Moota Heeni—Yehova Onoosukaaweni?

1. Mwaha wa heeni Yesu anvekenlaawe Yehova weera asunke atthareli awe?

OHIYU AWE woomalihera valaponi, Yesu aahuupuwela maxupo atthareli awe yeeraaya evirihe. Mwaha woowaasivela asinthamwene awe owo, ahaavekela atithawe eeraka: “Wàsunke yawo wa yonanara.” (Yoh. 17:14, 15) Yesu aasuwela weera emaara eeraawe atthikele wiirimu, Satana, Nanrima aheereke oovirelela owana naale ootheene yeera etthuneke oovirelela onvarela muteko Yehova. Mwaha wa yeeyo, atthu a Yehova yaaheereke otthuna osukiwa.

2. Eheeni enniroromeliha weera Yehova onimwaakhula mavekelo ahu?

² Mwaha wa nsivelo ommooniheraawe mwanawe, Yehova oopaka ele Yesu ovekenlaawe. Napaka ele ninweraahu weera nimwiiwelele Yehova, Owo-tho aneereke onsivela. Emaara nninvekelaahu weera anikhavihere ni onsuka, owo onoonaakhula. Yehova onlikana ni tiithi onaasaasera othokorora etthoko awe. Owo khanrowa ohiyerera waathokorora ni nsivelo anamwane awe. Onnipaka eyo mwaha wa nsina nawe.

3. Mwaha wa heeni olelo va nintthuneya ahu osukiwa ni Yehova opwaha khalai?

³ Olelo va ninatthuneya osunkiwa ni Yehova opwaha khalai. Mwaha wooweera Satana ohikariwa wiirimu, ni okhuruwela vathi “ni owali otokotoko.” (Apok. 12:12) Owo ahaapakiha atthu akina wuupuwelaka weera yansottaka yuupuweleke weera ampaka “yootthuna ya Muluku.” (Yoh. 16:2) Mwaha woohimusuwela Muluku, akina annanisontta mwaha wooweera khannerela empari elapo. Moohipwattha moota ninttharatthariwa ahu hiyo khontthuneya woova. Mwaha wa heeni? Mwaha wooweera masu a Muluku enahima weera “Apwiya t’òroromeleya, awo anolipihani ni anosunkani mwa sonanara.’’ (2 Ates. 3:3) Moota heeni Yehova onansukaawe? Noone itthu piili.

YEHOVA OONIVAHA IKHARUMA SOOTHEENE SA EKHOTTO

4. Moovarihana ni Aefeso 6:13-17, Yehova onivanhe eheeni?

⁴ Yehova oonivaha ikaruma seiyo sineera sinsukeke natupheliwaka ni Satana. (Mmusome Aefeso 6:13-17.) Yehova onoorowa onisuka naavarelakaru nnene ekaruma eri poothe—naahiruleru. Ekaruma eri poothe enthonyera eheeni? Nrowe noone.

5. Sintu a ekhaikhai eheeni ni heeni ontthuneyaaya owara?

⁵ Sintu a ekhaikhai onthoonyera ikhaikhai sinkhuma mwa masu a Muluku ori Biblya. Mwaha wa heeni nintthuneyaahu owara? Mwaha wooweera Satana “tithi a wotha”. (Yoh. 8:44) Owo ooviriha iyaakha sintxipale “othaka elapo yothene”. (Apok. 12:9) Mene ikhaikhai siri mBiblyani sinnanikhavihera ohiwokiwa ni Satana. Nnaaware hayi esintu ya ekhaikhai? Nixutteraka ikhaikhai sa Yehova, nimukokhorele “mwa munepa ni ekhaikhai” ni neettaka nnene mwa itthu sootheene.—Yoh. 4:24; Aef. 4:25; Aheb. 13:18.

6. Niphattakala na exariya, heeni ontthuneya ahu ovarela muteko?

⁶ Niphattakala na exariya [maleya a yuuma] enthonyera malamulo a xariya a Yehova. Eheeni ontthuneyaaya ovarela muteko? Onnatthuneya ovarela muteko mwaha wooweera khalayi, niphattakala nannasuka murima wa nakhotto weera owo ahikakatthiwe ni ekatana naari ohommwa nnivaka. Vamoha-moharu niphattakala na xariya ninnasuka murima ahu, naari mukhalelo ahu wa mmurimani. Niphattakala nno, ninnanakihera weera nikhootte mikhalelo sa elapo ela. (Mir. 4:23) Yehova ontthuna weera nimusiveleke ni ninvareleke muteko ni murima wootheene. (Math. 22:36, 37) Mwa yeeyo Satana ontthuna okawanya murima ahu weera nsiveliweke ni itthu sa mulaponi—seiyo Yehova oniittaawe. (Yak. 4:4; 1 Yoh. 2:15, 16) Miruku sa Satana sahikhumelaka nnene, owo onnaneerera ni itthu ikina weera nitthekele malamulo a Yehova.

7. Hiyo ninwara hayi niphattakala na xariya?

⁷ Hiyo ninnawara niphattakala na xariya weera nimwiiweleleke Yehova nipakaka yooreera ni nsepaka yoonanara, nikhalaka moovarihana ni malamulo awo. (Nsal. 97:10) Atthu akina anoona weera malamulo a Yehova annakhottihera opaka yoothanla. Mene murumeyi a Yehova onhiya weettela miruku sa mBiblyani mweekumini mwawe, onlikana ni nakhotto onrula niphattakala evinheene ekhotto, oonaka weera ninnamulemela niphattakala. Opaka eyo waarowa okhala onsikini! Mutthu ommusivela Yehova “khanoona olemela malamulo awe”, mene okhala etthu eneera evuluxe ekumi awe.—1 Yoh. 5:3.

8. Entaphulela eheeni masu oweera niiwarihe makupasa mmanaanini ni okhala olikaneene nlaleyaka mitthenka sooreera?

⁸ Paulo anooperera tho weera niiwarihe makupasa mmanaanini weera nikhale olikaneene nlaleyaka mitthenka sooreera sa murettele. Masu ala antaphulela weera naaleelaka atthu akina mitthenka sa Omwene siri mBiblyani, nroromelo nahu ninnalipa. Ti yoohakalaliha owoona atthu a Yehova a elapo yootheene yaasaseraka olaleya mitthenka sooreera—omutekoni, oxikola, omerkadu, empa ni empa, yaarowaka otthuma itthu ni yaarowaka waaxekura amusi aya ahikhanle Anamoona a Yehova, yaatthekulaka ni asinthamwene aya, naari ehikhumaka mmawanyaya annavirelela olaleya. Noovaka ni nnahiyerera olaleya, ninlikana ntoko nakhotto onrula isapatu evinheene ekhotto. Wakhala weera nakhotto oopaka eyo, owo vannakhweya ovulalihiwa inaani. Yookhumelela aya owo amwiiviwa ni aamoonihera weera khaatthara miruku sa komandante.

9. Mwaha wa heeni ontthuneyaaya ovarela muteko exikudu ya nroromelo?

⁹ Exikudu etokweene enthonyera omwiiwelela wahu Yehova. Ninnaroromela weera Yehova onookwanihera soolaihera sawe sootheene. Nroromelo nno ninnanikhavihera “otxipiha mavaka othene òvarela onanara.” Mwaha wa heeni ontthuneyaaya ovarela muteko exikudu? Mwaha wooweera ennanisuka weera nihiwokiwe ni sooxuttiha soovirikanyiha. Ni weera nihatakiheke ale anvaanya soororomela sahu. Woohikhala nroromelo, khaninrowa okhalano ikuru weera niwere okhootta neereriwaka weera nihiye weettela malamulo a Yehova. Ikwaha sootheene ninkhootta ahu opaka ele Yehova oniittaawe, omutekoni, oxikola, ninvarela muteko exukudu ahu. (1 Ped. 3:15) Ikwaha ikina ninkhoottaahu navahiwa muteko onliviwa musurukhu mwintxipale, mwaha woosuwela weera onoonanariha mukhalelo ahu wa omumepani, ninvarela muteko exikudu ahu. (Aheb. 13:5, 6) Vaava ninvirelelaahu omukokhorela Yehova naamwi nisonttiwaka, nroromelo nahu ninnasukiwa ni exikudu ahu.—1 Ates. 2:2.

10. Ekapasete yoovuluxa ti heeni, ni nnavarela hayi muteko?

¹⁰ Ekapasete yoovuluxa ti yooweherera Yehova onnivahaawe—yooweera owo onoorowa onoopola mookhwaani, ni waavaha nlivo ootheene yaale ampaka yootthunaawe. (1 Ates. 5:8; 1 Tim. 4:10; Tito 1:1, 2) Ntoko ekapasete ensukaaya muru wa nakhotto, ekapasete yoovuluxa ennasuka muupuwelo ahu. Moota heeni? Yooweherera Yehova onnivahaawe, ennanikhavihera wuupuwelela soolaihera sawe ni ennanikhavihera ovilela yaaniphwanyaka maxupo. Nnavarele hayi muteko ekapasete ahu? Ninnavarela muteko nuupuwelaka ntoko Yehova onuupuwelaawe. Mwa ntakihero, hiyo makristu yooweherera ahu khenlipa ni mihakhu soohiroromeleya, mene enlipa ni Muluku.—Nsal. 26:2; 104:34; 1 Tim. 6:17.

11. Ekatana ya munepa ti heeni ni ninxuttera hayi moota woovarela muteko?

¹¹ Ekatana ya munepa ti masu a Muluku ori Biblya. Ekatana ela yookhalano owera ni wiitha opwaha sowootha sootheene, yeeyo enaavuluxa atthu mwa sooxuttiha sowootha ni mikhalelo soonanara. (2 Akor. 10:4, 5; 2 Tim. 3:16, 17; Aheb. 4:12; 2) Ninnaxuttera ovarela muteko nnene ekatana eyo, moorweela mwa yoosoma ya meekhihu ni ovarela muteko miruku ninvahiwahu ni mareherero ahu. (2 Tim. 2:15) Ohiya onivaha ikaruma sa omunepani, owera heeni Yehova onnivahaawe weera anisuke?

KHANINWANA MEEKHIIHU

12. Nintthuneya okhaviheriwa nnaani ni mwaha wa heeni?

¹² Nakhotto osuwenle owana, onnasuwela-tho weera khanwera waawina anakhotto antxipale meekhaawe. Owo onnatthuna okhaviheriwa ni atthu akina. Emoha-moharu, khaninwera onwera Satana ni mademoniyu awe nawana meekhihu. Onnatthuneya okhaviheriwa ni asinna ni arokora. Nave tiyeeyo Yehova onivanhaawe “onna” wa elapo yootheene, yoowo ori woolikaneene weera onikhavihere.—1 Ped. 2:17.

13. Moovarihana ni Aheberi 10:24, 25, moota heeni mithukumano sinnikhaviheraaya?

¹³ Moota mukina nimphwanyaahu nikhavihero ori woonela mithukumano. (Mmusome Aheberi 10:24, 25.) Ootheene ahu pooti okhala ootteettheya emaara ekina. Eyo yeereya, orowela mithukumano pooti onilipiha. Ikomentaariyu soovara murima sa asinna ni asirokora, ninnanlipiha. Nyaha sinkhuma mBiblyani ni sowooniheriwa sinnanooperera ovirelela omukokhorela Yehova. Otthekula ni asinna ni arokora sihinaaye ni simanleene mitthukumano, sinanlipiha. (1 Ates. 5:14) Ohiya eyo, onnanihakalaliha waakhavihera atthu akina omuthukumanoni. (Mit. 20:35; Arom. 1:11, 12) Mithukumano sinnanikhavihera-tho mwa mikhalelo mikina. Mithukumano sinnanikhavihera orehera mikhalelo sahu sa olaleera ni oxuttiha nnene. Mwa ntakihero, omuthukumanoni ninnaxuttera moota woovarela muteko ikaruma sahu sooxuttiha. Nto mwiirehereke mwaarowaka omuthukumanoni. Mwakhala omuthukumanoni nwiriyaneke nnene. Moonela mithukumano vale, nvareleke muteko ele muxuttenraanyu. Mwapaka eyo munokhala ntoko “nakhotto òrera a Kristu Yesu.”—2 Tim. 2:3.

14. Taani tho akina annikhavihera?

¹⁴ Hiyo tho ninnakhaviheriwa ni malaika mantxipale oowera. Muupuwele etthu nikhanlaaya oopaka nlaika nimoha. (Yes. 37:36) Ni muupuwele tho etthu malaika mantxipale eneeraya epake. Khaavo mutthu naari mademoniyu anlikana ni anakhotto oowera a Yehova. Atthu akina anhima weera naamwi amwiittani ereene oowera onipwaya hiyo, nto mutthu mmoha akhaviheriwaka ni Yehova toowera waapwaha ootheene. (Aph. 6:16) Nto eyo ekhaikhai! Wakhala weera moottettheya mwaha wooweera mukhwiinyu naari mmusi anyu ohuuluma etthu yooxumpeni, muupuweleke weera ookhala ori ni nyuwo. Mooneke weera maxupo anoophwanyani khamunwanano meekhanyu. Yehova ori ohoolo wanyu aweettihakani.

YEHOVA ANEEREKE OVIRELELA ONSUKA

15. Moovarihana ni Yesaya 54:15, 17, heeni atthu eneeraya ehiwere waatuphela arumeyi a Yehova?

¹⁵ Elapo ela enlamuleliwa ni Satana yookhalano mathowa aneeriha oniitta. Hiyo khannivoleihera ni nyaha sa epolitika, khaninrowa okhottoni. Mene ninvuwiha nsina na Muluku, ninnalaleya weera paahi omwene wa Muluku oneera owiihe murettele elapo ya vathi, ni ninnaiwelela malamulo a Yehova. Hiyo ninnaaleela atthu weera namalamulela a elapo ela namootha ni namwiva. (Yoh. 8:44) Nave-tho, ninnalaleya weera moohipisa olamulelo wa Satana onoonyaanyiwa. Mwaha woosuwela weera anoonyanyiwa, Satana ni mademoniyu awe khammala onisontta. Mene naamwi vareene hiiho, hiyo ninnavirelela onvuwiha Yehova mpaka ninwerelaahuvo. Naamwi Satana areene oowera, khanwera okhoottiha olaleiwa mitthenka elapo yootheene. Nto sootheene iya sinwereya mwaha woosukiwa ni Yehova.—Mmusome Yesaya 54:15, 17.

16. Yehova onrowa waavuluxa hayi atthu awe mpuwa mwa yoohooxa etokweene?

¹⁶ Eheeni enrowa weera moohipisa? Yavira mahooxo matokweene, Yehova onoonivuluxa mwa mikhalelo miili sootikiniha. Yoopatxera, owo onimwaavuluxa arumeyi awe oororomeleya vaavo oneeraawe awooperere mamwene a mulaponi weera emunyaanye Babilonia mutokweene, yoowo ori mutokweene a ittiini sowootha. (Apok. 17:16-18; 18:2, 4) Yanaaveeli, owo onoorowa waavuluxa atthu awe emaara onrowaawe onyaanya ni ekhotto ya Harmagedoni.—Apok. 7:9, 10; 16:14, 16.

17. Heeni ontthuneyaaya ovirelela omwattamela Yehova?

¹⁷ Navirelela omwattamela Yehova, Satana khanwera onihasula emaara yootheene. Mweekhaikhai, ti yoowo onrowa onyaanyiwa woohimala. (Arom. 16:20) Vano nware—ni muhirule tho ikaruma sanyu sa ekhotto! Muheerere owana meekhanyu. Mwaakhavihereke asinna ni asirokora. Mutthareke miruku sa Yehova. Mwapaka itthu iya muroromeleke weera Tiithi anyu a wiirimu onimoolipihani ni onimoosunkani.—Yes. 41:10.