MAKHALELO A MAKRISTU
Neereke nyuwo munuupuwela ntoko Yehova?
Hiyo nintthuna omusiveliha Yehova mwa itthu sootheene ninpakaahu. (Mir 27:11) Nto nintthuneya opakaka soothanla sinoonihera weera nrinono muupuwelo mmoha ni Yehova naamwi nihikhanle nlamulo naari miruku sa moota Yehova onuupuwelaaweno. Etthu heeni enkela onikhavihera opaka eyo?
Mmusomeke Biblya mahiku ootheene. Vaavo nimmusomaahu Biblya, onkhala ntoko nintthekula ni Yehova. Nnoxuttera moota Yehova onuupuwelaawe nsomaka moota owo aathokoronraawe atthu awe. Moota mukina ori oxuttera ni matakihero atthu ale yaapanke itthu sooreera naari soonanara vamaithoni va Yehova. Napaka eyo, nihiku nneeraahu nintthuneke opaka yoothanla, munepa wootteela wa Yehova onoorowa onikhavihera wuupuwelela miruku seiyo nxuttenraahu mwa yoosomaahu ya Biblya.—Yoh 14:26.
Mutholatholeke nyaha. Vaavo nyuwo muntthunaanyu opaka yoothanla mwiikoheke ha: ‘Yoolepa heeni naari yooweereya heeni ya mBiblyani enkela okikhavihera osuwela moota Yehova onoonelaawe mwaha ola?’ Munvekeleke Yehova nave nvareleke muteko ikaruma soothola-tholelano nyaha simphwanyeya nnuulumo nanyu weera mphwanye miruku sa mBiblyani seiyo sikhanle soowookhaviherani opaka soothanla sooreera.—Nsa 25:4.
MOONELE EVIIDIYU ENEERA: HIYO NINNATTHUNEYA ‘WIILIPIHERA OTTHIMAKA’—NTXEEKE YOOTXA YOOREERA, AVINYAKA MWAAKHULE MAKOHO ALA:
Maxupo heeni mwaamwali ole anviidiyuni aavirihaawe?
Moota heeni ikaruma soothola-tholelano nyaha sikhanlaaya owookhaviherani nyuwo oviriha maxupo anlikana ni a mwaamwali ole?
Heeni eraaya etthu yooreera wiivaha etempu weera nipake yoosomaahu ya Biblya ni othola-thola nyaha sinrowa onikhavihera opaka soothanla sooreera?—Aheb 5:13, 14