahu? Moone EVIIDIYU. Avinyaka mutthekule ni ipontu sinttharelana.
Nviidiyuni munna aahoonelela weera aakhalano mukhalelo woothoriha. Mwaha wa heeni owo aatthuneyaawe otxentxa?
Apanke heeni weera atxentxe mukhalelo awe?
Mmusome Koheleti 7:16, avinyaka mutthekule ni epontu enttharelana:
Wakhala weera muntthuna omuuluma itthu soonanara mutthu mukina eheeni muntthuneyaanyu wuupuwelela?
Mmusome Koheleti 7:21, 22, avinyaka mutthekule ni epontu enttharelana:
Moota heeni yoolepa ela enkelaaya wookhaviherani ohinyoonyiwa wakhala weera atthu akina annawuulumani moohireerela?
6. Mukhale ooreera murima muulumaka ni etthoko anyu
Yehova ontthuna weera nuulumeke itthu sooreera nave nreereleke murima etthoko ahu. Moone EVIIDIYU. Avinyaka mutthekule ni epontu enttharelana.
Etthu heeni enkela wookhaviherani weera muulume mooreerela murima etthoko anyu?
Mmusome Aefeso 4:31, 32. Avinyaka mutthekule ni ipontu sinttharelana:
Weera etthoko ahu yoone weera ennasiveliwa, nintthuneya wuuluma itthu sooreera. Ninkela opaka hayi eyo?
Yehova aahima weera annamusivela mwanawe. Mmusome Matheyo 17:5, Avinyaka mutthekule ni epontu enttharelana:
Nyuwo munkela omutakiha hayi Yehova emaara munuulumaanyu ni etthoko anyu?
Mwaaserere etempu yoowaattottopela atthu akina
ATTHU AKINA ANEERA: “Miyo kinuuluma itthu kintthunaaka, wakhala weera mutthu khantthuna etthu kinuulumaaka eyo ti yawawe.”
Nyuwo munnaakhulela eyo? Mwaha wa heeni?
NYAHA SOOTTHUNEYA
Nlumi nookhalano ikuru. Onnatthuneya othokorora ele nintthunaahu wuuluma, moota nnuulumaahu ni ehuhu yoowuuluma.
Wuuluula
Moota heeni munkelaanyu ovarela muteko nlumi nanyu weera mwaalipihe atthu akina?
Itthu heeni soonanara muhintthuneyaanyu wuuluma?
Eheeni enkela onikhavihera okhala ooreera murima ni waalipiha atthu akina ni masu ahu?
WEERA MUSUWELE ITTHU SINTXIPALE
Eheeni enkela onikhavihera okosoopa nlumi nahu?
Moone ele enkela wookhaviherani weemexera wuuluma itthu soonanara.
“Neereke wuuluma masu oohireerela ti woonanara?” (Mwaha wa va jw.org)
Moone moota nyuwo muneeraanyu mweemexere owuuluma atthu akina moonanara.
Moone moota Yehova amukhavihenraawe mulopwana mmoha ohiya wuuluma moowali.
“Miyo Kaahipacerya Wuupuwelela Saana Weiwo Okumi Aka Waarowa aya” (Owehaweha, 1.º a Agosto a 2013)