Ninxuttera “Eheeni ni Oohusera Aasiveliwexa ni Yesu”

1. Nnoopakihani hayi nsivelo Muluku?

“MULUKU TI OSIVELA,” olempe mutthareli Yohani. (1 Yoh. 4:8) Yoolepa ela yookhweya osoma, ennanuupuxera etthu yootepa otthuneya: Muluku, maphattuwelo a ekumi, nave tho owo maphattuwelo a nsivelo. Yehova onnanisivela! Nsivelo nno ninnanikhaliha okhala oovareleleya oohakalala ni ootteeliwa murima.

2. Moovarihana ni Matheyo 22:37-40, malamulo heene meeli eromoliwe ni mwaha wa heeni nlamulo nanaaveli nneeraawe nnivile?

² Wa makristu, nsivelo khehiyono etthu yoothanla. Mene nri nlamulo. (Mmusome Matheyo 22:37-40.) Vaavo nnamusuwelaahuxa Yehova, apaale pooti onikhweela nlamulo noopatxera. Ekhaikhai, Yehova toomalela, owo tootxeketta, ni ansivelo moota onnithokorora awe. Mene tho, pooti onivila otthara nlamulo nanaaveeli. Mwaha wa heeni? Mwaheene asinna ni asirokorihu, yaawo ninkhalana ahu vamoha eyariwe ni yoottheka. Awo emaara ekina pooti opaka naari wuuluma itthu sinninanara. Mene Yehova aasuwela weera hiyo nanviriha maxupo awo, tiyeeyo nto yaamweerinhe waakhavihera anamalepa a Biblya weera ehelemo miruku voohima sa owoonihera nsivelo atthu akina. Mmoha aanamalepa awo aari Yohani.—1 Yoh. 3:11, 12.

3. Yohani aahimexenxe eheeni?

³ Soolepa sa Yohani sinnihima wera makristu, onnitthuneya woonihera nsivelo. Mweekhaikhai, mwa soolepa sawe, onnivarihela masu “nsivelo” ni “osivela” etthikeleyaka veeli-veeli opwaha ivanjelyo tthaaru sa oohusera akina. Yohani iisa akhalanneene iyaakha 100 vaavo aalempaawe evanjelyo ni ipaphelo tthaaru ikhaanini. Soolepa iyo sinoonihera weera nsivelo ninnitthuneya weera sivoleeleke itthu sootheene mukristu ompakaawe. (1 Yoh. 4:10, 11) Nto, Yohani weera axuttere woohima sa nsivelo waalekelavo.

4. Neereke Yohani imaara sootheene annoonihera nsivelo wa atthu akina?

⁴ Yohani aaraawe mmiravo, khoiyono weera imaara sootheene annoonihera nsivelo. Mwa ntakihero, emaara ekina Yesu ni atthareli akina yeera ereene vamukwahani erowaka oYerusalemu, nto eviraka muttetthe mwaamukhaani wa Asamariya. Nto muttetthe mmoha mukhaanini wa Osamariya khawoonihenre owaakhela aletto. Vano Yohani aakhunle hayi? Aamukoha Yesu moota weeraawe okhuruwe mooro wiirimu ni waahisa anammittettheni ootheene! (Luka 9:52-56) Emaara ekineene, khoonihenre nsivelo wa atthareli akina. Owo ni munneiye Yakobe, aahaasesera amaayawe weera yanvekele Yesu weera, avahiwe nipuro noothanleya moomweneni mwawe. Vaavo atthareli akina yoonelenlaaya ele Yohani ni Yakobe yaapankaaya, atthareli ale yaanyoonyiwa vantxipale! (Math. 20:20, 21, 24) Mwa yeeyo, naamwi emaara ekina Yohani ahoonihera nsivelo, Yesu aavirelela omusivela yoowo.—Yoh. 21:7.

5. Ninkela oxuttera eheeni yoosoma ela?

⁵ Yoosoma ela, ninkela othokorora matakihero a Yohani ni itthu ikina olempaawe voohima sa nsivelo. Naapakaka iyo, ninkela oxuttera moota hiyo ninkelaahu woonihera nsivelo wa asinnihu ni asirokorihu. Nave-tho, ninkela oxuttera moota muhooleli a etthoko onkelaawe woonihera nsivelo vatthokoni vawe.

NSIVELO NNOONIHEREYA NI MITEKO

6. Yehova oonihenre hayi onisivela wawe?

⁶ Veeli-veeli nnuupuwela weera nsivelo masu yaale nnuulumaahu, masu oomaaliha. Mene weera nthoonyihere nsivelo, ontthunenya opaka etthu. (Mulikanxere ni yoolepa ya Yakobe 2:17, 26.) Mwa ntakihero, Yehova onninisivela. (1 Yoh. 4:19) Owo onnoonihera nsivelo nno moorweela wa ele alempaawe mBiblyani. (Nsa. 25:10; Arom. 8:38, 39) Mwa yeeyo, ninnaroromela weera Yehova onninisivela ohiya paahi ele onhimaawe, mene tho ele onnipakelaawe. Yohani olempe: “Mwemmo Muluku onònihenraiye hiyo otthuna wawe wi Muluku ònirumihela Mwan’awe mmosaru mwelaponi, weera nikhale n’okumi ni ekhavihero awe.” (1 Yoh. 4:9) Yehova, ahaakhulela weera mwaniye oosiveleyaxa anikhwele. (Yoh. 3:16) Neereke ninnihovela weera Yehova onninisivela?

7. Eheeni Yesu opankaawe enoonihera weera onninisivela?

⁷ Yesu aahaaroromeliha atthareli awe weera anaasivela vantxipale. (Yoh. 13:1; 15:15) Owo aahoonihera nsivelo wa atthareli awe onihela mpuwa hiyo, mene ohiya paahi ele uulumma awe, mene tho wa ele opankaawe. “Khaavo orino otthuna otokotoko opwaha,” ni Yesu aaheera tho, “otthuna wa yoole ovelenle ekum’awe niwoko na asinthamwen’awe.” (Yoh. 15:13) Nuupuwelelaka ele Yehova ni Yesu enipakenlaaya, eyo ennivoleela hayi?

8. Yoolepa ya 1 Yohani 3:18 ennivekela opaka eheeni?

⁸ Ninnoonihera weera ninnamusivela Yehova ni Yesu, niiwelelakavale ele Yehova ni Yesu ennileelaaya. (Yoh. 14:15; 1 Yoh. 5:3) Nave Yesu oovaha nlamulo nooweera, nsivelaneke mukina ni mukhwaawe. (Yoh. 13:34, 35) Aani, onnitthuneya owoonihera nsivelo asinna ni asirokorihu ohiya wuuluma vayanoni, mene tho ni miteko sahu. (Mmusome 1 Yohani 3:18.) Vano eheeni nneera ahu nipake weera noonihere weera ninnasivela?

MWAASIVELEKE ASINNA NI ASIROKORA

9. Mwaha wa nsivelo, nampakihe eheeni opaka Yohani?

⁹ Yohani wanwereya othanla ompaka nakoso naasitith’awe ni ophwanya musukhu mwintxipale. Ohiya eyo, owo aavaherera ekumi awe yootheene weera aakhavihere atthu akina waasuweliha sa Yehova ni Yesu. Ekumi Yohani aathanliyaawe khiyaakhweyale, owo annaasaasiwa nave, ehalelaka omala eseculu yoopatxera uuluvanleene aatthukiwa. (Mit. 3:1; 4:1-3; 5:18; Apok. 1:9) Naamwi ahaawera olaleya mootaphuwa, owo annoonihera weera anniwuupuwela akina. Mwa ntakihero, areene etxirumpa yiitthaniwa Patmo, owo aalepa yoowoonihera aakhenlaawe, ni aarumiha mmilokoni weera esuwele “itthu seera sikhumelele voohilekela.” (Apok. 1:1) Vano oweharu ataphuliweene oPatmo, aalepa okumi ni muteko woolaleya wa Yesu. Ni aalepa ipaphelo tthaaru seiyo seera saalipihe asinna ni asirokora. Vano munaatakihe hayi ekumi yoowiiveleela ya Yohani?

10. Munkela woonihera hayi weera munnaasivela atthu?

¹⁰ Munkela woonihera weera munnaasivela atthu mwaha wa ele munthanlaanyu. Elapo ela enlamuleliwa ni Satana, ennanipakiha weera niyeeheke ehuhu yintxipale weera niitholele meekhiihu, naasaasaka ehuhu yintxipale weera niivuwihe, Opwaha mwa yeeyo ale eniivaherera weera ekhale anamalaleera enniilipihera ni oyeehe ehuhu yintxipale weera yaakhavihere atthu a elapo yootheene, ni yaakhaviheraka atthu okhalano onthamwene ni Yehova. Nave-tho akina pooti wiithanlela olaleya ehuhu yootheene.

11. Anamalaleera akina, enoonihera hayi weera ennimusivela Yehova ni asinna?

¹¹ Makristu oororomeleya, ennivara muteko wa mulaponi ehuhu yintxipale weera yiitholele yootxa ni otholela etthoko aya. Naamwi varene hiiho, anamalaleera ala oororomeleya ennikhavihera mareherero a Muluku wa ele eniwerelaaya. Mwa ntakihero, akina a yaawo ennivaherera musurukhu aya weera ekhavihere wakhala weera sookhumelela ihasara sa mulaponi. Akina a yaawo ennivaherera oteke impa sa omwene. Ennipaka itthu iyo mwaha wooweera ennimusivela Muluku ni wa anamwaattamanani. Yeele eri esemana, ninnoonihera weera ninnaasivela asinna ni asirokora, noonelaka mithukumano sa mmulokoni ni nipakaka ikomentaariyu vamuthukumanoni. Naamwi emaara ekineene nikhulumuwaka, ninniilipihera ophwanyaneya vamuthukumanoni. Nave-tho, naamwi emaara ekineene nreene oonyoonyiweene, ninnipaka ikommetaariyu. Ni ehuhu ekina enniniphwanya maxupo, nto naamwi eniphwanyaka maxupo awo, ninnalipihana mukina ni mukhwaawe omapatxereroni ni okhwipi wa mithukumano. (Aheb. 10:24, 25) Ninnatepa otthapela vatxipale mwaha woowiilipihera wa asinna anamalaleera!

12. Moota heeni tho Yohani oonihenraawe nsivelo wa asinnawe ni arokorawe?

¹² Yohani aahoonihera nsivelo wa asinna ni arokora, ohiya paahi waattottopela, mene-tho, aahavaha miruku. Mwa ntakihero, mpapheloni mwawe, owo aahaattottopela asinnawe mwaha wa nroromelo naya ni miteko sooreera. Nto, emaara ekina owo annaavaha miruku sooluluwanya mwaha wa soottheka. (1 Yoh. 1:8–2:1, 13, 14) Emohamoharu, onnitthuneya waattottopela asinna mwaha wa miteko enipakaaya. Nave-tho, wakhala weera ennipaka itthu seiyo sihinvarihana ni Biblya, onnitthuneya waavaha miruku weera ehiye mikhalelo soonanara. Mene nto, onnitthuneya olipa murima weera nimukhavihere nthamwene. Biblya onnihima weera asinthamwene eekhaikhai eninilipihana ni ovahana miruku mukina ni mukhwaawe.—Mir. 27:17.

13. Eheeni nneeraahu nihipakeke?

¹³ Emaara ekina, ninnoonihera nsivelo wa asinna ni asirokora mwaha wa itthu nihimpakaahu. Mwa ntakihero, khontthuneya waakuveya onyoonyiwa mwaha wa itthu awo enuulumaaya naari ennipaka aya. Noone etthu yaakhumelele ni Yesu ahaleelaka okhwa. Owo aaweerela atthareli awe weera, weera ekhalane ekumi yoohimala wannitthuneya okhuura erutthu awe ni owura ephome awe. (Yoh. 6:53-57) Masu ale yahaakhumula atthareli ale ni atthareli akina yaari ni yoowo yaamuhiya—mene asinthamwene awe oororormeleya khiyaamutthanwe, omuhela mpuwa Yohani. Awosa moororomeleya yaavirelela okhala ni yoowo. Naamwi yahiwexenxeene ele Yesu aatthunaawe ohima, nave pooti weera atthareli ale yaatikhinna ni etthu aahimmaawe. Mene naamwi yahiwexenxeene ele Yesu aatthunaawe ohima, nave pooti weera atthareli ale yaatikhinneene ni etthu aahimmaawe. Mwa yeeyo, asinthamwene oororomeleya a Yesu, khiyaapwantthe etthu uulummaawe. Opwaha mwa yeeyo awosa khiyaanyoonyiwe ni yaavirelela ororomelaya. (Yoh. 6:60, 66-69) Mohoona ontthuneya waya okhala oopixa murima wakhala weera asinna ni asirokora aanuulumela naari onipakela etthu yoonanara! Opwaha mwa yeeyo, ninnaavaha ehuhu weera etaphulele etthu nihiiwexenxaahu.—Mir. 18:13; Koh. 7:9.

14. Mwaha wa heeni ohintthuneyaaya waakhulela weera wiitta ovolowe vamurimani vahu?

¹⁴ Yohani, onnanileela weera khontthuneya owiitta asinnihu naari asirokorahu. Nto nahiya otthara miruku iya, ninkela onvaha nipuro Satana. (1 Yoh. 2:11; 3:15) Eyo yaakhumelela Esekulu yoopatxera C.E. Satana aapaka ele onweraawe weera wiittana omwaramwareye mmulokoni ni waakawanya asinna mmulokoni. Ehuhu Yohani aalepaawe ipaphelo sawe, alopwana akina yoonihera munepa weeSatana yaavoleela mmulokoni. Mwa ntakihero, Diotrefe annakawanyiha muloko. (3 Yoh. 9, 10) Owo khaakhalanne nttittimiho wa ale yaaxekura miloko yaawo yaathanliwe ni Mukuttula Woolamulela. Nave-tho, anniwoomola atthu wa ale yoonihera owaakhela aletto mmulokoni. Yaari maakaani! Mene Satana khahiyerenre weerera waamwalamwaxa atthu a Muluku mahuku ala nraahu. Nto nihaakhulele weera wiittana ovolowe mmulokoni.

MUSIVELEKE ETTHOKO ANYU

15. Eheeni muhooleli a etthoko ontthuneyaawe wuupuwelela?

¹⁵ Yootthuneya wa ole onihoolela etthoko ori woonihera nsivelo etthoko ni otholela yootxa. (1 Tim. 5:8) Owo onnitthuneya wuupuwelela weera, otholela paahi yootxa khenkwanihera itthu soomunepani ya etthoko awe. (Math. 5:3) Moone ntakihero na Yesu voohima sa muhooleli a etthoko. Moovarihana ni yoolepa ya Yohani, vaavo Yesu aaraawe va mwirini wa nihaaxero, owo annuupuwelela soothowa sa emusi awe. Yohani iisa areene ni amayawe Yesu, Maria. Naamwi aareene mmahooxoni, Yesu anniwuupuwelela amayawe Maria. (Yoh. 19:26, 27) Mene Yesu annisuwela weera, aakhalano asunnawe yaawo yeera yaakhavihereke amayawe, Maria. Nto enooneya weera khaavo wa asunnawe ale aakhanle oohusera. Mwayeeyo, Yesu annitthuna weera amayawe ekhavihereyeke moomunepani.

16. Miritti heeni Yohani aakhalanaawe?

¹⁶ Yohani aakhalano miritti sintxipale. Ntoko mmoha wa atthareli, owo aakhalano muritti ntoko ohoolela vamulokoni. Nave onkhala ntoko weera aathela, nto wannitthuneya okhala eeriyariru ntoko otholela yootxa, ni sootthuneya sa omunepani. (1 Akor. 9:5) Ahooleli a etthoko, enxuttera eheeni mahikwaahu ala?

17. Mwaha wa heeni muhooleli a etthoko, ontthuneyaawe weera akhavihereke etthoko awe moomunepani?

¹⁷ Munna yoowo ori muhooleli a etthoko, pooti weera onookhalano miritti soolemela. Mwa ntakihero, omutekoni wawe oonihereke mikhalelo sooreera seiyo sinoonihera weera oninvarela Yehova. (Aef. 6:5, 6; Tito 2:9, 10) Nave-tho owo pooti okhalano miritti mmulokoni, ntoko mutokwene, ni ohoolela muteko woolaleya. Ehuhu emoharu, onnitthuneya tho weera amusomeke Biblya ni etthoko awe. Awo eneereke otthapela wiilipihera wa muhooleli a etthoko, nto eyo enimweeriha etthoko awe okhala yoolipa moomunepani ni okhala yoohakalala.—Aef. 5:28, 29; 6:4.

“NVIRELELE OKHALA MOOSIVELANI MWAKA”

18. Eheeni Yohani aaroromelaawe?

¹⁸ Yohani aakhalano ekumi yoorakama ni yoosareya osuwela. Owo aaviriha maxupo mantxipale yaawo yeera ehokoloxere ottuli nroromelo nawe. Nto, naamwi vareene hiiho, owo aavirelela otthara malamulo a Yesu, ohela mpuwa nlamulo noowaasivela asinna ni arokorawe. Ntoko yookhumelela, Yohani anniroromela weera Yehova ni Yesu yannimusivela ni onvaha ikuru weera avilele ni sooweeha seiyo seera sinweele. (Yoh. 14:15-17; 15:10; 1 Yoh. 4:16) Khiyaavo Satana ni elapo awe yeera emootxeelihe woonihera nsivelo.

19. Yoolepa ya 1 Yohani 4:7, ennivekela opaka eheeni, ni mwaha wa heeni?

¹⁹ Ntoko Yohani, ninkhala elapo enlamuleliwa ni Satana, muluku a elapo ela. (1 Yoh. 3:1, 10) Naamwi owo atthunaka weera nihiyerere waasivela asinna ni asirokora, owo khaanono ikuru woopaka eyo, waahikhala weera hiyo ninnaakhulela weera epakeye eyo. Tivaavonto, onnitthuneya wiithanlela weera naasivele asinna ni asirokora nooniheraka wa ele nnuulumaahu ni miteko sahu. Moorweela wa itthu nimpakaahu, neera haawo ninkela ohakalala opaka empari ya emusi ya Yehova, nave ekumi ahu enkela okhala yootepa ohakalaliha.—Mmusome 1 Yohani 4:7.