Nvirelele weetta ni nroromelo

1. Mwaha wa heeni murummwa Paulo aahakalalaawe ni ekumi awe?

MURUMMWA Paulo aasuwela weera moohipisa aamurowa okhwa, mene aakhalano mathowa oohakalala mweekumini mwawe. Awehaka muttuli, owo aaheera: “Kòmaliha ekwaha aka, kòsunka orattene wiwelela.” (2 Tim. 4:6-8) Paulo aapaka soothanla sooreera mmutekoni mwawe moolaleera, ni annaroromela weera Yehova annahakalala nuuwo. Hiyo-tho naatthunaka waakhuleliwa ni Muluku, nintthuneya opakaka soothanla sooreera. Ninrowa opaka moota heeni eyo?

2. Ontaphulela eheeni weetta ni nroromelo?

² Paulo aahuuluma woohima sa mwaneene ni akristu akina oororomeleya eeraka: “Khweli ninnètta mwaha wa [nroromelo], kahiyene mwaha wowona.” (2 Akor. 5:7) Paulo aatthuna ohima eheeni? Mbiblyani, masu ooweera ‘weetta’ imaara ikina onhimmwa moota mutthu onthanlaawe weettiha ekumi awe. Vaavo mutthu oneettaawe moovarihana ni ele onoonaawe paahi, onnapaka soothanla moovarihana ni ele onoonaawe, oniiwaawe ni onuupuwelaawe. Moovirikana ni eyo, mutthu oneetta ni nroromelo, owo onnapaka soothanla moovarihana ni omuroromela wawe Yehova Muluku. Soopaka sawe sinnoonihera weera onnaroromela weera Muluku onoomutthuvela ni onoottottela mureerelo miruku sa Yehova simphwanyeya mBiblyani. — Nsal. 119:66; Aheb. 11:6.

3. Mareeliho heeni enkhumelela mwaha wooweetta ni nroromelo? (2 Akorinto 4:18)

³ Ekhaikhai weera ootheene hiyo ikwaha ikina ninnapaka soothanla moovarihana ni muupuwelo ahu. Menento onooneya weera nnookhalano maxupo wakhala weera nintthara paahi ele nnoonaahu naari nniiwaahu vaavo nimpakaahu soothanla sootthuneya. Mwaha wa heeni? Mwaha wooweera wakhala weera nnoopaka soothanla nttharaka paahi ele nnoonaahu, nniiwaahu naari muupuwelo ahu, moovira etempu hiyo nnoorowa opaka etthu ehimmusivela Yehova. (Koh. 11:9; Math. 24:37-39) Vaavo nneettaahu ni nroromelo, nnoorowa opakaka soothanla ‘simmuhakalaliha Yehova.’ (Aef. 5:10) Otthara miruku sa Muluku onoorowa oniphwanyiha murettele wa mmuupuweloni ni ohakalala weekhaikhai. (Nsal. 16:8, 9; Yes. 48:17, 18) Nave-tho, navirelela weetta ni nroromelo, nnookhalano ekumi yoohimala. — Mmusome 2 Akorinto 4:18.

4. Moota heeni mutthu onrowaawe woonelela waari weera oneetta ni nroromelo naari ni itthu sinooneya?

⁴ Moota heeni ninrowaahu osuwela waari weera nneetta ni nroromelo naari hooye? Ootheene hiyo ninnatthuneya wiipakela makoho ala: Itthu heeni kinwehexexaaka vaavo kimpakaaka soothanla? Keereke kineettihiwa ni ele kinoonaaka? Naari kineettihiwa ni omuroromela waka ni otthara miruku sa Yehova? Nrowe noone moota ninrowaahu ovirelela weetta ni nroromelo mwa mikhalelo miraru sootthuneya: vaavo ninthanlaahu muteko, vaavo nimmuthanlaahu mutthu oothelanano ni vaavo ninvahiwaahu miruku mmarehereroni mwa Yehova. Mwa mukhalelo ori poothe, nnimoona etthu nintthuneyaahu owehexexa weera nipake soothanla sooreera.

VAAVO NINTHANLAAHU MUTEKO

5. Eheeni nintthuneyaahu othokorora vaavo ninthanlaahu muteko?

⁵ Ootheene hiyo ninnatthuna okhala oolikaneene okosoopa soohaawela sahu ni sa emusi ahu. (Koh. 7:12; 1 Tim. 5:8) Sookhala miteko mikina sinliva musurukhu muntxipale. Miteko iyo pooti omweeriha ole onvara muteko owera okosoopa soohaawela sawe sa nihiku ti nihiku ni okhalano musurukhu mukina weera iikhavihere muhoolo. Mene miteko mikina, sinliva musurukhu vakhaaniini, yeeyo emmweeriha ole onvara muteko okhalano musurukhu paahi weera akosoopeke emusi awe. Emaara ninthokororaahu muteko heeni ninrowaahu othanla, moohihovela, hiyo ninwehexexa musurukhu mukavi ninrowaahu ophwanyaka, menento wakhala weera mutthu onwehexexa yeeyo paahi, mutthu owo pooti weera oneetta awehaka itthu sinooneya.

6. Moota heeni ninrowaahu weetta ni nroromelo vaavo ninthanlaahu muteko? (Aheberi 13:5)

⁶ Wakhala weera nneettihiwa ni nroromelo, nnoowehexexa moota muteko ninrowaahu othanla onvoleelaaya onthamwene ahu ni Yehova. Hiyo pooti wiikoha ha: ‘Keereke muteko ola waamukeeriha opaka itthu sihimmusivela Yehova?’ (Mir. 6:16-19) ‘Keereke muteko ola wanvoleela omukokhorela waka Yehova ni waamukeeriha okhala ottayi ni emusi aka mwa itempu sintxipale?’ (Afil. 1:10) Wakhala weera waakhula wa makoho ala nneera aani, waamurowa okhala wa miruku ohaakhulela muteko owo nnaamweera oxupaka ophwanya muteko. Vaavo nneettaahu ni nroromelo, ninnapaka soothanla sinoonihera weera ninnaroromela weera Yehova onoorowa okosoopa soohaawela sahu. — Math. 6:33; mmusome Aheberi 13:5.

7-8. Moota heeni murokora mmoha a wAmérica do Sul enttaawe ni nroromelo? (Nwehe efootu.)

⁷ Moone moota munna Javier,a yoowo onkhala wAmérica do Sul, oonelenlaawe otthuneya waya weetta ni nroromelo. Owo ohimme ha: “Miyo kaahiilepiha muteko yoowo kaarowaaka waakhelaka musurukhu muntxipale ni waarowa okwaniheraka soohaawela saka.” Menento Javier aakhalano yoolakela yookhala piyoneiru. Owo onnavirelela eeraka: “Miyo wannatthuneya okoha-kohiwa weera kiphwanye muteko ole. Menento kihaakunveene okoha-kohiwa, kaahinvekela Yehova nikhavihero kiroromelaka weera owo oosuwela etthu eri yooreera wa miyo. Miyo kannatthuna orowa vahoolo ni muteko ole, menento nkaatthuna weera muteko ole okootxeelihe okwanihera sooluluwanya saka sa omunepani.”

⁸ Javier ohimme ha: “Mpuwa mwa okoha-kohiwa, ole aakikoha-koha aakileela weera miyo kaatthuneya ovaraka muteko iwoora sintxipale. Miyo kaamwaakhula mwa nttittimiho weera nkaarowa opaka eyo mwaha wa muteko aka woolaleera.” Aani, Javier aakhootta muteko ole. Sivirakaru isemana piili, owo aapatxera ovara ntoko piyoneiru. Avinyaka, eyaakha ene yeele, owo aaphwanya muteko wa iwoora vakhaani. Owo ohimme ha: “Yehova ohiiwa mavekelo aka ni ookivaha muteko yoowo onvarihana ni eprograma aka ya opiyoneiru. Miyo kinnahakalala vantxipale mwaha woophwanya muteko yoowo onkaakhulela oviriha etempu yintxipale kinvarelaka Yehova ni asinna.”

9. Eheeni nyuwo muxuttenraanyu ni yooweereya ya Trésor?

⁹ Ankhanto noonelela weera muteko ninvaraahu viinaano va onnanootxeeliha weetta ni nroromelo? Moone yooweereya ya Trésor a oCongo. Owo ohimme ha: “Muteko aka munyowani yaari etthu yootepa otthuneya mweekumini mwaka. Miyo kaahaatxeereriwa musurukhu kaakhelaaka opwaha kaakhelaaka muttuli, ni kannattittimihawa vantxipale.” Menento, Trésor ikwaha sintxipale annatxompela mithukumano mwaha woovara muteko iwoora sintxipale. Owo-tho annakhanyereriwa wootha ni makoleeka awe weera iipithiheke miteko soohireerela. Trésor annatthuna ohiya muteko ole, menento annoova ohikhalano muteko. Etthu heeni emukhavihenre? Owo ohimme ha: “Habakuki 3:17-19 ookikhavihera woona weera nnaamweera kiyeleelaka muteko aka, Yehova onoorowa okikosoopa. Nto miyo koohiya muteko ole.” Owo ohimme ha: “Anamuteko antxipale enuupuwela weera, wakhala weera muteko onnaakheliha musurukhu muntxipale, mutthu pooti opaka etthu eri poothe, ohela mpuwa orakamelana ni emusi awe naari oviriha etempu yintxipale ahipakaka itthu soomunepani. Miyo kinnahakalala mwaha wookosoopa onthamwene aka ni Yehova ni emusi aka. Evirakaru eyaakha emoha, Yehova ookikhavihera ophwanya muteko wooreerela yoowo onkikhavihera okhalano etempu weera kinvareleke Yehova. Vaavo nimmuhelaahu Yehova nipuro noopatxera mweekumini mwahu, pooti weera nnooviriha maxupo oothoiwa, mene Yehova onoonikosoopa.” Aani, naroromela miruku ni soolaihera sa Yehova, nnoovirelela weetta ni nroromelo ni owo onoonireeliha.

VAAVO NIMMUTHANLAAHU MUTTHU OOTHELANANO

10. Itthu heeni sinrowa oneeriha weetta niwehaka itthu sinooneya vaavo nimmwaasaahu mutthu oothelanano?

¹⁰ Ntheli yoovaha ya Yehova, ni khaiyene woonanara otthuna othela naari otheliwa. Vaavo murokora ommwaasaawe munna oothelanano, pooti weera onooweha mikhalelo sa munna owo, omutthu awe, oreera, aareeneno musurukhu, moota onkosoopaawe emusi ni moota ommweerihaawe wiisoonela.b Ekhaikhai weera itthu iya ti sootthuneya. Mene wakhala weera onwehexexa itthu sene seiya paahi, murokora owo pooti weeraka aarowa weettaka moorweela mwa ele onoonaawe.

11. Moota heeni ninrowaahu weetta ni nroromelo vaavo nimmwaasaahu mutthu oothelanano? (1 Akorinto 7:39)

¹¹ Yehova onnahakalala vantxipale vaavo onwoonaawe asinna ni asirokora ettharaka miruku sawe vaavo emmuthanlaaya mutthu oothelanano! Mwa ntakihero, awo khenkuxera matheela miruku sinhima weera awo ontthuneya ohiya ‘emiravo’ ehaakunve opatxera onamorari. (1 Akor. 7:36) Awo ennamwaasa mutthu oophwanelela othelanano, otepaxa wene, moovarihana ni mikhalelo seiyo Yehova onhimaawe weera sinoomweeriha okhala mulopwana ooreerela ni muthiyana ooreerela. (Mir. 31:10-13, 26-28; Aef. 5:33; 1 Tim. 5:8) Wakhala weera mutthu ohikhanle Namoona a Yehova onnoonihera osiveliwa naawo, awo ennaroromela miruku soothelana “mwa Apwiya pahi” ntoko emphwanyeyaaya va 1 Akorinto 7:39. (Mmusome.) Awo ennavirelela weetta ni nroromelo, eroromelaka weera Yehova onoorowa okosoopa soohaawela saya sa mmuupuweloni opwaha moota mutthu mukina aarowaawe okosoopa. — Nsal. 55:23 [5:22, Tradução do Novo Mundo].

12. Eheeni nyuwo muxuttenraanyu ni ntakihero na Rosa?

¹² Moone etthu yeereñye ni Rosa, piyoneira mmoha a oColômbia. Muteko aavaraawe, waamweeriha okumana imaara sintxipale ni mulopwana mmoha ahaakhanle Namoona a Yehova. Mulopwana ole aapatxera woonihera osiveliwa ni Rosa. Nave-tho Rosa aasiveliwa nuuwo. Owo ohimme ha: “Waakhala ntoko mulopwana ole aakhalano mikhalelo sooreera. Owo aavara muteko woowiivaherera mmuttettheni mwawe, nave aakhalano ekumi yooreera. Miyo wannakisivela moota owo aakikosoopaawe. Owo aakhalano mikhalelo seiyo kaahaawelaaka, waamuhalenle okhala Namoona a Yehova paahi.” Owo onnavirelela eeraka: “Waakixupa omukhootta mulopwana ole mwaha wooweera miyo-tho kannamutthuna. Emaara ele miyo kanniisoona okhala meekhaaka ni kaatthuna otheliwa, mene nkaawera omphwanya munna mmulokoni.” Menento Rosa khaawehexexa ele aaweraawe woona paahi. Owo aahuupuwelela moota yoothanla ele yaarowaaya ovoleela onthamwene awe ni Yehova. Mwa yeeyo, owo aamaliha onthamwene ni mulopwana ole ni annaatteliwa ni miteko sa mmarehereroni. Evirakaru etempu, owo aawompwa orowela Exikola ya anamalaleera a Omwene, vano onvara ntoko piyoneira oothanleya. Rosa ohimme ha: “Yehova oohakalaliha murima aka.” Nnaamweera ohikhalaka wookhweya weetta ni nroromelo mwa itthu sooxupa, eyo etthu yooreera opaka.

VAAVO NNAAKHELAAHU MIRUKU MMAREHERERONI

13. Itthu heeni sinrowa oneeriha weetta ni itthu nnoonaahu vaavo nnaakhelaahu miruku mmarehereroni mwa Yehova?

¹³ Ikwaha sintxipale hiyo ninnaakhela miruku mmarehereroni mwa Yehova, seiyo sinkhuma wa asitokweene a mmulokoni, asitokweene a esirkwiitu, sinkhuma ofiliyaale, naari Mukuttula Woolamulela onnivahaaya, seiyo sinnikhavihera woona moota woomukokhorela Yehova. Vanonto, nankha wakhala weera ikwaha ikina khanniiwexexa miruku naakhenlaahu? Hiyo pooti opatxera ohovela wakhala weera miruku iyo ti sooreera. Naari hiyo pooti opatxera owehexexa ohimalela wa asinna awo envaha miruku.

14. Etthu heeni enrowa onikhavihera weetta ni nroromelo vaavo nnaakhelaahu miruku mmarehereroni mwa Yehova? (Aheberi 13:17)

¹⁴ Vaavo nneettaahu ni nroromelo, ninnaroromela weera Yehova onnawehexexa itthu sootheene ni weera oosuwela itthu ninvirihaahu. yookhumelela aya, ninniiwelela moowaakuveya ni ninnapaka eyo ni moonelo wooreera. (Mmusome Aheberi 13:17.) Ninnasuwela weera wiiwelela wahu onnakumihera wiiraana mmulokoni. (Aef. 4:2, 3) Nnaamweera asinna ennihoolela ereene oohimalela, ninnaroromela weera Yehova onooreeliha wiiwelela wahu. (1 Sam. 15:22) Mwa etempu yooreerela, owo onooreherera itthu sootheene sintthuneya orehereriwa. — Mik. 7:7.

15-16. Eheeni yaamukhavihenre munna mmoha weetta ni nroromelo nnaamweera aahovela miruku aakhenlaawe? (Nwehe efootu.)

¹⁵ Moone yooweereya enoonihera mareeliho enkhumelela vaavo nneettaahu ni nroromelo. Nnaamweera oPerú nuulumo na Espanhol nuulummwaka vantxipale, atthu antxipale a weiwo ennuuluma muulumo mantxipale oovirikana. Nuulumo nimoha a yaawo, nuulumo na Quíchua. Mwa iyaakha sintxipale, asinna ni asirokora enuuluma nuulumo na Quíchua, yannawaasaasa atthu yuuluma nuulumo na nno mmutekoni moolaleera. Nto weera ekwanihereke malamulo a anamalamulela, asinna yaapaka matxentxo a moota woowaaphwanya atthu awo. (Arom. 13:1) Yookhumelela aya, asinna akina yanniikoha wakhala weera matxentxo awo yaamukhumela nnene mmutekoni moolaleera. Menento, vaavo asinna yaapankaaya matxentxo awo, Yehova aareeliha wiilipihera waya weera yaaphwanye atthu antxipale yuuluma nuulumo na Quíchua.

¹⁶ Kevin, mutokweene mmoha a muloko wa nuulumo na Quíchua, aari ekhurupu ya asinna ale yaapanke matxentxo. Owo ohimme ha: “Miyo kaahuupuwela ha, ‘Moota heeni ninrowaahu waaphwanya atthu enuuluma nuulumo na Quíchua?’” Etthu heeni Kevin opankaawe? Owo ohimme ha: “Kaahuupuwelela yoolepa ya Miruku 3:5, ni kaamuupuwela Mose. Yehova anvaha miruku seiyo saakhala ntoko khisaavareleya muteko. Yehova aamweerela Mose weera aakumihe ana a Israeli wExipitu aaroihaka ephareya yooxeera, weiwo yaakhalaaya ntoko khiyaarowa ovuluwa mmatatani mwa anakhotto a wExipitu. Nnaamweera vareene hiiho, Mose aahiiwelela, ni Yehova aareeliha wiiwelela wawe mwa mukhalelo wootikiniha.” (Ott. 14:1, 2, 9-11, 21, 22) Kevin aari oolikaneene wiikhoveleliha ni mukhalelo ole munyowani woolaleera. Eheeni yaakhumelenle? Owo ohimme ha: “Kootikhiniheya moota Yehova onireelinhaawe. Khalayi nannavara vantxipale muteko woolaleera, ni imaara ikina namphwanya mutthu mmoha naari eeli yuuluma nuulumo na Quíchua. Vano nneetta mittetthe eraayamo atthu enuuluma nuulumo na Quíchua. Yookhumelela aya, hiyo ninnawera otthekula ni atthu antxipale, otthikela oxekura ni opakiha soosoma sa Biblya. Atthu enoonela mithukumano sahu ahaatxeerereya.” Aani, vaavo nneettaahu ni nroromelo, imaara sootheene Yehova onnanireeliha.

17. Etthu heeni nyuwo muxuttenraanyu mwa yoosoma ene yeela?

¹⁷ Noothokorora moota woovirelela weetta ni nroromelo mwa mikhalelo, miraru sootepa otthuneya. Mene hiyo onnatthuneya ovirelela weetta ni nroromelo mwa mikhalelo sootheene sa mweekumini mwahu, vaavo nimpakaahu soothanla wa itthu ninrowaahu woonela nviidiyuni, matthekulelo ahu, naari emaara yeeyo nimpakaahu soothanla woohima sa osoma ixikola itokweene naari waahuwa anamwane. Nihipwatthaka yoothanla nintthuneyaahu opaka, hiyo khontthuneya weettihiwa paahi ni itthu ninweraahu woona, mene-tho ni onthamwene ahu ni Yehova, miruku sawe ni yoolaihera awe ya onikosoopa. Wakhala weera nnoopaka eyo, hiyo nnoowera ‘weetta ni nsina na Yehova Muluku ahu mahiku ootheene.’ — Mik. 4:5.