Moota muloko onooniheraaya moonelo wa Yehova woohima sa ale empaka soottheka itokweene

1. Etthu heeni Yehova ontthunaawe wa atthu ootheene?

YEHOVA ohaapaka atthu ni yoovaha ya othanla mootaphuwa. Nyuwo munnavarihela yoovaha eyo moohihiyerereya vaavo mumpakaanyu soothanla. Yoothanla etokweene mutthu ori poothe ontthuneyaawe opaka, yoothanla yoowiivaherera wa Yehova ni weerela eparte emusi awe emmukokhorela. Yehova ontthuna weera ootheene epake yoothanla eyo. Mwaha wa heeni? Mwaha wooweera owo onnaasivela atthu ni ontthuna mureerelo aya. Owo ontthuna weera ekhaleno onthamwene nuuwo ni ekhaleno ekumi yoohimala. — Ola. 30:19, 20; Agal. 6:7, 8.

2. Etthu heeni Yehova ontthunaawe wa atthu ale ehittharunwe? (1 Yohani 2:1)

² Mene Yehova khammukhanyerera mutthu weera anvareleke. Owo onnamuhiya mutthu ori poothe othanla etthu onrowaawe opaka. Nankha wakhala weera mukristu oopatisiwa khantthara malamulo a Muluku apakaka yoottheka etokweene? Wakhala weera mutthu owo khanttharuwa, ontthuneya okumihiwa mmulokoni. (1 Akor. 5:13) Mene naari vareene hiiho, Yehova onnaweherera moopixa murima weera namattheka atthikele wa yoowo. Ohima ekhaikhai eyo etthu emweerinhe Yehova ovaha yoowoopola weera owereyeke anamattheka oleveleliwa soottheka saya. (Mmusome 1 Yohani 2:1.) Muluku ahu ansivelo onnaaleela mwa nsivelo ale ampaka soottheka, ni onnawooperera weera ettharuwe. — Zak. 1:3; Arom. 2:4; Yak. 4:8.

3. Etthu heeni ninrowaahu woona mwa yoosoma ene yeela?

³ Yehova ontthuna weera nikhaleno moonelo awe woohima sa anamattheka. Mwa yoosoma ene yeela nnoorowa othokorora moota ninkelaahu opaka eyo. Vaavo ninkelaahu osomaka mwaha ola mwaasaase osuwela, (1) moota yaathokororinwaaya yoottheka etokweene muloko wa oKorinto eseekulu yoopatxera, (2) miruku heeni murummwa Paulo aavanhaawe vaavo namattheka aattharunwaawe ni (3) etthu heeni yooweereya ela ya mBiblyani enooniheraaya woohima sa moonelo wa Yehova woohima sa akristu ampaka soottheka itokweene.

MOOTA SAATHOKORORINWAAYA SOOTTHEKA ITOKWEENE ESEEKULU YOOPATXERA

4. Etthu heeni yaakhumelenle muloko wa oKorinto eseekulu yoopatxera? (1 Akorinto 5:1, 2)

⁴ Mmusome 1 Akorinto 5:1, 2. Mpuwa mwa mukwaha awe wanaararu wa omisiyonaariyu, Paulo aahiiwa soohimmwa sooriipiha murima woohima sa muloko munyowani waapakinwe oKorinto. Mulopwana mmoha a muloko ole, annakonihana moohireerela ni amwaara aapapawe. Mukhalelo ntoko ola waari woowuuliha muru, naari ‘khawaapakiwa variyari va amalapo’! Muloko ohiya paahi ohipwatthela mwaha ole, mene awo-tho yannamuttittimiha mulopwana ole. Apaale awo yuupuwela weera eyo yoonihera omoriwa ikharari ni moota Muluku onwiiwexexaawe atthu oohimalela. Mene Yehova khonsiveliwa ni atthu empaka soottheka variyari va muloko awe. Yoottheka ntoko ela mulopwana ole aapankaawe, yaamurowa onanariha mukhalelo wooreera wa muloko. Nave-tho mukhalelo ola waamurowa waavoleela akristu akina yaatthekula nuuwo. Vanonto, etthu heeni Paulo aarummaawe weera muloko opake?

5. Etthu heeni Paulo ooperenraawe muloko opaka, ni owo aatthuna ohima eheeni? (1 Akorinto 5:13) (Nwehe efootu.)

⁵ Mmusome 1 Akorinto 5:13. Attharaka miruku soowuupuxeriwa, Paulo aalepa ekaarta ahimaka weera namattheka ole ahaattharuwa akumihiwe mmulokoni. Moota heeni akristu oororomeleya yaarowaaya omuthokororaka? Paulo aahaaleela weera ‘ehipwexeererane’ ni mutthu owo. Eyo yaataphulela eheeni? Paulo aahiiwanyeiha weera miruku iya saahela mpuwa ‘ohitxa vamoha ni mutthu owo.’ (1 Akor. 5:11) Okilaathi vamoha ni mutthu owo, waamweeriha wiiraana vantxipale nuuwo. Moohihovela, Paulo aatthuna ohima weera muloko khawaatthuneya wiiraana ni mutthu owo. Eyo yaamukosoopa muloko wa mikhalelo soonanara. (1 Akor. 5:5-7) Opwaha mwa yeeyo, osepa wiiraana ni mutthu owo, wammweeriha woonelela weera oohiya otthara miruku sa Yehova, ni aamuuliwa muru ni eyo yammweeriha ottharuwa.

6. Etthu heeni muloko waapankaaya waakhelakaru ekaarta ya Paulo, ni etthu heeni mulopwana ole aatthenke aapankaawe?

⁶ Aarumihelakaru ekaarta awe akristu a oKorinto, Paulo anniikoha moota muloko waarowaaya woonela eyo. Muhoolo mwaya, Tito aamuleela etthu Paulo yeeyo yaamuhakalalinhe. Muloko waahaakhulela nnene sene ekaarta ya Paulo. (2 Akor. 7:6, 7) Awo yannatthara miruku sawe. Opwaha mwa yeeyo, sivirakaru miyeeri Paulo aruminheene ekaarta awe, mulopwana ole aattharuwa yoottheka awe! Owo aatxentxa mukhalelo awe moota woopaka itthu ni aapatxera otthara malamulo axariya a Yehova. (2 Akor. 7:8-11) Vanonto, etthu heeni Paulo aarowaawe wooperera muloko opaka?

MOOTA MULOKO WEERAAYA OMUTHOKOROREKE NAMATTHEKA OOTTHARUWA

7. Etthu heeni yooreera yaakhumelenle mwaha wa okumihiwa mmulokoni mulopwana ole aatthenke? (2 Akorinto 2:5-8)

⁷ Mmusome 2 Akorinto 2:5-8. Paulo aahoona weera ‘nttaruxo nne antxipale a yaawo yanvahiyaaya mulopwana ole, naaphiyera.’ Ni masu makina, nttaruxo nne naakwanihera yoolakela aya wa mutthu ole. Yoolakela heeni? Omweeriha ottharuwa. — Aheb. 12:11.

8. Paulo ooperenre weera muloko opake eheeni?

⁸ Paulo aahooperera muloko eeraka: ‘Mmulevelele ni mmuhakalalihe’ mulopwana owo, ni ‘mutthikele omoonihera nsivelo.’ Moone weera Paulo aatthuna weera muloko opakeke itthu ikina ohiya paahi weera mulopwana ole atthikele mmulokoni mwa Yehova. Paulo aatthuna weera awo emuroromelihe mulopwana ole aattharunwe weera aamulevelela ni yannamusivela moorweela mwa masu aya, mikhalelo saya ni soopaka saya. Mwa mukhalelo ene yoola, yaamurowa woonihera nnene sene weera yannamwaakhela namattheka ole aatthikenle mmulokoni.

9. Mwaha wa heeni atthu akina waaxumpaaya omulevelela mulopwana ole aattharunwe?

⁹ Neereke atthu akina a muloko ole yaaxupeya mwaha wa namattheka ole aatthikenle mmulokoni? Biblya khanhima, mene pooti weeraka yaaheereya. Mwaha wooweera, itthu aapankaawe saakumihera maxupo muloko wootheene, nave atthu akina yannoona wuuliha muru. Atthu akina pooti weeraka yannuupuwela weera khaiyene waari wa xariya mulopwana ole waakheliwa mwa nsivelo ntoko munna, mwaha wooweera awo yaahiilipihera vantxipale weera evirelele okhala ootteela. (Munwehe-tho Luka 15:28-30.) Vanonto, mwaha wa heeni waaraaya wootthuneya muloko ole omoonihera nsivelo neekhaikhai munna ole aatthikenle mmulokoni?

10-11. Etthu heeni yaakela weereya waakhanle weera asitokweene a mmulokoni khemulevelenle mulopwana aattharunwe?

¹⁰ Nkuupuwelani etthu yaarowa weereya waakhanle weera asitokweene a mmulokoni aakhootta omutthikihera mmulokoni munna ole aattharunwe, naari waakhanle weera emutthikiherakaru mmulokoni muloko khiwaamoonihera nsivelo. Owo ‘aamuxupeya vantxipale.’ Pooti weera owo aamuupuwelaka weera khaarowa-tho owera onvarela Yehova. Pooti weeraka-tho owo aamuhiya wiilipihera wawe oreherera onthamwene awe ni Muluku.

¹¹ Opwaha mwa yeeyo, waakhanle weera asinna ni asirokora a mmulokoni aakhootta omulevelela mulopwana ole aattharunwe, awo yaamurowa ohela veerisani onthamwene aya ni Yehova. Mwaha wa heeni? Mwaha wooweera awo khiyaarowa woonihera mukhalelo woolevelela wa Yehova woohima sa anamattheka oottharuwa, mene yaarowa wooniheraka mukhalelo woohimoriwa ikharari wa Satana. Satana aamwaavarihela muteko asinna ale weera amukhulumule moomunepani mulopwana ole. — 2 Akor. 2:10, 11; Aef. 4:27.

12. Moota heeni muloko waarowaaya omutakiha Yehova?

¹² Vanonto, moota heeni muloko wa oKorinto waarowaaya omutakiha Yehova ohiya omutakiha Satana? Wampaka eyo ottharaka mukhalelo wa Yehova wa moota onwoonelaawe anamattheka ettharunwe. Moone ele anamalepa akina a Biblya ehimmaaya woohima sa Yehova. Davidi ohimme weera, owo ti “òrera murima ni òlevelela.” (Nsal. 86:5) Mikeya olempe ha: “Muluku tani ori ntoko weyo, onatxipiha sopahula ni onalevelela sottheka?” (Mik. 7:18) Ni Yesaya ohimme ha: “Mutakhali ahiye ephiro awe, ni mulolo myupuwelo sawe, ahokolowele wa Yahvéh onommorela ikharari ni wa Muluku ahu, niwoko ti òwakuva olevelela.” — Yes. 55:7.

13. Mwaha wa heeni waaraaya wooreera omutthikihera mmulokoni mulopwana ole aattharunwe? (Nwehe ekwaadru “Etempu heeni yaavinre weera mulopwana ole oKorinto atthikiheriwe mmulokoni?”)

¹³ Weera emutakihe Yehova, muloko ole wa oKorinto wannatthuneya omwaakhela mulopwana ole aattharunwe ni ommaaliha emooniheraka nsivelo. Vaavo yaattharaaya miruku sa Paulo ni omwaakhela mulopwana ole aattharunwe, muloko waahoonihera ‘wiiwelela mwa itthu sootheene.’ (2 Akor. 2:9) Ekhaikhai weera saavinre miyeeri vakhaaniini paahi vaavo mulopwana ole aakumihinwaawe mmulokoni, mene nttaruxo naamweeriha ottharuwa. Tivawonto, asitokweene a mmulokoni khiyaatthuneya oweherera ovira etempu yintxipale weera emutthikihere mmulokoni.

YOONIHERAKA EXARIYA NI IKHARARI SA YEHOVA

14-15. Ninxuttera eheeni ni moota yaathokororinwaaya yooweereya ya oKorinto? (2 Pedru 3:9) (Nwehe efootu.)

¹⁴ Moota yaathokororinwaaya yooweereya ya mulopwana a oKorinto, yoolempwa weera ‘enxuttihe.’ (Arom. 15:4) Moorweela mwa yooweereya ene yeela, ninnaxuttera weera Yehova khanaakhulela soottheka itokweene variyari va atthu awe. Owo khontthuna weera anamattheka ehinttharuwa “emoreliweke ikharari” evirelelaka okhala vamoha ni atthu awe oororomeleya. Yehova toomoriwa ikharari, mene owo khanaakhulela soottheka naari khantxentxa malamulo awe. (Yuda 4) Ohima ekhaikhai, waakhanle weera Yehova onnapaka eyo, khaarowa woonihera omoriwa ikharari, mwaha wooweera aamuhela veerisani muloko wootheene. — Mir. 13:20; 1 Akor. 15:33.

¹⁵ Nnaamweera vareene hiiho, ninnaxuttera weera Yehova khantthuna weera naari mutthu mmoha anyaanyiwe. Owo ontthuna waavuluxa atthu ootheene wawereya vale. Owo onnaamorela ikharari atthu ootheene empaka matxentxo ni murima aya wootheene ni entthuna oreherera onthamwene aya nuuwo. (Ez. 33:11; mmusome 2 Pedru 3:9.) Mwa yeeyo, vaavo mulopwana ole a oKorinto aattharunwaawe ni ohiya mukhalelo awe woonanara, Yehova aahinvarihela Paulo weera iiwanyeihe muloko weera mulopwana ole waatthuneya oleveleliwa ni waakheliwa nnene mmulokoni.

16. Moota heeni nyuwo muniisoonelaanyu woohima sa moota aathokororinwaawe mulopwana a oKorinto?

¹⁶ Ntoko nonnaahu moota yaathokororinwaaya yooweereya ya mulopwana a oKorinto, ennanikhavihera woona nsivelo na Yehova ni exariya awe. (Nsal. 33:5) Neereke eyo khenweerihani otthuna onvuwiha Muluku ahu? Ohima ekhaikhai, ootheene hiyo noottheka, nave ninnahaawela nlevelelo nawe. Mutthu ori poothe a hiyo ookhalano mathowa emmweeriha omuxukurela Yehova mwaha wa yoowoopola yeeyo eneeriha owereya oleveleliwa soottheka. Tthiri ti woomaaliha osuwela weera Yehova onnasiveliwa mweekhaikhai ni atthu awe, ni onnatthuna itthu sooreera wa atthu awe awo!

17. Etthu heeni ninrowaahu woona mwa soosoma sinttharelana?

¹⁷ Vanonto mahiku ahu ala, ninrowa othokororaka hayi soottheka itokweene? Moota heeni asitokweene a mmulokoni enrowaaya woonihera yootthuna ya Yehova yoomweeriha mutthu otthenke ottharuwa? Moota heeni muloko ontthuneyaaya woonelaka vaavo asitokweene enthanlaaya omukumiha naari omutthikihera mutthu mmulokoni? Makoho ala nnoorowa waakhula mwa soosoma sinttharelana.