Muloko Mutokotoko Waatthu Onnanvuwiha Muluku ni Yesu

1. Eheeni yaakhumelenle ni munna ole mmiravo iiwakaru mwaha waapakiwe omuthukumanoni eyaakha ya 1935?

MUNNA mmoha mmiravo aarino iyaakha 18 emaara abatisiwaawe eyaakha ya 1926. Asitiithi awe yaari anamasoma a Biblya, ntoko Anamoona a Yehova yasuweliwaaya khalayi. Awo yahaaxutiha anamwane aya araru asilopwana ni eeli asithiyana onvarela muteko Yehova emutakihaka Yesu Kristu. Mmiravo ole ntoko yeeraaya anamasoma akina a Biblya ehuhu ele, annakhuura mukatthe ni owura eviinyu ohiyu wowuupuwelela, iiwakaru mwaha wuulummwe wa “muloko mutokotoko waatthu”, ekumi awe yaatxentxeya. Ni mwaha wulummwale eyaakha ya 1935 ni munna J.F. Rutherford va muthukumanoni oWashintoni w’Estados Unidos w’America. Eheeni anamasoma ale a Biblya yaaxutenraaya va muthukumanoni ole mutokweene?

2. Ekhaikhai heeni yooreraxa munna Rutherford aattalinhaiye emaara uulumaiye mwahawe?

² Mpuwa wa mwaha wa munna Rutherford, ahiwanyeiha masu aniphanyeya va Apokalise 7:9 aneera “muloko mutokotoko wa atthu” asinna a ehuhu ele yuupuwela weera muloko mutokotoko wa atthu, yaari asinna tho anrowa wiirimu yaawo yaaroromela vakhanene wapwaha ale yaari oothanliwa. Anvarihelaka muteko Biblya, munna Rutherford aathaliha weera muloko mutokotoko wa atthu, khiwaathanliwe weera wakhaleke wiirimu. Opwaha mwa yeeyo, atthu a muloko mutokotoko, ori muloko mukina wa aKristu yoowo onrowa ovuluxiwa muholo mwa “yoohooxa etokotoko” ni onrowa okhalaka wa mahiku ootheene valaponi. (Apok. 7:14) Yesu ahimme weera: “Mene kòkhalano iputtiputthi sikina sihiri sa nikhola nla, seiya tho kinahala wettiha ni sini sìwe nsu naka, ni nikhola naya nikhale nimosa ni mukukhuli aya akhale mmosá.” (Yoh. 10:16) Iputtiputthi iya ikina,b atthu oororomeleya a Yehova yaawo anweherera okhala elapo ela yavathi mahiku mootheene. (Math. 25:31-33, 46) Ninkela woona moota ekhaikhai eyo yoomunepani etxentxilaaya okumi wa Anamoona a Yehova antxipale omuhela mpuwa mmiravo ole aromoliwe woopatxerani.—Nsal. 97:11; Mir. 4:18

WIIWEXEXA ONYOWANI OTXENTXALE IKUMI SAATTHU

3-4. Muthukumano Mutokwene wa eyaakha ya 1935, asinna yiiwexenxe eheeni ni mwaha wa heeni?

³ Ehuhu yoohakalaliha ya muthukumano ole mutokweene yaari emara munna athalihawe weera: “atthu ootheene anaweherera okhala woohimala elapo ela yavathi yeemele.” Moovarihana ni mmoha mwa atthu yaari omuthukumanoni iwe ohimme weera, antxipale a imilihao 20 yaari va muthukumanoni ole yaheemela. Nto munna Rutherford aheera: “Nyuwo mwa muloko mutokotoko waatthu” vanonto, atthu ootheene yaahoopa makuphi ni ohakalala. Atthu ale yemenle yahona yeera khiyaarino yooweherera yoorowa wiiriimu. Awo yaasuwela weera kiyathanliwe ni munepa woottela wa Muluku. Vaaxiiyaaya atthu oophiyera 840 yaabatiziwa ni okhala Anamoona a Yehova, ni antxipale a yaawo yaari a iputtiputthi sa nikhola nikina.

⁴ Ovirakaru mwaha ole, munna othalihiwe woopatxerani wa yoosoma ela vamoha ni atthu akina yaaheemexera otxa mukatthe ni owura eviiyu nihiku noowuupuwelela. Asinna antxipale yoonela etthu emohamoha ntoko munna mmoha aathalinhawe: “ekwaha yoomalihera kitxiiyaaka mukatthe ni owura eviinyu yaari eyaakha ya 1935. Miyo kaahona weera Yehova khakivanhe yooweherera yoorowa wiirimu. Nto yooweherera aka yaari yookhala ni okumi elapo ela ya vathi ni kikhaviheraka opakiwa elapo ela okhala eparadiso.” (Arom. 8:16, 17; 2 Akor. 1:21, 22) Ovinyera vaanaano va, muloko mutokotoko waatthu, onoovirelela oriki waatxeererana ni oneera ovaraka vamoha ni asinna akina ehanle oothanliwa.c

5. Yehova oniwoonela hayi atthu yaale ehiyale otxa ni owura eviinyu?

⁵ Yehova aawoonenle haayi ale yaahiyerenre otxa mukatthe ni owura evinyu ovinyera eyaakha ya 1935? Ankha wakhala weera olelo va Namoona a Yehova onnahiya otxa mukatthe ni owura evinyu yaari wa ale oothanliwa mwaha weera ohoonelela weera khathanliwe? (1 Akor. 11:28) Akina yannikhura ithoonyero iyo mwaha wooweera khiyaasuwenle yoowehereraaya. Wakhala weera ahoonelela weera awo khathanliwe ni yahiyerera otxa ni owura eviinyu ni yavirelela okhala oororomeleya, Yehova onimwaathokorora nkoto iputtiphutthi sa nikhola nikina. Naamwi ehitxaaka ni owura eviinyu awo annavirelela woonela muthukumano woowuupuwelela mwaha wooweera enneera asantte wa Yehova ni Yesu mwaha wa itthu yaapakenlaaya.

YOOWEHERERA YOOREERA

6. Nlamulo heeni Yesu aavanhaawe antxelo avarelenle ipheyo?

⁶ Mwaha wooweera yoohaaxa etokotoko eri vakhiviru, onnitthuneya wuupuwelela ele Apokalise ekapiitulu 7 ohimmaawe, ahimaka wa Akristu oothanliwa ni muloko mutokotoko waatthu anikhoola nikina. Mwa yoowooniheriwa ela, Yesu aahimme weera antxelo evirelele ovarelela ipheyo ixexe. Awo khantthuneya ohiyerera ovarelela ipheyo iyo mpakana makristu oothanliwa ihiyerere othanliwa. Awo khentthuneya ohiyerera mpaka emaliheriwe waakhuleliwa ni Yehova. (Apok. 7:1-4) Weera eliviwe mwaha woororomeleya asinnawe Kristu, annakhala anamakeya eekhaikhai ni Yesu wiirimu. (Apok. 20:6) Ootheene aneerela empari emusi ya Muluku wiiriimu annaweherera owoona Akristu oothanliwa yaakhenlaka nlivonnaya wiirimu.

7. Moovarihana ni Apokalise 7:9, 10, Yohani oonne eheeni ni awo ampaka eheeni? (Moone Elataratho ya vakaapani.)

⁷ Voottharelana Yohani aahona etthu yootikhiniha, awoona mamwene 144,000 ni muloko mutokotoko wa atthu evulunwe ekhotto yeeyo eneeriwa, Harmagedoni. Moovirikana ni atthu 144, 000, yaawo ari anamakeya, muloko ola mutokotoko wa atthu tiwoowattaxa ohinawereya okontariwa. (Mmusome Apokalise 7:9, 10.) Atthu a muloko mutokotoko “awanre malaya oottela,” eyo entaphulela weera awo khayeerela empari elapo ya Satana “yoonanara” mene yannikhala oororomeleya wa Muluku ni mwanawe Kristu. (Yak. 1:27) Annatthapela ele Yehova ni Yesu yaapakenlaaya weera yaavuluxe. Nave awotho annavarela milala mmatatani mwaya, eyo enoonihera weera enniroromela weera Yehova oomuthanla Yesu weera akhale mwene aya.—Mmulikanxere ni Yohani 12:12, 13.

8. Moovarihana ni Apokalise 7:11, 12 emusi ya Yehova wirimu enoonela hayi vaavo muloko mutokotoko wa atthu onvuluwaaya?

⁸ Mmusome Apokalise 7:11, 12. Vano emusi ya Yehova wiirimu enoonela hayi? Yohani aahoona emusi yootheene ya Yehova ya wiirimu ethukumanneene ni ohakalala envuwihaka Muluku emaara muloko mutokotoko wa atthu ovulunwaaya. Emusi ya Yehova wiirimu enoorowa ohakalala vantxipale woona okwanela waya yoowoona ya Yohani ehuhu muloko mutoko, wa atthu onrowaaya ovuluxiwa wa yoohooxa etokotoko.

9. Moovarihana ni Apokalise 7:13-15, eheeni onivaraaya muloko mutokotoko wa atthu vaanaano vaava?

⁹ Mmusome Apokalise 7:13-15. Yohani aalepa sa muloko mutokotoko wa atthu “aantxapa malayaaya ootteela ni aatteeliha mphomeni mwa eputtiputthi.” Eyo entaphulela weera awo aakhalano yoosuweliha ya murima yooreera ni ahaakhuleliwa ni Yehova. (Yes. 1:18) Awo Akristu oowiivaherera ni ooBatiziwa, akhalanne nroromelo ni mukuttho wa Yesu ekhalanne tho onthamwene woolipa ni Yehova. (Yoh. 3:36; 1 Ped. 3:21) Mwaha wa yeeyo, awo enoowera onvarela Yehova Muluku “ohiyu ni othana” elapo yeela ya vathi. Vaanaano vaava awo toowiilipihera ovara muteko woolaleya ni woowaaxuttiha atthu ohela nipuro noopatxera Omwene wa Muluku mookumini mwaya.—Math. 6:33; 24:14; 28:19, 20.

10. Muloko mutokotoko wa atthu, eheeni onroromelaaya ni eheeni onwehereraaya?

¹⁰ Muloko mutokotoko wa atthu avuluxiwe ni yoohooxa etokotoko, enniroromela weera Yehova aneereke ovirelela waathokorora mwaha weera oororomeliha weera “aneereke ohela eriyari aya ehemaawe” yooweherera ya atthu a nikhola nikina anwehereraaya enimweereya moohilekela “[Muluku] anapuputthe maithoni othene a mmaithori mwaya. Ni okhwa khorwa okhala veli nari winla nari wikhupanyera nari ovoreya khorwa okhala tho.”—Apok. 21:3, 4.

11-12. (a) Moovarihana ni Apokalise 7:16, 17, mareeliho heeni muloko mutokotoko wa atthu onrowaaya waakhela? (b) Iputthiputthi ikina simpaka eheeni ehuhu yoowuupuwelela, ni mwaha wa heeni?

¹¹ Mmusome Apokalise 7:16, 17. Ehuhu ene yeela atthu akina a Yehova ennivoliwa etala, ennithowiwa musurukhu ni ennihaawa mwaha wa ekhotto. Nave akina aatthukiwa mwaha wa nroromelo naya. Nto ale ari muloko mutokotoko wa atthu ennihakalala mwaha wooweera ennisuwela weera enoovuluxiwa ehuhu elapo ela enkelaaya onyaanyiwa ni enookhalano yootxa yintxipale ya weerutthuni ni ya omunepani. Yamala yoohooxa etokotoko Yesu onkela waalamulelaka atthu ankela “ovuluxiwa [ekumi yoohima].” Vano nkuupuwelani: Yooweherera heeni yooreera muloko mutokotoka wa atthu onwehereraaya? Etthu ela tiyooreera muloko mutokotoko wa atthu onnaweherera khonrowa oweherera olawiha okhwa!—Yoh. 11:26.

¹² Iputthiputthi sa nikhoola nikina sinneera asantte wa Yehova ni wa Yesu mwaha wookhalano yooweherera yooreera! Ekhaikhai weera awo khethanliye weera yakhaleke wiirimu, eyo khenthonyihera weera awo kheiyono ootthuneya wa Yehova. Vano Akristu oothanliwa ni a nikhoola nikina aakhalano eparakha yoonvuwiha Yehova ni mwanawe Yesu Kristu. Moota woowoonihera onvuwiha Muluku ori orowela muthukumano woowuupuwelela okhwa wa Yesu Kristu.

MUNVUWIHE YEHOVA NI MURIMA ANYU WOOTHEENE NIHUKU NOOWUUPUWELELA

13-14. Heeni ootheene hiyo ontthuneyaaya orowela wuupuwelela okhwa wa Yesu?

¹³ Onooneya weera wa atthu 1,000 anrowela wuupuwelela okhwa wa Yesu mmoha tontxa mukatthe ni owura eviinyu. Eyo enonihera weera mwa miloko mithanu, khaavo antxa mukatthe naari owura eviinyu. Nave enoonihera weera atthu antxipale aakhalano yooweherera ya okhala elapo ela ya vathi. Vano mwaha wa heeni enrowelaaya wuupuwelela ookhwa wa Yesu? Ntoko hiihaale nthamwene onrowaawe woothelanani wa nthamwene awe otthunaka woonihera nsivelo ni nttittimiho, vamoharu, iputthiputthi sa nikhoola nikina, sinnarowela muthukumano mwaha wooweera annimusivela ni omuttittimiha Yesu vamoha ni ale ari oothanliwa. Awo tho onnitthuneya woonihera weera ennihela mwiitti mukuttho wa Yesu. Mukuttho onnaavaha eparakha yookhalano ekumi elapo ela yavathi.

¹⁴ Nookhala nthowa nikina nneeriha weera iputthiputthi ikina sooneleke muthukumano wa wuupuwelela. Yesu emaara aaraawe ni oohusera awe oororomeleya valaponi, mwa yootxa yoopatxera ya Apwiya, aahaavaha nlamulo nna: “Mpakeke ela mukùpuwelaka miyo.” (1 Akor. 11:23-26) Mwa yeeyo wakhala weera aakhala atthu oothanliwa elapo ya vathi, iputthiputthi ikina sineereke ovirelela woonela muthukumano woowuupuwelela okhwa w’Apwiya. Atthu awo eneereke ovirelela waawopa atthu akina weera yoonele muthukumano woowuupuwelela okhwa wa Yesu.

15. Mutthu ti mutthu a hiyo onrowa woonihera hayi weera ennanvuwiha Yehova ni Yesu ehuhu yoowuupuwelela?

¹⁵ Omuthukumanoni woowuupuwelela, nookhalano eparakha yoowiipa matxipo ni ovekela ootheene, neera hiiho ninninvuwiha Yehova ni Yesu. Muru woowuupuwelela wa eyaakha ela oneera: “Moonihere weera asantte mwaha wa itthu Yehova ni Yesu oopakenlaaweni!” Mwaha ola onimwaatxeerera omutthapela wahu Yehova ni Yesu. Emaara mukatthe ni eviinyu envirihiwaaya, atthu ootheene enimuupuwelela etthu entaphulelaaya—ithoonyero iya, erutthu ni ephome ya Yesu. Nnimuupuwela tho nsivelo Yehova oonihenraawe vaavo aakhulenlaawe weera Yesu akhwe weera avuluxe ikumi sahu. (Math. 20:28) Ootheene ale ammusivela Yehova ni Yesu Kristu moohihovela khanrowa otxompela muthukumano woowuupuwelela.

MUTTHAPELE WA YOOWEHERERA YEEYO YEHOVA OOVANHAAWENI

16. Itthu heeni ekhalannaaya atthu oothanliwa sinlikana ni iputthiputthi sa nikhoola nikina?

¹⁶ Asinna oothanliwa ni atthu a iputthiputthi ikina, aakhalano itthu soolikana. Igrupu iyo soopiili ti sootthuneya vamaithoni va Yehova. Nto awo aroothummwa ni Yehova ni muttenko ya ekumi wa mwaniye. Ovirikana okhanle wa igrupu iya piili, eri yooweherera. Akristu oothanliwa ni iputthiputthi sa nikhoola nikina, onnatthuneya okhala oororomeleya vamaithoni va Muluku ni Yesu. (Nsa. 31:23) Nave Muluku khanvaha munepa awe woottela egrupu emoha, veekhaikhai onnavanvaha munepa awe munepaawe wootteela moovariha ni yootthuna ya mutthu.

17. Asinna oothanliwa eheeni enwehereraaya waakhela?

¹⁷ Akristu oothanliwa kheyariwe ethanliweene weera yakhaleke wiirimu. Muluku toonhela mmurimani mwaya yooweherera eyo. Awo annuupuwelela yooweherera eyo ni annapaka mavekelo ni annatthunaxa waakhela yooweherera aya yookhala wiirimu. Awo khansuwela erutthu enrowaaya okhalano yaphiya wiirimu. (Af. 3:20, 21; 1 Yoh. 3:2) Naamwi vareene hiiho, ennoona opisa okhala ni Yehova, Yesu Kristu, malaika ni okilaathela ihitxe saya sa Omwene. Nave enniweherera okumanela ni Makristu makina oothanliwa ehoolenle.

18. Iputthiputthi sa nikhoola nikina, yooweherera heeni sintthunaaya waakhela?

¹⁸ Iputthiputthi sa nikhoola nikina sinnaweherera okhala elapo ya vathi, eyo tiiyo, yoowiinlela ya mutthu ti mutthu. (Koh. 3:11) Awo annoona opisa ophiya nihuku anrowaaya otxentxiha elapo okhala eparadiso. Annatthuna vantxipale oteka impa, opaka iJardim saya, waahuwa anamwene aya ni okhalano ekumi yootepa oreera. (Yes. 65:21-23) Awo tho annatthuna weetteetta elapo ela weera yoone inyaako, othako wooreera, ephareya nave etthunaka oxuttera opaka itthu—Yehova opankaawe. Mwa sootheene, ennahakalala osuwela weera muhoolo oneereke waatxeerereya onthamwene aya ni Yehova mahiku ootheene.

19. Eparakha heeni mutthu ti mutthu hiyo, onrowaawe okhalano ehuhu yoowuupuwelela okhwa wa Yesu, ni nihuku heeni onrowaawe opakiwa wuupuwelela eyaakha ela?

¹⁹ Yehova ohaavaha arumeyi awe, yooweherera yooreera ya muhoolo ya okhala mahiku ootheene. (Yer. 29:11) Wuupuwelela okhwa wa Yesu onnanivaha eparakha yooweera asantte wa Yehova ni wa Yesu wa sootheene awo apankaaya weera nikhalane yooweherera yooreera. Moohihovela muthukumano woowuupuwelela, tiwootthuneyaxa wa yoole ori Mukristu. Eyaakha ela onkela weereya nsuwa nneelaka. Nihuku na Esaabado 27 a Março a 2021. Mene eyaakha ela, akina enoorowa woonela muthukumano wootthuneya naamwi ettharatthariwaka akina enkela opakela okadeya. Muhipwatthaka nipuro muraanyu, muroromele weera Yehova ni Yesu ni emusi ya wiirimu ennaniwehexexa. Mutthu ti mutthu, egrupu, muloko ekhalelo ninnooveleelihani weera mukhaleno muupuwelelo wooreera!