“Mmuthanle . . . tani munatthunanyu [onvarela]”

1. Nintthuneya opaka eheeni weera niphwanye ohakalala weekhaikhai, ni mwaha wa heeni? (Yesaya 48:17, 18)

TIITHI ahu a wiirimu onnansivela vantxipale, ni ontthuna weera nihakalaleke ni ekumi ahu viinaano ni muhoolo. (Koh. 3:12, 13) Owo onipattunxe ni mukhalelo woowera opaka itthu ikina sootikiniha, mene khanivanhe owera woowiilamulela asineene ahu naari opaka malamulo ahu woohima sa etthu yooreera ni yoonanara. (Koh. 8:9; Yer. 10:23) Owo oosuwela weera, weera nikhaleno ohakalala weekhaikhai nintthuneya onvarela ni okhala moovarihana ni malamulo awe. — Mmusome Yesaya 48:17, 18.

2. Etthu heeni Satana ontthunaawe weera naakhuleleke, ni moota heeni Yehova aakhunlaawe yoowootha eyo?

² Satana ontthuna weera hiyo nroromeleke weera hiyo pooti okhala oohakalala nihinvarelaka Yehova ni weera atthu pooti okhumela nnene yiilamulelaka meekhaaya. (Eph. 3:4, 5) Yehova ohaakhula yoowootha ela aahiyaka atthu wiilamulela meekhaaya mwa etempu vakhaani. Khanintthuneya orowa attayi weera noone yookhumelela ya olamulela wa atthu. Moovirikana ni eyo, soolepa sinnoonihera matakihero a alopwana ni athiyana yaawo yaarinono ekumi yoohakalaliha mmutekoni mwa Yehova. Ntakihero ntokweene, ti na Yesu Kristu. Nipatxere woona toko mathowa emweerinhe owo othanla onvarela Yehova. Avinyaka ninrowa othokorora mwaha wa heeni Tiithi ahu a wiirimu omphwanelaawe okokhorela wahu. Okhwipi waya ninrowa woona mathowa vakhaani yaawo enneeriha olakela onvarela Yehova.

MWAHA WA HEENI YESU AATHANLIYAAWE ONVARELA YEHOVA

3. Itthu heeni Yesu aavahinwaawe ni owo aathanliye opaka eheeni?

³ Emaara Yesu aaraawe elapo ya vathi, owo annatthuneya opaka yoothanla woohima sa mutthu aarowaawe onvarelaka. Evirakaru etempu vakhaani apatisinweene, Satana aahinvaha Yesu imwene sootheene sa mulaponi anvekelaka weera amukokhorele vakhaaniini paahi. Yesu aamwaakhula: “Okhume va Satana! Yoolempwa: ‘Omukokhorele Yehova Muluku aa, ni onvareleke muteko yooworu paahi.’” (Math. 4:8-10) Mwaha wa heeni Yesu aapankaawe yoothanla ela? Moone mathowa vakhaani.

4-5. Mathowa heeni yaamweerinhe Yesu othanla onvarela Yehova?

⁴ Nthowa ntokweene naamweerinhe Yesu onvarela Yehova, ti nsivelo. Yesu ookhalano nsivelo ntokweene ni noohimala wa Tiithi awe. (Yoh. 14:31) Opwaha mwa yeeyo, Yesu onnanvarela Yehova mwaha wooweera eyo etthu yooreera opaka. (Yoh. 8:28, 29; Apok. 4:11) Owo oosuwela weera Yehova naapwiipwi a ekumi ni owo toororomeleya ni toovaha. (Nsal. 33:4; 36:10 [36:9, Tradução do Novo Mundo]; Yak. 1:17) Yehova ikwaha sootheene onnuuluma ekhaikhai ni Yesu ni onnanvaha itthu sootheene ontthunaawe. (Yoh. 1:14) Moovirikana ni eyo, Satana ookumihera okhwa. Owo namootha, oneettihiwa ni ohikwaneya. (Yoh. 8:44) Mwaha woosuwela itthu iya, Yesu khuupuwenle omutakiha Satana amurukunuwelaka Yehova. — Afil. 2:5-8.

⁵ Nthowa nikina naamweeriha Yesu onvarela Yehova, mwaha wooweera annawehexexa etthu yaarowa okhumelela mwaha wa ororomeleya wawe. (Aheb. 12:2) Owo annasuwela weera wakhala weera anvirelela okhala oororomeleya, aamurowa otteeliha nsina na Tiithi awe ni aamukumihera itthu seiyo saarowa omala-maliha maxupo ootheene Diabo okumihenraawe.

MWAHA WA HEENI YEHOVA OMPHWANELAAWE OKOKHORELA WAHU

6-7. Mwaha wa heeni atthu antxipale olelo ehinanvarelaaya Yehova, mene mwaha wa heeni Yehova omphwanelaawe okokhorela wahu?

⁶ Atthu antxipale olelo khenanvarela Yehova mwaha wooweera nlelo khesuwenle mikhalelo sawe sooreera ni itthu sootheene aapakenlaawe. Etthu eyo yanneereya ni atthu a wAtena Paulo aalalenraawe. — Mit. 17:19, 20, 30, 34.

⁷ Paulo aawiiwanyeiha ale aalaleeraawe weera Muluku eekhaikhai “onnàvaha atthu othene ekumi, nwiya ni sothesene.” Owo aahaatxeerera eeraka: “Mwa yowo ninnakhala n’okumi ni ninnètta ni [nookhala],” Muluku ti Mpattuxa, yoowo ‘mwa mutthu mmoha ookumihera miloko sootheene sa atthu ni itthu sootheene,’ yeeyo enoonihera weera onnaphwanela okokhorela wahu. — Mit. 17:25, 26, 28.

8. Etthu heeni Yehova ohinrowaawe opaka? Muthalihe.

⁸ Ntoko Mpattuxa ni Nanwera sootheene, Yehova anwera waakhanyerera atthu weera envareleke. Menento, Yehova khowa apaka eyo. Opwaha mwa yeeyo, owo oonivaha itthu sinoonihera weera owo ookhala ni weera onnamusivela mutthu ori poothe a hiyo. Owo ontthuna weera atthu antxipale wawereya vale ekhale asinthamwene awe wa mahiku ootheene. (1 Tim. 2:3, 4) Weera yeereye eyo, Yehova ontxentxeriha weera naaxuttiheke atthu akina woohima sa sootthuna sawe ni weera naaleeleke woohima sa itthu sooreera onrowaawe waapakela atthu. (Math. 10:11-13; 28:19, 20) Yehova oopaka miloko ni oonivaha asitokweene a mmulokoni a nsivelo weera enikosoopeke. — Mit. 20:28.

9. Moota heeni nsivelo na Yehova nnooneyaaya?

⁹ Nsivelo ntokweene na Yehova ninnooneya moorweela mwa moota onaakosoopaawe atthu yaale ehinroromela weera owo ookhala. Muthokorore itthu iya: Ovinyera khalayi, atthu imilyau sintxipale ennathanla okhala moovarihana ni malamulo aya woohima sa etthu yooreera ni yoonanara. Nnaamweera vareene hiiho, Yehova mooreera murima onnaavaha itthu enhaawelaaya weera ekhale akumi ni opuha ekumi aya eyo. (Math. 5:44, 45; Mit. 14:16, 17) Owo onnaakhulela weera atthu awo ekhaleno amusi ni asinthamwene enaasivela, okhalano anamwane, ni awo pooti ovara muteko ni opuha itthu emphwanyaaya mwaha wa muteko envaraaya. (Nsal. 127:3; Koh. 2:24) Itthu iyo sinnoonihera weera Tiithi ahu a wiirimu onnaasivela atthu ootheene. (Ott. 34:6) Nuupuwele vano mathowa vakhaani enneeriha othanla onvarela Yehova ni moota owo onnaakhulaawe.

MWAHA WA HEENI NINTHANLAAHU ONVARELA YEHOVA

10. (a) Nthowa heeni ntokweene ninneeriha onvarela Yehova? (Matheyo 22:37) (b) Moota heeni nyuwo muttottenlaanyu mureerelo opixa murima wa Yehova? (Nsalmu 103:13, 14)

¹⁰ Hiihaale ntoko Yesu, ninnanvarela Yehova otepaxa wene mwaha wooweera ninnamusivela. (Mmusome Matheyo 22:37.) Ninnamusivela vantxipale Yehova vaavo ninxutteraahu woohima sa mikhalelo sawe. Mwa ntakihero, moone moota Yehova onnipixeraawe murima. Vaavo ana a Israeli yaahiñyaaya omwiiwelela, owo aahaatxonttela eeraka: “Vano mutthu ti mutthu arukunuxe murima ahiyaka khuluwi ephiro awe yonanara.” (Yer. 18:11) Yehova oosuwela weera hiyo toohimalela, ni weera hiyo ntthupi. (Musome Nsalmu 103:13, 14.) Vaavo nyuwo mumphimelelaanyu opixa murima wa Yehova ni mikhalelo sawe ikina sootikiniha, neereke nyuwo khamuntthuna onvarela wa mahiku ootheene?

11. Mathowa heeni makina enneeriha othanla onvarela Tiithi ahu a wiirimu?

¹¹ Nave-tho nthowa nikina ninneeriha onvarela Yehova, mwaha wooweera eyo etthu yooreera opaka. (Math. 4:10) Opwaha mwa yeeyo, noosuwela etthu enrowa okhumelela mwaha wa muteko ninvaraahu moororomeleya. Mukhalelo ahu woororomeleya, onoorowa okhavihera otteeliha nsina na Yehova, woonihera weera Satana namootha, ni ohakalaliha murima wa Tiithi ahu. Ni wakhala weera nnoothanla viinaano va onvarela Yehova, nnookhalano yooweherera yonvarela mahiku ootheene! — Yoh. 17:3.

12-13. Etthu heeni nixuttenraahu ni yooweereya ya Jane ni Pam?

¹² Nnaamweera nreene amiravo, hiyo pooti wuunnuwihera nsivelo ntokweene ni Yehova, ni ovirelela okhalano nsivelo nno emaara yeeyo nnuuluvalaahu. Moone ntakihero na asirokora eeli a erukulu emoha eniitthaniwa Jane ni Pam.a Jane aarinono iyaakha 11 ni Pam aarinono iyaakha 10 emaara yeeyo yaapatxenraaya omusoma Biblya. Nnaamweera asitiithi aya yahaakhanleno ntthuno noosoma, awo yaahaakhulela weera Jane ni Pam emusomeke Biblya ni Anamoona a Yehova wakhala weera awo yanvirelela orowa okereja ni emusi aya okhwipi wa esemana. Jane ohimme ha, “Etthu Anamoona a Yehova ekixuttinhaaya mBiblyani, yookikhavireha osepa wiivoleihera ni mirette soohapala ni okonihana woohireerela kaakhanyereriwaka ni makoleeka aka.”

¹³ Asithiyana ale eeli yinnuwakaru yaahikhala anamalaleera. Muhoolo mwaya, awo yaarowela muteko wa opiyoneiru vaavo yaakosoopaaya asitiithi aya oowuuluvala. Uupuwelelaka yooweereya awe, Jane ohimme ha: “Kohoona ni maitho aka weera Yehova onnaakosoopa moororomeleya asinthamwene awe, ni weera, ntoko 2 Timotheyo 2:19 onhimaawe, ‘Yehova ohaasuwela ale eri awawe.’” Hiyo khaninhovela weera Yehova onnaapwattha ale enthanla omusivela ni onvarela!

14. Moota heeni masu ahu ni itthu nimpakaahu sinkhaviheraaya otteeliha nsina na Yehova mwa itthu ootherinwaawe? (Nwehe efootu.)

¹⁴ Nintthuna okhavihera otteeliha nsina na Yehova mwa itthu sootheene ootherinwaawe. Muupuwelele ha: Nyuwo mookhalano nthamwene anyu yoowo ori ooreera murima, oovaha, ni oolevelela. Nihiku nimoha, nyuwo munnamwiiwa mutthu amootheraka nthamwene anyu owo okhala oowuuma murima ni oohiroromeleya. Mwaarowa woonela hayi? Nyuwo mwammwaakhiha. Mwa mukhalelo mmoharu, vaavo Satana ni atthu emmukhavihera eneereraaya onanariha mikhalelo sa Yehova ehimaka itthu soowootha woohima sa Owo, hiyo ninnamwaakiha nuulumaka ikhaikhai woohima sa Yehova, niilipiheraka waakiha nsina Nawe. (Nsal. 34:2 [34:1, NM]; Yes. 43:10) Ninnoonihera weera nintthuna onvarela Yehova ni murima ahu wootheene moorweela mwa masu ahu ni itthu nimpakaahu.

15. Moota heeni murummwa Paulo ottottenlaawe mureerelo mwaha woopaka matxentxo mweekumini mwawe? (Afilipi 3:7, 8)

¹⁵ Hiyo ninniivaherera opaka matxentxo mweekumini mwahu weera ninvareleke Yehova ntoko owo onaakhulelaawe ni mooreerela. Mwa ntakihero, murummwa Paulo aalakela ohiya muritti woothanleya aaraaweno mmuttettheni mwawe weera akhale mutthareli a Kristu ni anvareleke Yehova. (Agal. 1:14) Yookhumelela aya owo aakhalano ekumi yoohakalaliha ni ookhalano eparakha yoolamulela vamoha ni Kristu wiirimu. Owo khintale weera keerelani mwaha wonvarela Yehova, nave hiyo-tho khaninrowa weera. — Mmusome Afilipi 3:7, 8.

16. Etthu heeni nxuttenraahu ni yooweereya ya Julia? (Nwehe efootu.)

¹⁶ Wakhala weera onvarela Yehova enookhala etthu yootepa otthuneya ya mweekumini mwahu, nnookhalano ekumi yoohakalaliha viinaano ni muhoolo. Moone yooweereya ya murokora mmoha oniitthaniwa Julia. Ahinaaye oxuttera ekhaikhai anniipa mukereja ovinyera areene mukhaanini. Mulipa mmoha oowiipa oosuweliwa aahoonelela weera Julia annawera wiipa ni aahimuxuttiha. Julia aapatxera okhala oovuwa ni aapatxera wiipa mapuro oovuwa. Emaara aasomaawe exikola yoowiipa koleekaawe mmoha aapatxera wuuluma nuuwo woohima sa Muluku ni aamuleela weera nsina na Muluku, Yehova. Evirakaru etempu vakhaani, Julia aapatxera omusoma Biblya ikwaha piili vasemanani. Noovira etempu owo aalakela ohiya wiipa anavarihela ekumi awe weera anvareleke Yehova. Yoothanla ela khaiyene yaari yookhweya. Julia ohimme ha, “Atthu antxipale yaahima weera nkaavarihela itthu kaasuwenlaaka mene miyo kaatthuna kivariheleke ekumi aka weera kinvareleke Yehova.” Moota heeni Julia oniisoonelaawe mwaha wa yoothanla opankaawe mwa iyaakha soopwahaka 30? Owo ohimme ha, “Kookhalano murettele mmuupuweloni, ni kinnaroromela weera Yehova onookwanihera soohaawela sa murima aka muhoolo.” — Nsal. 145:16.

NVIRELELE ONVARELA YEHOVA

17. Moota heeni mahiku oomalihera enaavoleelaaya ale ethanlale onvarela Yehova ni ale nlelo ehipanke yoothanla eyo?

¹⁷ Hiyo ninkhala mahiku oomalihera. Murummwa Paulo oolepa eeraka: “Vetthwitthuni ‘nlelo ehanle vakhanixa, yole onrwa, onimorwa ni khalekela.’” (Aheb. 10:37) Moota heeni eyo ennivoleelaaya? Mwa mukhalelo mukina, atthu erinono etempu vakhaaniini weera ethanle onvarela Yehova. (1 Akor. 7:29) Ni wakhala weera hiyo noothanla onvarela Muluku, nroromeleke weera maxupo ninrowaahu oviriha enrowa okhala ‘mwa etempu vakhaani.’

18. Etthu heeni Yesu ni Yehova ennoopereraaya opaka?

¹⁸ Yesu aawooperera atthareli awe ohiya paahi opatxera omutthara, mene-tho ovirelela omutthara. (Math. 16:24) Mwa yeeyo, wakhala weera ninnanvarela Yehova mwa iyaakha sintxipale, nikhale oolikaneene ohitthikela ottuli. Nintthuneya okhala oowiilipihera weera nivirelele okhala moovarihana ni yoothanla ahu ya onvarela. Pooti ohikhala wookhweya, mene ninnaakhela mareeliho ni ohakalala viinaano va! — Nsal. 35:27.

19. Etthu heeni nxuttenraahu ni yooweereya ya Gene?

¹⁹ Atthu akina enuupuwela weera onvarela Yehova onnayeleeliha itthu sintxipale. Wakhala weera nyuwo mwa mmiravo, neereke muunuupuwela weera munnayeleela itthu ikina mwaha wa onvarela Yehova? Munna mmoha mmiravo oneeriwa Gene ohimme ha: “Miyo kuupuwela weera okhala Namoona a Yehova wannakikhoottihera itthu sintxipale. Waakhala ntoko anamwane antxipale kinnunwaakano vamoha sannaasivela itthu ntoko, ifesta, otthekula, ni oweetta axooku a ikhotto, menento miyo kiyeleelaka etempu aka mmithukumanoni ni mmutekoni moolaleera.” Moota heeni muupuwelo ola wanvolenlaaya Gene? Owo ohimme ha, “Murima aka waapatxera okawanyeya ni mwa etempu vakhaani kannapaka itthu iyo. Mene itthu iyo khisaakiphwanyinhe ohakalala. Miyo kaapatxera wuupuwela woohima sa ikhaikhai sa mBiblyani kaalakenlaaka othokorora. Miyo kaalakela onvarela Yehova ni murima aka wootheene. Okhuma vaavo kinnoona weera Yehova ohaakhula mavekelo aka ootheene.”

20. Etthu heeni nintthuneyaahu olakela opaka?

²⁰ Nasalmu mmoha, aamwiipela Yehova eeraka: “Òreriwa yowo mmuthanlenlanyu okhala vakhiviru vanyu, siso akhale vate vanyu.” (Nsal. 65:5 [65:4, NM]) Nikhaleno yoolakela emoharu ya Yehoxuwa aahimmaawe eeraka: “Nto miyo ni emp’aka, hoye, nintthuna [onvarela] Yahvéh pahi.” — Yeh. 24:15.