Nyuwo mookhalano nroromelo?

Weera nimuhakalalihe Yehova, hiyo ontthuneya okhalano nroromelo, mene Biblya onhima weera “wiwelela konàkhuleliwa n’atthu othene.” (2 Ates. 3:2) Emaara murummwa Paulo uulumaawe masu ala, owo aahima atthu ‘oohiloka ni oonanara’ naari neere, atthu yaamutthara-tthara. Mene itthu Paulo uulummaawe woohima sa nroromelo ennavareleya muteko wa atthu akina, atthu akina khentthuna waakhulela weera ookhala Muluku apanke itthu soothesene. (Arom. 1:20) Atthu akina ennaakhulela weera ookhala mutthu mutokweenexa, mene eyo khemphiyera paahi weera nimuhakalalihe Yehova mwaha wooweera nno khaiyene nroromelo neekhaikhai.

Hiyo nintthuneya ororomelaka weera Yehova ookhala ni weera owo ‘onnaatthuvela’ ale erinono nroromelo noolipa. (Aheb. 11:6) Nroromelo mukhalelo wa yoowiima ya munepa wootteela, weera naakhele munepa wootteela, hiyo nintthuneya onvekela Yehova weera anivahe munepa owo. (Luka 11:9, 10, 13) Mukhalelo mukina woowaakhela munepa wootteela, ti vaavo nimmusomaahu Biblya uupuxerinwe ni mwaneene Muluku. Nave-tho ti wootepa otthuneya ophimelela woohima sa ele ninsomaahu, ni ovarihela muteko miruku nimphwanyaahu. Mwa mukhalelo ene yoola munepa wootteela wa Yehova onookhala mweekumini mwahu ni onoorowa onikhavihera okhalano nroromelo nenno nimmusiveliha Yehova.